VOV4.Bahnar - Pơ gê ‘năr 20/9, tơ̆ Hà Nội, Jơ nŭm vei lăng drŏ kăn Việt Nam pơ gơ̆r Hop akŏm tơ lĕch jang tơ drong jang 8 găh “ Pơm kiơ̆ hơ tŏ băl đơ̆ng drŏ nglo hăm drŏ kăn păng hơ met pơ ‘lơ̆ng dôm tơ drong kăl hăm drŏ kăn păng hơ ioh” jăl jang 1 đơ̆ng sơ năm 2021-2025. Tơ drong jang âu oei lơ̆m tơ drong jang tơm kơ teh đak hơ tŏk tơ iung mŭk drăm tơ pôl tơ ring kon pơ lei kon kông păng tơ ring groi kông jăl jang 2021-2030. Tơ drong jang “ pơm kiơ̆ hơ tŏ băl đơ̆ng drŏ nglo hăm drŏ kăn păng hơ met pơ ‘lơ̆ng dôm tơ drong kăl hăm drŏ kăn păng hơ ioh” lăng kăl 4 tơ drong ‘noh ji: Tơ roi tơ băt, krao hơ vơn tơ plih “ đon tơ chĕng, trong jang” sŭt hŭt dôm đon tơ chĕng ưh kơ lăp hăm drŏ kăn lơ̆m ŭnh hnam păng tơ pôl, dôm tơ drong joăt oei sa đei pơ răm păng 1,2 tơ drong tơ pôl ưh kơ lăp hăm drŏ kăn păng hơ ioh; Pơ jing păng pơ̆ih să dôm tơ drong jang hơ tŏk ‘lơ̆ng tơ drong jang mŭk drăm ăn drŏ kăn, pơ trŭt pơm hơ tŏ băl đơ̆ng drŏ nglo hăm drŏ kăn; vei sơ đơ̆ng nơ̆r pơ ma păng tơ drong vang jang ‘lơ̆ng đơ̆ng drŏ kăn păng hơ ioh lơ̆m dôm tơ drong jang hơ tŏk tơ iung mŭk drăm tơ pôl, dăr hơ len păng pơ ma tơ blang ăn tơ pôl, hơ tŏk ‘lơ̆ng tơ drong kĕ jang ăn kang ƀô̆ drŏ kăn kon kông.

Jơ hop akŏm

Hơ dai hăm hơ tŏk ‘lơ̆ng tơ drong jang kiơ̆ tơ gep đơ̆ng drŏ nglo hăm drŏ kăn ăn kang ƀô̆ lơ̆m khŭl jang chĭnh trĭ păng kră pơ lei, bơ ngai pơ gơ̆r pơ lei, bơ ngai đei đe lui yom lơ̆m tơ pôl. Lơ̆m jăl jang 2021-2025 tơ drong jang 8 tơ lĕch tơ drong hơ găt 9.000 grŭp tơ roi tơ băt tơ pôl; 3.000 hla ar ‘mơ ‘met tŏk iŏk jên pơ lei pơ la; 1000 hơ nih lui ngeh tơ pôl; 1.800 kâu lak ƀô̆ chĕp kơ̆l đơ̆ng tơ drong tơ plih đei hơ met ming/dăh mă pơ jing ‘nao tơ̆ tơ pôl.

Thuem: Tơ blơ̆