Kơdră chĕp kơ̆l Anih jang găh bơngai tang măt, Phŏ Kơdră Anih pơgơ̆r Trung ương Nguyễn Thị Thanh ăn tơbăt, 20 sơnăm âu ki, Anih jang găh bơngai tang măt hlôi jang hơdoi kơjăp hăm dôm anih jang đei ƀơm truh adrin jang tơgŭm, roi tơƀôh ăn Anih chĕp kơ̆l pơgơ̆r Kuô̆k hô̆i chih hơdăh đon tơchĕng đơ̆ng Đảng, lơ̆m tơdrong hơmet ming Khôi luơ̆t tơm 2013, mă loi jĭ dôm tơdrong hơgăt găh pôk rơih, Khul vei lăng pôk rơih kơ tĕh đak.

Đơ̆ng sơnăm 2005 truh dang ei, Anih jang găh Bơngai tang măt pơgơ̆r 142 ‘măng hop akŏm, pơtho pơhrăm ming, sơng đei văjê̆ 15.000 ‘nu bơngai tang măt Kuô̆k hô̆i, Khul kơdră chĕp kơ̆l Jơnŭm pơgơ̆r kon pơlei, kơdră chĕp kơ̆l păng bơngai juăt jang đơ̆ng Anih pơvih ăn Khul tang măt Kuô̆k hô̆i păng Jơnŭm pơgơ̆r kon pơlei dôm dêh char, plt vang akŏm.

Găh tơdrong jang kơ Jơnŭm pơgơ̆r kon pơlei, Anih adrin, kơchăng, tơtom roi tơƀôh ăn Anih chĕp kơ̆l pơgơ̆r tơ lĕch văjê̆ 400 hlak hla ar pơtho bơ̆ jang ăn Jơnŭm pơgơ̆r kon pơlei rim tơring, kiơ̆ đơ̆ng noh dar dĕh hơmet pơ ‘lơ̆ng dôm tơdrong pơmat tat, tơhlăk tăk mưh bơ̆ jang, pơjing tơdrong ‘lơ̆ng vă Jơnŭm pơgơ̆r kon pơlei đei đon kơchăng, bơ̆ jang ‘lơ̆ng hơnăp jang đơ̆ng anih chĕp kơ̆l pơgơ̆r tĕh đak dơ̆ng tang ăn đon rơgei, tơdrong hơpơi ‘mĕh, tơdrong pơm tơm đơ̆ng kon pơlei tơ̆ tơ ring.

Tang măt ăn kơdră Kuô̆k hô̆i, pơma lơ̆m jơ pơm lêh tơbăt, Phŏ Kơdră chĕp kơ̆l Kuô̆k hô̆i Trần Thanh Mẫn pơma hơdăh, Đảng bơ̆n chih hơdăh: “Kăn ƀô̆ jĭ bơngai tơm dơnơm gơ̆h pơm ăn tơdrong jang kăch mang jơnei dăh mă ưh, tơklep kơjăp hăm tơdrong arih kơ Đảng, tĕh đak păng chăl chĕp kơ̆l pơgơ̆r, jĭ tơdrong tơm hlŏh lơ̆m tơdrong tơiung pơjing Đảng”. Găh tơdrong hơgăt ăn bơngai tang măt Kuô̆k hô̆i, Ƀok Hô pơma tôch rơđăh: “Kuô̆k hô̆i athei đei dôm bơngai tang măt mă tơgăl, dôm bơngai tang măt mĭnh jơhngâm đon pơvih ăn tĕh đak, pơvih ăn kon pơlei păng pơvih ăn chủ nghĩa xã hội”.

Yoa thoi nŏh, tơ̆ hơnăp tơdrong athei hơnơ̆ng tơplih ‘nao tơdrong jang đơ̆ng Kuô̆k hô̆i, Phŏ Kơdră chĕp kơ̆l Kuô̆k hô̆i Trần Thanh Mẫn athei Anih jang găh bơngai tang măt bơ̆ jang 5 tơdrong tơm. Lơ̆m nŏh, akŏm jơhngâm tơchĕng hơlen dôm tơdrong ‘nao, kơchăng bơ̆ jang roi tơƀôh, chă ƀôh hrôih dôm tơdrong ‘nao, tơtom tơlĕch nơ̆r pơma hăm Đảng khul Kuô̆k hô̆i, Anih chĕp kơ̆l pơgơ̆r Kuô̆k hô̆i lơ̆m tơdrong hơmet ming khul bơ̆ jang chĕp kơ̆l pơgơ̆r, bơngai jang kơ Kuô̆k hô̆i, hơnơ̆ng tơƀôh hơdăh hơnăp jang tơm đơ̆ng bơngai tang măt Kuô̆k hô̆i lơ̆m tơdrong jang Kuô̆k hô̆i.

Roi tơƀôh, tơlĕch nơ̆r pơma athei tơplih ‘nao khul kơdră pơgơ̆r, hơtŏk tơdrong đei yoa mưh bơ̆ jang đơ̆ng Anih dăr lăng tơdrong tơgŭm ăn kon kông, dôm anih jang kơ Kuô̆k hô̆i, dôm anih jang găh Anih chĕp kơ̆l pơgơ̆r Kuô̆k hô̆i. 'Nâu jĭ tơdrong kăl vă roi tơƀôh ăn Anih tơm Chinh trĭ, Ban Bí thư chih hơdăh trong jang đơ̆ng Kuô̆k hô̆i păng tơlĕch nơ̆r athei lơ̆m dôm trong jang pơgơ̆r pôk rơih bơngai tang măt Kuô̆k hô̆i jăl 16, bơngai tang măt Jơnŭm pơgơ̆r kon pơlei jơ̆p tơring jăl jang 2026 - 2031.

Phŏ Kơdră chĕp kơ̆l Kuô̆k hô̆i Trần Thanh Mẫn pơma hơdăh: “Năng kăl truh tơdrong rơih hơmet hơdrol bơngai tang măt Kuô̆k hô̆i vă gơ̆h chă rơih đei dôm bơngai rơgei, đei jơhngâm đon ‘lơ̆ng, lăp hăm rim tơdrong hơgăt đơ̆ng Đảng păng khôi luơ̆t, vang bơ̆ jang pơm bơngai tang măt Kuô̆k hô̆i; tơplih 'nao tơdrong pơtho pơhrăm ming bơngai tang măt Kuô̆k hô̆i mă lăp 'lơ̆ng, đei yoa, vang pơm hơtŏk tơdrong 'lơ̆ng, gơ̆h hơgei đei yoa mưh bơ̆ jang đơ̆ng bơngai tang măt Kuô̆k hô̆i. Vang roi tơƀôh tơgŭm mă 'lơ̆ng dôm tơdrong đei ƀơm truh tơdrong hơmet pơ ‘lơ̆ng trong jang dăr lăng đơ̆ng bơngai tăh hla păng trong hơlen năng hăm bơngai tang măt Kuô̆k hô̆i; pơjing tơdrong hiôk hian vă bơngai tang măt Kuô̆k hô̆i bơ̆ jang 'lơ̆ng hơnăp jang đơ̆ng kơdih. Kơchăng hơmet ăn tơdrong pôk rơih bơngai tang măt Kuô̆k hô̆i jăl 16, bơngai tang măt Jơnŭm pơgơ̆r kon pơlei jơ̆p tơring jăl jang đơ̆ng 2026 -–2031 kiơ̆ jơhngâm đon jang đơ̆ng hrôih, đơ̆ng hơtăih”.

Phŏ Kơdră chĕp kơ̆l Kuô̆k hô̆i Trần Thanh Mẫn athei, Anih jang găh bơngai tang măt kơchăng hăm rim nơ̆r athei tôch rơđăh đơ̆ng Kơdră Kuô̆k hô̆i Vương Đình Huệ, athei hơnơ̆ng chih akŏm, tơchĕng hơlen dôm tơdrong hơgăt đơ̆ng Đảng, tĕh đak găh tơdrong pơgơ̆r kăn ƀô̆ vă roi tơƀôh mă hơdăh, trŏ ƀlep păng tơtom. Găh noh dơ̆ng Anih jang găh Bơngai tang măt athei kơchăng hlŏh dơ̆ng lơ̆m tơdrong jang, chă iŏk nơ̆r pơma đơ̆ng dôm anih jang tơiung pơjing Đảng, dôm anih tơm, anih jang kơpal păng jang hơdoi kơjăp hăm dôm anih, khul grŭp đei ƀơm truh, mă loi jĭ Anih dăr lăng tơdrong tơgŭm ăn hơdrĕch kon kông, dôm anih jang găh Anih chĕp kơ̆l pơgơ̆r Kuô̆k hô̆i, Jơnŭm pơgơ̆r kon pơlei dôm dêh char, plt găh trung ương.