VOV4.Bahnar - Sơ năm hŏk 2022-2023 ‘nŏh jĭ sơ năm mă 3 anih pơ tho pơ hrăm bơ̆ jang kiơ̆ tơ drong pơ tho pơ hrăm lăm hŏk phô thŏng ‘nao, kiơ̆ trong tơ lĕch vă bơ̆ jang hăm lăm 3, lăm 7 păng lăm 10. Tơ̆ jăl 1, hăm lăm 3, Nơ̆r Anh păng Tin hŏk jing môn hŏk pơ gŏ, athei hŏk. Mă lei, ưh kơ măh lăm hŏk, tơ mam hŏk păng bơ ngai pơ tho tŏk bŏk jing tơ drong găn trong lơ hnam trưng pơm kiơ̆ lơ̆m sơ năm hŏk ‘nâu. Yoa thoi nŏh kŭm hăm hơ met tơ mam, lăm hŏk, tơ drong hơ met tôm khul thây kô pơ tho kăl bơ̆ jang thoi yơ vă pơm kiơ̆ tơ drong pơ tho hŏk pơ hrăm ‘nao gơ̆h đei jơ nei?

Tơ drong pơ tho hŏk phô thŏng ‘nao hăm lăm 3 đei lơ tơ drong tơ plih ƀiơ̆ pơ têng hăm tơ drong pơ tho hŏk pơ hrăm oei yoa dang ei, ‘nŏh jĭ athei pơ tho hŏk pơ gŏ hăm 2 môn Nơ̆r Anh, Tin hŏk; đei dơ̆ng tơ drong hŏk pơ hrăm tơ̆ yăn âu păng pơ tho hŏk Công nghệ. Kiơ̆ lơ thây kô, tơ drong pơ gơ̆r hŏk, ăn hŏk tro pơ hrăm hŏk nơ̆r Anh păng Tin hŏk 'nŏh lăp hăm tơ drong 'mĕh vă lơ̆m chăl 'nao, tơ gŭm atŏk tơ iung tôm tơ drong găh đon hlôh vao đơ̆ng hŏk tro. Mă lei, đơ̆ng trong jang truh tơ̆ tơ pă tơ̆ yăn âu oei tơ ƀâp lơ mơ mat tat, mă loi 'nŏh tơ̆ dôm rơ ring, pơ lei pơ la hơ tăih yăih yoa ưh kơ măh tơ mam, kơ măy kơ mŏk vă pơ tho môn Tin hŏk.

Thây Vì Văn Tụt, pơ tho tơ̆ Hnam trưng jăl 1 Chiềng Cang, apŭng Sông Mã, dêh char Sơn La pơ ma hơ dăh: “‘Mi ‘nŏh đak ‘mi hnăt, kơ tŏh đe ŏh hơ ‘yuih, tŏ ‘nŏh đe ŏh athei chĭu tŏ ưh đei pơ bŭng ‘lơ̆ng pĕng tŏ ‘mi, jô̆ hloi kơ ƀang tang dŏ ưh lăp ‘lơ̆ng ăn đe ŏh ngôi hŏk ngăl, ƀơm ưh ‘lơ̆ng truh tơ drong pơ tho păng hŏk đơ̆ng đe thây kô păng hŏk tro. ‘Mĕh iŏk yoa kơ măy kơ mŏk vă pơ tho pơ hrăm mă lei lăm hŏk pơm pơ gia ‘nŏh đe thây kô tơ ƀâp tôch lơ mơ mat tat.”

Kŭm hăm ưh kơ măh tơ mam drăm, lăm hŏk, kơ măy kơ mŏk vă pơ tho môn Tin hŏk ‘nŏh tơ drong thây kô pơ tho môn ‘nâu păng môn nơ̆r Anh kŭm oei pơm ăn lơ hnam trưng jăl 1 tơ ƀâp mơ mat tat. Hrei ‘nâu, thây kô pơ tho Tin hŏk mă lơ ‘nŏh đei hŏk vă pơ tho jăl 2 păng jăl 3. Mă lei kiơ̆ nơ̆r athei, thây kô pơ tho Tin hŏk vă iŏk pơ tho hloi găh Công nghệ păng kơ sô̆ tiêt tŏk 2 'măng pơ têng hăm dang ei, mă lei mă tơ pă ưh kơ sĭ thây kô pơ tho môn tin hŏk yơ kŭm đei pơ tho hŏk tôm găh tơ drong 'nâu ôh.

Kô Cảnh Thị Hải Yến, kô pơ tho môn Tin hŏk, Hnam trưng jăl 1 Liên Hà, apŭng Đan Phượng, plt Hà Nội tơ tăm: “Hnam trưng jăl 1 Liên Hà lăp hơ drô̆ inh đĕch pơ tho Tin hŏk, tơ pă mơ̆n kŭm tôch pơ ngơ̆t yoa jơ pơ tho tŏk lơ păng đei hloi môn Công nghệ athei chă hŏk pơ hrăm thim dơ̆ng. Kiơ̆ tơ drong pơ tho hŏk ‘nao ‘nŏh Tin hŏk gô đei hŏk 2 tiêt 1 giĕng păng công nghệ ‘nŏh 1 tiêt 1 giĕng, akŏm đĭ đăng 42 tiêt jing tôch gleh hrat hăm in, kơ na kŭm hơ pơi ‘mĕh Anih vei lăng pơ tho pơ hrăm truh âu kơnh chă dơ̆ng bơ ngai pơ tho vă klăih song băl tơ drong jang hăm inh.”

Kiơ̆ tơ drong tơ dra truh sơ năm 2025, mưh tơ drong pơ tho hŏk pơ hrăm lăm phô thŏng ‘nao đei tơ lĕch tơ̆ rim jăl hŏk ‘nŏh athei iŏk dơ̆ng hlŏh 24 rơ bâu ‘nu thây kô tơ̆ 3 môn hŏk ‘nao đei, nơ̆r tĕh đak đe, Tin hŏk păng Công nghệ jăl 1. Dôm kơ sô̆ âu ăn ƀôh tơ drong ưh kơ chăng đơ̆ng dôm tơ ring lơ̆m tơ drong chă rơih iŏk thây kô pơ tho. Dôm tơ ring ăn tơ băt, tơ drong ưh kơ măh thây kô mưh pơ tho kiơ̆ tơ drong hŏk pơ hrăm phô thŏng 2018 ‘nŏh ưh kơ đei ‘nao kiơ, kơ na hlôi pơ jing lơ trong jang vă hơ met pơ ‘lơ̆ng, nhen: pơ lung thây kô năm hŏk văn bằng 2, pơ tho hŏk kiơ̆ tơ drong ‘mĕh vă. Tơ̆ hơ năp dang ei vă hơ met pơ ‘lơ̆ng tơ drong mơ mat tat mưh ưh kơ măh thây kô pơ tho dôm môn Tin hŏk, Nơ̆r tĕh đak, dôm tơ ring pơ tho ăn dôm hnam trưng jăl 1 pơ jing trong pơ tho pơ hrăm vă pơ gơ̆r pơ tho 2 môn âu lăp ‘lơ̆ng, ‘moi kiơ̆ rim tơ drong đei tơ̆ yăn âu, atŭm hăm ‘nŏh hơ met jơ pơ tho vă pơm kiơ̆ trong pơ tho hŏk tơ̆ rim hnam trưng, pơ tho tơ̆ lơ anih, lăm hŏk…

Ƀok Phạm Đức Thắng, Kơ dră chĕp kơ̆l Anih vei lăng pơ tho pơ hrăm apŭng Ba Bể, dêh char Bắc Kạn ăn tơ băt: “Thây kô hrei ‘nâu pơ tho dôm môn oei ưh kơ măh, pơ tih gia nhen nơ̆r tĕh đak đe, ‘nâu jĭ tơ drong đei atŭm ưh đei hơ drô̆ tơ̆ apŭng Ba Bể đĕch, mă tơ̆ đĭ đăng apŭng lơ̆m dêh char hloi. Găh tơ drong ưh kơ măh thây kô pơ tho nơ̆r Anh hrei ‘nâu, anih vei lăng kŭm roi tơ ƀôh ăn apŭng hơ met pơ ‘lơ̆ng kiơ̆ trong pơ tho hơ dai lơ hnam trưng. Vă akhan thây kô tơ̆ hnam trưng âu pơ tho tam tôm tiêt ‘nŏh gơ̆h năm pơ tho thim tơ̆ hnam trưng nai.”

          Hrei ‘nâu dôm Anih vei lăng pơ tho pơ hrăm dêh char oei roi tơ ƀôh ăn Dơ nŏ anih vei lăbng kon pơ lei dêh char, plt pơ tho tơ ƀôh ăn tơ ring chă iŏk bơ ngai jang, kĭ hla ar pơ tho hăm đe thây kô pơ tho nơ̆r Anh, Tin hŏk. Atŭm hăm ‘nŏh, pơm ‘lơ̆ng ăn thây kô đei hŏk thim dơ̆ng găh môn kơ dih kâu pơ tho, pơ tâp pơ hrăm kiơ̆ hla ar hŏk, adrol kơ đei pơ jao pơ tho kiơ̆ jơ hŏk. Tơ pă ‘nei, tơ drong pơ tho hŏk pơ hrăm lăm phô thŏng ‘nao gơ̆h tơ gŭm ăn hŏk tro hŏk nơ̆r Anh păng Tin hŏk hrô̆ih ƀiơ̆ vă hlôh vao, gơ̆h hơ gei tôm tơ drong. Mă tơ pă mưh tơ lĕch pơ tho hŏk 2 môn âu tơ̆ dôm hnam trưng jăl 1 ăn bôh kăl đei tơ drong vang jang hơ doi ‘lơ̆ng ƀiơ̆ đơ̆ng anih pơ tho pơ hrăm păng dôm tơ ring vă hơ met khul bơ ngai pơ tho, tơ mam, lăm hŏk, kơ măy kơ mŏk vă gơ̆h pơ tho lăp hăm tơ drong 'mĕh vă.

Dơ̆ng: Tơ blơ̆