Pơma tơ̆ hop akŏm, Kơdră chĕp kơ̆l Jơnŭm pơgơ̆r kon pơlei plt Hà Nội Nguyễn Ngọc Tuấn ăn tơbăt, Khul kơdră chĕp kơ̆l Jơnŭm pơgơ̆r kon pơlei plt hơnơ̆ng tơchĕng hơlen, chih iŏk dôm tơdrong kăl, trong jang đei yoa đơ̆ng Kuô̆k hô̆i, Anih chĕp kơ̆l pơgơ̆r Kuô̆k hô̆i; hơlen năng dôm trong jang đơ̆ng 1,2 dêh char, plt vă hơnơ̆ng tơ plih ‘nao, hơmet pơ ‘lơ̆ng tơdrong jang dăr lăng, mă tơpăt, đei yoa, trŏ ƀlep, ‘moi kiơ̆ dôm tơdrong hơgăt đơ̆ng luơ̆t păng tơdrong đei tơ̆ yăn âu đơ̆ng plt vă sek tơlang rim tơdrong: “Hà Nội hlôi tơlĕch tơdrong hơgăt găh dôm trong jang mưh bơ̆ jang kiơ̆ nơ̆r tơchơ̆t đơ̆ng dăr lăng, ‘nâu jĭ tơdrong đei tơpă tơ̆ yăn âu vă hơlen năng, pơtruh ăn anih jang kơpal nhen anih dăr hơlen kơ tĕh đak, Anih dăr hơlen kơ đảng păng dôm anih jang dăr hơlen vă set lăng, pơgơ̆r sek tơlang dôm tơdrong pơm glăi tih. Tơdrong jang kiơ̆ nơ̆r tơchơ̆t đơ̆ng dăr lăng kŭm jing tơdrong hơgăt vă anih jang hơlen năng rim kăn ƀô̆ păng hơlen năng tơdrong pơjei, pôk hơpăh”.

Pơngơ̆t hăm tơdrong pơgơ̆r tơƀâp bơngai tăh hla oei đei lơtrong jang ưh kơlăp, hơdrom băl, Bí thư đảng dêh char Long An, pơm hloi Kơdră Jơnŭm pơgơ̆r kon pơlei Nguyễn Văn Được pơma tơƀôh 1,2 tơdrong đei tơpă tơ̆ yăn âu mưh pơgơ̆r tơƀâp bơngai tăh hla, ‘nŏh jĭ: adrol sơ̆, tơdrong pơgơ̆r dôm 'măng tơƀâp bơngai tăh hla đơ̆ng dôm bơngai tang măt Kuô̆k hô̆i, bơngai tang măt Jơnŭm pơgơ̆r kon pơlei dêh char, apŭng, xăh đa pơgơ̆r hơdrô̆, kơdih ngăl. Tơdrong 'nâu tôch huach jơ năr: “Jăl jang ‘nâu, Khul kơdră chĕp kơ̆l Jơnŭm pơgơ̆r kon pơlei dêh char Long An tơchơ̆t tơmât hơdai dôm ‘măng tơƀâp bơngai tăh hla. Thoi nŏh, gô pơm tơjur ƀiơ̆ jên jang păng da ƀiơ̆ hiong lơ jơnăr. Tơdrong ‘nâu đei kon pơlei, bơngai tăh hla lơ̆m dêh char tôch tơgŭm”.

Phŏ kơdră chĕp kơ̆l Jơnŭm pơgơ̆r kon pơlei plt Đà Nẵng Nguyễn Thị Anh Thi ‘nŏh tơroi, plt Đà Nẵng bơ̆ jang pơlong năng tơdrong jang pơjing Khul kơdră pơgơ̆r tơring kơdrâm kiơ̆ Tơdrong tơchơ̆t đơ̆ng Kuô̆k hô̆i, kiơ̆ kơ ‘nŏh, 8 kuơ̆n păng 45 phương ưh đei Jơnŭm pơgơ̆r kon pơlei. Yoa thoi nŏh, tơdrong tơƀâp bơngai tăh hla kiơ̆ trong jang pơlong năng đơ̆ng Khul kơdră pơgơ̆r tơring kơdrâm kŭm đei tơplih ‘nao păng roi ‘lơ̆ng: “Tơdrong tơƀâp bơngai tăh hla mưh jang pơlong năng tơdrong jang pơjing Khul kơdră pơgơ̆r tơring kơdrâm kŭm đei tơplih ‘nao ‘năi. Mă hơdăh jĭ, Khul kơdră chĕp kơ̆l Jơnŭm pơgơ̆r kon pơlei pơgơ̆r đei yoa ‘lơ̆ng 3 tơdrong jang “Jơnŭm pơgơ̆r kon pơlei hăm bơngai tăh hla”. Kiơ̆ đơ̆ng nŏh, lơ tơdrong ưh kơlăp, dôm tơdrong tơtŏ đon tơ̆ plt tơtom sek tơlang, hơmet ming, pơm lăp hăm tơdrong ‘mĕh vă tôch tơgăl đơ̆ng bơngai tăh hla”.

Pơma tơ̆ hop akŏm, Kơdră Kuô̆k hô̆i Vương Đình Huệ akhan, sơnăm 2022, Kuô̆k hô̆i, Anih chĕp kơ̆l pơgơ̆r Kuô̆k hô̆i, dôm anih jang kơ Kuô̆k hô̆i, Jơnŭm pơgơ̆r kon pơlei jơ̆p tơring adrin tơplih ‘nao, pơm hơtŏk tơdrong ‘lơ̆ng, đei yoa đơ̆ng bơ̆ jang jô̆ hloi tơdrong chih pơjing luơ̆t, dăr lăng, tơchơ̆t dôm tơdrong gĭt kăl kơ tĕh đak păng tơ̆ tơring. Sơnăm 2023, Kơdră Kuô̆k hô̆i Vương Đình Huệ athei Jơnŭm pơgơ̆r kon pơlei dôm dêh char, plt bơ̆ jang ‘lơ̆ng 6 tơdrong jang tơm, lơ̆m nŏh đei, tơchĕng hơlen, hơmet ming, chih tơmât dơ̆ng vă gơ̆h bơ̆ jang hrơ̆ch ‘lơ̆ng dôm trong jang ‘nao đơ̆ng Đảng, tĕh đak, mă loi jĭ dôm tơdrong tơchơ̆t đơ̆ng Anih tơm Chinh trĭ găh jang atŏk tơ-iung mŭk drăm, tơpôl tơ̆ dôm tơring.

Pơjing păng pơgơ̆r bơ̆ jang dăr lăng lơ̆m sơnăm 2023 mă lăp, kơjăp ‘lơ̆ng păng đei yoa, jang ‘lơ̆ng tơdrong dăr lăng tơdrong chĕp kơ̆l pơgơ̆r tơ̆ tơring, tang găn xa pơjĭp, pơm glăi, pơhuach kư̆ kă. Mă loi, sơnăm 2023, Kuô̆k hô̆i păng Jơnŭm pơgơ̆r kon pơlei vă pơgơ̆r iŏk kơphĭu lui dăh mă ưh hăm dôm bơngai jang kơchư̆k yoa Kuô̆k hô̆i, Jơnŭm pơgơ̆r kon pơlei pôk hơtŏk păng kĭ ăn. Anih tơm Chinh trĭ ‘nao tơlĕch tơdrong hơgăt kơsô̆ 96 găh tơdrong iŏk kơphĭu lui dăh mă ưh hăm dôm kơchư̆k chĕp kơ̆l pơgơ̆r, vei lăng lơ̆m rim anih jang chinh trĭ: “Athei Jơnŭm pơgơ̆r kon pơlei pơgơ̆r bơ̆ jang mă ‘lơ̆ng Tơdrong hơgăt kơsô̆ 96, dôm hla ar chih đơ̆ng Kuô̆k hô̆i, Anih chĕp kơ̆l pơgơ̆r Kuô̆k hô̆i, năng tơdrong iŏk kơphĭu lui dăh mă ưh ‘nŏh jĭ tơdrong jang gĭt kăl vă bơ̆ jang, đơ̆ng nŏh, pơjing trong jang mă lăp ‘lơ̆ng, rơđăh rơđong vă pơgơ̆r bơ̆ jang kiơ̆ ‘lơ̆ng hơ-iă, ưh gơ̆h jang vă pơtrŏ đĕch”.

Jơnŭm pơgơ̆r kon pơlei athei iŏk jang hơnăp jang gĭt kăl lơ̆m tơdrong tơplih ‘nao trong vei lăng tơ̆ tơring kiơ̆ trong jang rơgei, đei yoa, akŏm jơhngâm vei lăng, atŏk tơ-iung; jang kiơ̆ ‘lơ̆ng khôi luơ̆t tơm păng rim kơ luơ̆t, pơm hơtŏk tơdrong rơđăh rơđong, hơtŏk hơnăp tơl tơblang păng tơdrong vang jang đơ̆ng kon pơlei; tơgop pơjing anih jang vei lăng pơvih pơvăn ăn kon pơlei, kon pơlei pơm tơm, jang kiơ̆ luơ̆t, gơ̆h hơgei, đei yoa, rơgŏh ‘lơ̆ng, rơđăh rơđong, hơnơ̆ng pơm hơtŏk jơhngâm đon pơvih ăn kon pơlei păng pơjing tơdrong ‘lơ̆ng hơ-iă, hiôk hian ăn anih tĕch mơ dro jang xa.