‘Măng pơgơ̆r tơƀơ̆p muh măt hăm dôm bơngai ‘lơ̆ng lơ̆m khul ƀô̆ đô̆i găh hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô; kơrŭn đĭ jơhngơ̆m tang găn dôm jơhngơ̆m đon kơnê̆ lơ̆m chăl hle.

Dôm tơdrong ƀôh hơdăh yan ou lơ̆m plang akou, hưch hanh tơchăr kơ yuơ kon pơlei, kơ yuơ tơdrong jang vei lăng Teh đak, kơ yuơ tơdrong jang apŭng plĕnh teh gĭt kăl kơ rim ƀô̆ đô̆i hlôi đei ƀôh hơdăh lơ̆m rim ƀai chih, rim tơdrong joh ayŏ kơdŏ soang păng rim ‘măng pơma dơnuh dih băl kơtă tơ̆ ‘măng pơgơ̆r tơgŭm ăn kon pơlei ƀôh hơdăh hloh dơ̆ng jơhngơ̆m đon ‘lơ̆ng Ƀô̆ đô̆i Ƀok Hô; đơ̆ng noh lang să dôm trong jang ‘nao, tơdrong jang hơ iă, tơchăr hơgei, jơnei lơ̆m khul ƀô̆ đô̆i.

Mĭnh lơ̆m kơhrĕng ‘nu bơngai ‘lơ̆ng ‘noh Thượng úy Nguyễn Tuấn Anh, Công ty Sơđơ̆ng mạng Viettel, bơngai hlôi hơngŭr chă tơchăr, tơchĕng hơlen hlôi tơbăt hơdăh ăn plei teh hloh 600 tơdrong glăi lơ̆m vei lăng hrĕp, tơgŭm ăn hơnih jang, grŭp jang kŏng ty tih kĕ yak hloh tơdrong hiong răm kơtang găh kon jên hu. Thượng úy Nguyễn Tuấn Anh tơbăt:“Tơdrong jang tơm kơ ĭnh ‘noh vang jang lơ̆m khul redteam hăm hơnăp jang pơm nhen mĭnh hacker vă tơchă dôm tơdrong ưh kơ ‘lơ̆ng lơ̆m vei lăng hrĕp lơ̆m lăm păng đơ̆ng găh ‘ngoăih kmăi kmŏk kơ rim kŏng ty, hơnih jang păng đơ̆ng noh tơchă trong hơmet pơ ‘lơ̆ng. ‘Ngoăih hưch hanh hăm tơdrong bơ̆ jang, nhôn jei hơdrin vă yak hloh tơnap tap vă vang tơgop vei lăng năng tông kon pơlei, Teh đak lơ̆m tơdrong mạng.”

‘Măng pơgơ̆r oei đei vang năm đơ̆ng kon pơlei ‘noh bơngai kon kông, pơđĭ lơ̆m ŭnh hnam 5 ‘nu jei sa ƀơm pơmou pơnhŭl pơm ăn soai mơnhul kơtang, lơ̆m mă trong năm tơ̆ hnam pơgang tôch hơtăih. Tơ̆ hơnăp tơdrong ou, khul ƀô̆ đô̆i hlôi hơdrin tôm tơdrong, phăl hơlăng hơmet dŏng hơrih ăn pơđĭ lơ̆m ŭnh hnam ou. Kon pơlei ou hlôi tơbăt hơdăh jơhngơ̆m đon hôn bơnê kơtang lơ̆m ‘măng pơgơ̆r ou:“Bơnê lơ kơ ƀak si, tơdăh ưh kơ đei đe mih ma ƀak si chă tơgŭm djru lei ŭnh hnam nhôn ưh kơ đei pran jăng grăng akou nhen dang ei bơih. Truh hăm ‘măng pơgơ̆r ou, ŭnh hnam nhôn ưh kơ đei yă kiơ kăp gĭt lăng chă hơla ăn đe mih ma tơmam drăm ou. Đơ̆ng dang ou ŭnh hnam băt lăng pơmou yă kiơ gơ̆h sa păng pơmou yă kiơ ưh kơ gơ̆h sa bơih.”

Hăm pơgơ̆r đunh 90 pơnĭt jơ, ‘măng pơdăh tivi kơtă Pơgơ̆r tơƀơ̆p pơma dơnuh dôm bơngai ‘lơ̆ng “Jơhngơ̆m đon ‘lơ̆ng Ƀô̆ đô̆i Ƀok Hô” ‘noh chă pơma dơnuh dôm tơdrong đei ƀôh yan ou, lơ̆m ou đei tơbăt hơdăh ‘măng mă blŭng, atum hăm  ƀai chih dôm tơdrong đei ƀôh hơdăh, pơm ăn tơmoi chă lăng ƀrơ̆k jơhngơ̆m, atŭm hăm pơgơ̆r joh ayŏ kơdŏ soang ‘lơ̆ng hơ iă; đơ̆ng noh tơgŭm ăn bơngai lăng băt hlôh ƀôh hơdăh hlŏh dơ̆ng găh jơhngơ̆m đon ‘lơ̆ng kơ Ƀô̆ đô̆i Ƀok Hô; tơgop lang să dôm trong jang ‘nao, trong tơchăr hơ iă, iŏk đei jơnei pơđĭ lơ̆m khul ƀô̆ đô̆i.

Kơdră jang lơ̆m Hơnih tơm Chĭnh trĭ, Kơdră chĕp pơgơ̆r Ban Tuyên Giáo Trung ương Nguyễn Trọng Nghĩa tơbăt, đơ̆ng sơnăm 2021, Quân ủy Trung ương hlôi pơjing Tơdrong tơchơ̆t găh atŏk kơtang jơhngơ̆m đon ‘lơ̆ng “Ƀô̆ đô̆i Ƀok Hô”, iung jang kơtang tang găn jơhngơ̆m đon ưh kơ ‘lơ̆ng lơ̆m chăl hle. Đơ̆ng nơ̆r athei jang kiơ̆ ‘noh, truh dang ei khul ƀô̆ đô̆i bơ̆n roi năr roi pran kơtang hloh dơ̆ng, pơđĭ lơ̆m bơ̆ jang pơtho tơblăh, bơ̆ jang kơ chăng iung tơblăh, lơm choh jang sa. Hơnăp jang kơ khul bơ̆ jang păng mă kăl ‘noh jơhngơ̆m đon ‘lơ̆ng kơ Ƀô̆ đô̆i Ƀok Hô roi năr đei long, roi năr roi hơdăh ‘lơ̆ng lơ̆m rim tơdrong jang truh hloi lơ̆m vei lăng pơm tơ-‘ngla teh đak, adoi nhen tang găn tŏ ‘mi kial, pơrang jĭ pơrăm. Păng ƀô̆ đô̆i ling lang plang akou vă vei lăng tơdrong hơrih sa hơnŭk hơnoa, pran jăng grăng akou ăn kon pơlei. Rŏ năng vă sơkơ̆t hơdăh, Tơdrong tơchơ̆t đơ̆ng Quân ủy Trung ương găh “Jơhngơ̆m đon ‘lơ̆ng “Ƀô̆ đô̆i Ƀok Hô”, iung jang kơtang tang găn jơhngơ̆m đon kơnê̆ lơ̆m chăl hle” ‘noh Tơdrong tơchơ̆t gĭt kăl hloh tơgop tơ iung pơjing Ƀô̆ đô̆i pran kơjăp jăp kơtang găh chinh trĭ, atŏk kơtang nuih mơng pran kơtang, jơhngơ̆m pran kơtang iung tơblăh, jang keh đang dôm tơdrong đei pơjao.