VOV4.Bahnar - Bơ̆ jang kiơ̆ trong jang tơ gŭm asong tŏk iŏk jên lơ̆m tơ drong jang tơ iung ming păng hơ tŏk tơ iung mŭk drăm - tơ pôl kiơ̆ Tơ chơ̆t kơ sô̆ 11 ‘năr 30/1/2022 đơ̆ng khŭl kơ dră teh đak, ‘nao âu, Anih mong jên tơ gŭm tơ pôl dôm dêh char lơ̆m tơ ring Tây Nguyên hlôi pơ gơ̆r dôm ‘măng pơm hla ar vă tơ tom tơ lĕch jên truh tơ pang ti kon pơ lei.

‘Nao đei Anih mong jên tơ gŭm tơ pôl ăn tŏk iŏk kơ sô̆ jên 50 triệu hlak jên, mŏ Săn oei tơ̆ plei Piơm, thị trấn Đak Đoa, apŭng Đăk Đoa tơ băt, mŏ gô yua jên vă pơ tăm ming 1hek tar cheh phe iŏk đơ̆ng blŭng pơ yan ‘mi âu. Vă tŏk iŏk đei kơ sô̆ jên tơ gŭm, blŭng sơ năm ‘nâu, mŏ hlôi pơ ma dơ nuh hăm grŭp tŏk iŏk jên păng ‘mơ ‘met kơ pơ lei tơ roi tơ drong hơ pơi ‘meh vă hăm anih mong jên. Lăp đơ̆ng rŏng kơ ‘noh, kang ƀô̆ anih mong jên hlôi năm lăng pơ gar, mơ̆ng mŏ Săn tơ roi găh trong pơ tăm ming pơ gar ‘long:

“Ĭnh chơt hiôk dêh ƀơ̆t tŏk iŏk đei 50 triệu hlak jên vă đei jên tơ mơ̆t jên lơ̆m teh cheh phe âu. 1 puăt jên 1 ĭnh phŏng vă vei lăng ăn cheh phe bluh jing ‘lơ̆ng. ‘Nâu jĭ jên iŏk yua tơm kơ ŭnh hnam kơ na ĭnh gô hơ drin jang iŏk yua mă lơ.”

Oei hăm ‘nhŏng Nguyễn Hoàng Linh (tơ̆ Thôn 1, Thị trấn Đăk Đoa, apŭng Đăk Đoa), kơ sô̆ jên tŏk iŏk 400 triệu hlak jên, hăm jên cheh tŏ sĕt lơ̆m dang 20 sơ năm hlôi tơ gŭm ‘nhŏng bơ̆ jang kiơ̆ đei jơ hngơ̆m ‘meh vă ‘noh jĭ đei 1 pôm hnam kơ jăp ‘lơ̆ng. Klo kăn ‘nhŏng gô ‘mơ ‘met răt yua păng tơ chă tơ drong jang thim vă gơh kla hre hơ drol kơ khei ‘năr pơ kăp:

“10 sơ năm kơ âu năm oei tơ̆ hnam thuê, đei hnam ‘nao ĭnh hiôk chơt dêh. Kơ sô̆ jên cheh rim khei tŏ sĕt, khei ‘năr kla jên cheh pơ dui đunh, kơ na jên khei klo kăn nhi kŭm rơ kah đei tŏ sĕt, vei sơ đơ̆ng kla jên cheh păng jên tơm rim khei, vei sơ đơ̆ng kla hre hơ drol kơ khei ‘năr pơ kăp.”

Bơ̆ jang kiơ̆ Tơ drong jang tơ iung ming păng hơ tŏk tơ iung mŭk drăm tơ pôl kiơ̆ Tơ chơ̆t kơ sô̆ 11 ‘năr 30/1/2022 đơ̆ng Khŭl kơ dră teh đak, ‘măng âu, Anih mong jên tơ gŭm tơ pôl dêh char Gia Lai đei klăih song hloh 100 ti hlak jên vă bơ̆ jang kiơ̆ 3 tơ drong jang: ăn tŏk iŏk jên tơ gŭm tơ drong jang; ăn tŏk iŏk jên hăm hŏk tro, sinh viên păng ăn tŏk iŏk găh hnam oei tơ pôl. Dang ei dôm tơ ring tŏk bŏk tơ tĕnh tơ lĕch jang tơ tom hơ nhăk jên tơ gŭm truh hăm kon pơ lei. Ƀok Nguyễn Văn Ngọc- Kơ dră vei lăng Anih mong jên tơ gŭm tơ pôl apŭng Đak Đoa, Gia Lai tơ băt:

“Tơ drong tơm ‘noh jĭ tơ gŭm kon pơ lei đei jên hơ tŏk tơ iung mŭk drăm, sơ đơ̆ng tơ drong arih sa, tơ iung ming jang sa. Đơ̆ng rŏng kơ tơ lĕch jên, ĭnh hơ len lăng tơ drong iŏk yua jên tŏk iŏk đơ̆ng kon pơ lei hăm đei ƀlep tơ drong ưh; jang hơ dai rim anih jang păng rim khŭl grŭp tơ pôl, hơ nơ̆ng hơ len lăng, dăr lăng tơ drong iŏk yua jên tŏk iŏk, vă chă ƀôh dôm tơ drong đei ƀôh, veh ver kơ tơ hiong jên.”

Mŏ Săn iŏk đei jên tŏk iŏk lơ̆m hơ tuch khei 4 vă pơ tăm ming cheh phe

Kŭm hăm Gia Lai, hơ tuch khei 4 âu ki, Anih mong jên tơ gŭm tơ pôl dôm dêh char lơ̆m tơ ring Tây Nguyên hlôi pơ gơ̆r tơ lĕch jên tơ gŭm kiơ̆ Tơ chơ̆t 11/NQ-CP đơ̆ng Khŭl kơ dră teh đak găh Tơ drong jang tơ iung ming păng hơ tŏk tơ iung mŭk drăm - tơ pôl. Mă hơ dăh ‘noh, tơ̆ Dak Lak hlôi tơ lĕch đei vă jê̆ 5 ti hlak jên ăn kơ dôm bơ ngai mă blŭng tŏk iŏk. Lơ̆m noh đei 83 ‘nu tơ moi tŏk iŏk jên tơ drong jang tơ gŭm pơm tơ drong jang, pơ vei păng pơ̆ih să tơ drong jang hăm akŏp kơ sô̆ jên hloh 4,2 ti hlak jên. Kiơ̆ trong tơ lĕch jang, dêh char Dak Lak đei Trung ương klăih song hloh 71 ti hlak jên vă tơ lĕch jang 3 lơ̆m kơ sô̆ 5 tơ drong jang ăn tŏk iŏk tơ gŭm kiơ̆ Tơ chơ̆t 11/NQ-CP, lơ̆m noh: Ăn tok iŏk tơ gŭm pơm tơ drong jang, pơ vei păng pơ̆ih să tơ drong jang ‘noh 50 ti hlak jên; ăn tŏk iŏk hnam oei tơ pôl ‘noh 20 ti hlak jên... Tơ̆ Lâm Đồng, Anih mong jên tơ gŭm tơ pôl dêh char kŭm hlôi pơ gơ̆r tơ lĕch jên ‘măng mă blŭng dôm tơ drong jang ăn tŏk iŏk jên tơ gŭm kiơ̆ Tơ chơ̆t 11/NQ-CP đơ̆ng Khŭl kơ dră teh đak. ‘Noh jĭ tơ drong jang ăn tŏk iŏk tơ gŭm pơm tơ drong jang, pơ vei păng pơ̆ih să tơ drong jang ăn kơ 50 ‘nu bơ ngai jang, hăm akŏp kơ sô̆ jên vă jê̆ 3 ti hlak jên tơ̆ 2 Anih mong jên tơ gŭm tơ pôl apŭng Di Linh păng Đam Rông. Bơ ngai tŏk iŏk jên găh lơ ‘noh dôm bơ ngai jang vih đơ̆ng dôm anih kơ drơ̆m tih đơ̆ng rŏng kơ ƀơm ưh kơ ‘lơ̆ng đơ̆ng jĭ hơ buh Covid-19, tŏk iŏk jên vă pơm tơ drong arih sa sơ đơ̆ng. Khei ‘năr âu ki, Anih mong jên tơ gŭm tơ pôl dêh char Lâm Đồng hlôi tơ lĕch jên ăn kơ 15 anih jang mơ dro sa tŏk iŏk jên kla jên khei pơ dơh tơ drong jang ăn kơ hloh 4.600 ‘nu bơ ngai jang, hăm akŏp kơ sô̆ jên tŏk iŏk hloh 18 ti hlak jên.

Tơ drong tơ lĕch jang tơ drong jang ăn tŏk iŏk tơ gŭm tơ drong jang, pơ vei păng pơ̆ih să tơ drong jang kiơ̆ Tơ chơ̆t kơ sô̆ 11/NQ-CP đơ̆ng Khŭl kơ dră teh đak hlôi pơm lăp ‘meh vă đơ̆ng lơ kon pơ lei tơ ƀơ̆p mơ mat tat yua đơ̆ng jĭ hơ buh Covid-19 păng kăl đei tơ iung ming, hơ tŏk tơ iung mŭk drăm - tơ pôl.

                                                VOV Tây Nguyên: Chih

Thuem: Tơ blơ̆