VOV4.Bahnar - Tơ̆ plt Hồ Chí Minh, Anih chĕp kơ̆l pơ gơ̆r Kuô̆k hô̆i ‘nao pơ gơ̆r hop akŏm pơ tôch tơ drong jang kơ Jơ nŭm pơ gơ̆r kon pơ lei dôm dêh char, plt tơ ring pơ băh sơ năm 2021 păng tơ lĕch trong jang lơ̆m sơ năm 2022. Vang hop akŏm đei hlŏh 160 ‘nu bơ ngai tang măt ‘nŏh jĭ Kơ dră chĕp kơ̆l Jơ nŭm pơ gơ̆r kon pơ lei, dôm khul tang măt Kuô̆k hô̆i đơ̆ng 20 dêh char, plt tơ̆ tơ ring găh Pơ băh. Pơ ma pơ tôch hop akŏm, Kơ dră Kuô̆k hô̆i Vương Đình Huệ tơ lĕch 8 tơ drong athei kơ chăng bơ̆ jang.

Vă tơ drong jang đơ̆ng Jơ nŭm pơ gơ̆r kon pơ lei đei yoa tơ̆ hơ năp kơnh, lơ̆m hop akŏm, dôm bơ ngai tang măt tơ lĕch lơ tơ drong kăl kŭm nhen nơ̆r pơ ma apinh hăm Kuô̆k hô̆i. Kiơ̆ Phŏ Kơ dră Jơ nŭm pơ gơ̆r kon pơ lei dêh char Vĩnh Long Nguyễn Minh Dũng, Anih chĕp kơ̆l pơ gơ̆r Kuô̆k hô̆i athei jăh tơ lĕch tơ drong hơ găt trong bơ̆ jang đơ̆ng Jơ nŭm pơ gơ̆r kon pơ lei vă dôm tơ ring kơ chăng, chih pơ jing tơ drong jang tơ̆ tơ ring kơ dih lăp 'lơ̆ng hăm yăn âu: “Anih chĕp kơ̆l pơ gơ̆r Kuô̆k hô̆i athei tơ lĕch dôm trong dăr lăng mưh sek tơ lang kiơ̆ nơ̆r pơ ma apinh đơ̆ng bơ ngai tăh hla mă rơ đăh ƀiơ̆. Tơ drong sek tơ lang nơ̆r tơ kêng tơ hlâu ‘nŏh luơ̆t chih tôm bơih, mă lei trong phak mưh sek tơ lang kiơ̆ nơ̆r tơ kêng tam đei vă hơ met ming. Mă tơ pă hrei ‘nâu 1,2 anih jang sek tơ lang tôch hiơ̆, ưh đei drơ̆ng 1 nơ̆r hăm lơ tơ drong đei chih tơ roi lơ̆m hop akŏm ‘nâu, gô truh hop akŏm đơ̆ng rŏng ‘nŏh ‘nao đei hla ar tơl, tôch hiơ̆”.

Kơ dră Kuô̆k hô̆i Vương Đình Huệ pơ ma pơ tôch hop akŏm

Pơ ma pơ tôch hop akŏm, Kơ dră Kuô̆k hô̆i Vương Đình Huệ tơ chĕng ‘lơ̆ng tơ drong jang đơ̆ng dôm anih tang măt ăn kon pơ lei, lơ̆m sơ năm 2021, jĭ 1 sơ năm tôch gĭt kăl, sơ năm mă blŭng tơ lĕch jang kiơ̆ tơ drong Tơ chơ̆t đơ̆ng Hop akŏm Đảng lơ̆m tĕh đak ‘măng mă 13, sơ năm pơ gơ̆r pôk rơih bơ ngai tang măt Kuô̆k hô̆i, Jơ nŭm pơ gơ̆r kon pơ lei jơ̆p tơ ring păng mă loi jĭ sơ năm đei lơ tơ drong mơ mat tat yoa ƀơm kơ nê̆ tôch dêh đơ̆ng jĭ Covid- 19: “Nhen thoi đei 1 hơ yuh kial ‘nao ƀiơ̆, hơ bĕch hơ bal, gơ̆h hơ gei ƀiơ̆, ‘moi kiơ̆ tơ drong arih xa tơ̆ yăn âu ƀiơ̆, pơm lăp hăm dôm tơ drong ‘mĕh vă gĭt kăl đơ̆ng anih tang măt ăn kon pơ lei tơ̆ tơ ring păng vang tơ gop gĭt kăl kŭm hăm rim anih jang chinh trĭ, hăm tơ drong chĕp kơ̆l đơ̆ng Đảng, tơ lĕch jang kiơ̆ tơ drong Tơ chơ̆t đơ̆ng Hop akŏm Đảng lơ̆m tĕh đak, tơ drong Tơ chơ̆t đơ̆ng Hop akŏm Đảng ƀô̆ dôm tơ ring, vang tơ gop kŭm hăm tĕh đak bơ̆ jang 'lơ̆ng 2 tơ drong jang tơm, tang găn jĭ Covid- 19 đei yoa 'lơ̆ng hia, vei kơ jăp 'lơ̆ng ăn tơ drong jang mŭk drăm păng dôm tơ drong jang hmă nai, vă tơ iung dơ̆ng mŭk drăm tơ pôl.”

‘Ngoăih kơ tơ drong pơ gơ̆r 2 ‘măng hop akŏm kiơ̆ khei ‘năr tơ lĕch, lơ dêh char, plt oei pơ gơ̆r hop akŏm ưh ê vă tơ chơ̆t lơ tơ drong gĭt kăl găh tơ drong tang găn jĭ COVID-19 kiơ̆ tơ drong Tơ chơ̆t 30 đơ̆ng Kuô̆k hô̆i jăl XV păng tơ drong jang atŏk tơ iung mŭk drăm, tơ pôl tơ̆ tơ ring. Jơ nŭm pơ gơ̆r kon pơ lei dêh char tơ lĕch lơ tơ drong tơ chơ̆t pơih trong gĭt kăl ăn dôm tơ drong jang atŏk tơ iung mŭk drăm, tơ pôl, tang găn jĭ COVID-19. Mă loi, đei lơ tơ ring hlôi chih kĕh tơ drong hơ găt bơ̆ jang ăn prăt jăl jang.

Găh trong jang, tơ drong vă jang lơ̆m sơ năm 2022 đơ̆ng Jơ nŭm pơ gơ̆r kon pơ lei dôm dêh char, plt, Kơ dră Kuô̆k hô̆i Vương Đình Huệ tơ lĕch 8 tơ drong tơm kăl kơ chăng, lơ̆m nŏh athei, hơ nơ̆ng hlôh vao kơ jăp tơ drong jang, hơ năp jang đơ̆ng Jơ nŭm pơ gơ̆r kon pơ lei đei chih lơ̆m Luơ̆t pơ gơ̆r khul kơ dră tơ ring. Hơ nơ̆ng hơ len năng, chih pơ jing dăh mă hơ met pơ 'lơ̆ng păng pơ gơ̆r bơ̆ jang tơ plih 'nao, hơ tŏk tơ drong 'lơ̆ng đơ̆ng Jơ nŭm pơ gơ̆r kon pơ lei jơ̆p tơ ring mă loi jĭ tơ̆ dêh char. Chih pơ jing trong jang lơ̆m 5 sơ năm, dar dĕh bơ̆ jang mă rơ đăh 'lơ̆ng. Bơ̆ jang 'lơ̆ng hlŏh tơ drong pơ jing khul kơ dră pơ gơ̆r găh bơ ngai jang, nhen iŏk kơ phĭu lui dăh ưh; tơ chơ̆t dôm tơ drong kăl ƀơm truh rim tơ drong jang păng dăr lăng jang kiơ̆ khôi luơ̆t tơm păng luơ̆t tĕh đak tơ̆ tơ ring, hơ len năng hla ar hơ găt luơ̆t đơ̆ng Dơ nŏ anih vei lăng kon pơ lei jơ̆p tơ ring păng hla ar chih đơ̆ng Jơ nŭm pơ gơ̆r kon pơ lei apŭng.

Kơ dră Kuô̆k hô̆i Vương Đình Huệ phĭ hơ dai lơ̆m rup

Kơ dră Kuô̆k hô̆i Vương Đình Huệ pơ ma: “Jơ nŭm pơ gơ̆r kon pơ lei dôm dêh char, plt athei chih tơ lĕch mă tơ tĕnh dôm tơ drong tơ chơ̆t vă pơ gơ̆r bơ̆ jang păng dăr lăng bơ̆ jang kiơ̆ dôm tơ drong Tơ chơ̆t đơ̆ng Kuô̆k hô̆i, Khul kơ dră tĕh đak găh jang atŏk tơ iung mŭk drăm, tơ pôl, jên hu, tơ mât jên jang kơ tĕh đak sơ năm 2022, dôm tơ drong jang tơm kơ tĕh đak, mă loi jĭ tơ drong jang tang găn jĭ COVID-19 đơ̆ng 2022-2023 kiơ̆ trong arih xa ‘moi kiơ̆ tơ drong jĭ sơ đơ̆ng ‘lơ̆ng, tang găn ‘lơ̆ng tơ drong jĭ COVID-19 păng tơ drong jang tơ iung ming dơ̆ng mŭk drăm, tơ pôl. Chih hơ dăh, đei trong hơ met ming ‘moi kiơ̆ 2 tơ drong jang ‘nâu păng dôm tơ drong tơ chơ̆t găh mŭk drăm, tơ pôl đơ̆ng Kuô̆k hô̆i, Khul kơ dră tĕh đak păng nơ̆r tơ chơ̆t đơ̆ng Trung ương”.

Kơ dră Kuô̆k hô̆i Vương Đình Huệ athei Jơ nŭm pơ gơ̆r kon pơ lei dôm dêh char, plt hơ tŏk tơ drong tơ roi tơ băt păng tơ mât yoa kơ măy kơ mŏk tơ toi tơ băt  pơ vih ăn tơ drong jang kơ Jơ nŭm pơ gơ̆r kon pơ lei nhen dôm ‘măng hop akŏm ưh đei hla ar chih, pơ drơ̆ng nơ̆r đơ̆ng hơ tăih, dăr lăng kiơ̆ um rup; hơ nơ̆ng hơ len năng, hơ met pơ kĕh păng pơ gơ̆r jang mă ‘lơ̆ng trong jang hơ doi đơ̆ng Khul tang măt Kuô̆k hô̆i hăm Jơ nŭm pơ gơ̆r kon pơ lei, Khul kơ dră chĕp kơ̆l Jơ nŭm pơ gơ̆r kon pơ lei, dôm anih jang kơ Jơ nŭm pơ gơ̆r kon pơ lei, hăm Dơ nŏ anih vei lăng kon pơ lei păng MTTQVN dêh char, plt vă tưk tơ iung tơ drong đei yoa đơ̆ng rim anih jang, khul grŭp. Atŭm hăm ‘nŏh bơ̆ jang ‘lơ̆ng tơ drong hơ găt đơ̆ng Khul kơ dră chĕp kơ̆l Jơ nŭm pơ gơ̆r kon pơ lei dêh char; Tơ drong hơ găt sơng kon pơ lei đơ̆ng Khul kơ dră chĕp kơ̆l Jơ nŭm pơ gơ̆r kon pơ lei dêh char, bơ ngai tang măt Jơ nŭm pơ gơ̆r kon pơ lei dêh char; Nơ̆r pơ kăp đơ̆ng hop akŏm Jơ nŭm pơ gơ̆r kon pơ lei dêh char vă akŏm tơ drong pơm tơm đơ̆ng kon pơ lei păng tơ iung hơ năp jang, đon rơ gei đơ̆ng khul tơ pôl.

Kơ dră Kuô̆k hô̆i Vương Đình Huệ ăn tơ băt, Anih chĕp kơ̆l pơ gơ̆r Kuô̆k hô̆i hơ nơ̆ng bơ̆ jang, pơm hơ dăh roim tơ drong, chih pơ kĕh dôm hla ar pơ tho jang păng dăr lăng tơ drong jang đơ̆ng Jơ nŭm pơ gơ̆r kon pơ lei.

Dơ̆ng: Tơ blơ̆