Tơ̆ hop akŏm mă 4, Kuô̆k hô̆i ‘măn lơ jơnăr pơma nuh găh lơ tơdrong păng dôm tơdrong jang đei kiơ̆ trong jang atŏk tơiung mŭk drăm, tơpôl, thu mong, tơlĕch jên jang kơ tĕh đak. Pơma pơtôch hop akŏm, Kơ dră Kuô̆k hô̆i Vương Đình Huệ chơt hơiă, tơchĕng ‘lơ̆ng dôm tơdrong jơnei gĭt kăl, ‘lơ̆ng hơiă, tôm tơdrong jô̆ hloi găh jang atŏk tơiung mŭk drăm, tơpôl; vei sơđơ̆ng tĕh đak; vei sơđơ̆ng tơdrong arih xa tơpôl; vei lăng năng tông bơngai đei kŏng.

Kiơ̆ đơ̆ng chă mơ̆ng, lăng Hop akŏm âu ki lơ̆m Radio, tivi, ƀok K’Tân (bơngai K’Ho) tơ̆ xăh Đạ Đờn, apŭng Lâm Hà, dêh char Lâm Đồng pơma: “Brei drou, kon pơlei apŭng Lâm Hà mơ̆ng, lăng Kuô̆k hô̆i hop akŏm mă 4, Kuô̆k hô̆i jăl 15. Lơ tơdrong ‘mĕh vă đơ̆ng kon pơlei đei Kuô̆k hô̆i pơma nuh, tơrĕk truh. Kiơ̆ đơ̆ng nŏh tơgŭm ăn kon pơlei kon kông jang tŏk mŭk drăm, đei trong tơgŭm găh jên khei ăn kăn ƀô̆ bơngai kon kông tôch ‘lơ̆ng. Kuô̆k hô̆i hôp ‘măng mă âu pơma nuh găh lơ tơdrong tôch lăp đon kon pơlei, kon pơlei tôch hơiă păng hơpơi ‘mĕh pơm thoi yơ vă tơrĕk truh tơdrong tơgŭm ăn kon pơlei kon kông lơ ƀiơ̆ lơ̆m tơdrong hŏk pơ hrăm, pơih lăm pơtho ki thuơ̆t pơtăm ‘long chĕh phe, tiu, điêu, ‘long mắc ca, rong nhŭng, kơpô, rơmo....”

Pơtôch hop akŏm hơtuch sơnăm 2022, Kuô̆k hô̆i athei Anih chĕp kơ̆l pơgơ̆r Kuô̆k hô̆i, Khul kơdră tĕh đak, Thủ tướng tĕh đak, Anih vei lăng hơdrĕch kon kông, dôm anih jang kơ Kuô̆k hô̆i, rim anih jang kơpal jăh pơgơ̆r tơlĕch jang kiơ̆ dôm tơdrong tơchơ̆t hlôi đei Kuô̆k hô̆i drơ̆ng nơ̆r. Dôm bơngai tang măt Kuô̆k hô̆i jăh pơgơ̆r tơƀâp bơngai tăh hla vă roi tơbăt rim tơdrong iŏk đei lơ̆m hop akŏm, vei kơjăp tơdrong pơvei, răp mơ̆ng, roi tơƀôh mă trŏ nơ̆r pơma păng đon hơpơi ‘mĕh đơ̆ng bơngai tăh hla. Rim anih jang adrin bơ̆ jang mă ‘lơ̆ng dôm trong jang vei sơđơ̆ng tơdrong arih xa tơpôl, vei lăng tơdrong arih xa găh tơmam drăm păng jơhngâm đon ăn kon pơlei; hơmet mă ‘lơ̆ng rim tơdrong vă pơvih ăn kon pơlei sơng sơnăm ‘nao 2023 păng Tết Nguyên đán Quý Mão. Tơ̆ jơ tơƀâp bơngai tăh hla đơ̆ng rŏng hop akŏm mă 4, Kuô̆k hô̆i jăl 15, ƀok Pang Ting Brăng (bơngai K’Ho) tơ̆ Kueng kơphô̆ 1, thĭ trơ̆n Lạc Dương, apŭng Lạc Dương, dêh char Lâm Đồng akhan, dôm ‘măng Hop akŏm Kuô̆k hô̆i hơnơ̆ng pơma nuh găh tơdrong tơgŭm, trong pơgơ̆r jang kơna kon pơlei đei xa yoa tôm tơdrong tơgŭm. Kiơ̆ đơ̆ng dôm ‘măng tơƀâp bơngai tăh hla, kon pơlei roi tơbăt, đei dôm bơngai tang măt Kuô̆k hô̆i chih iŏk, tơlĕch pơma nuh. Dôm tơdrong tơgŭm ‘nŏh tŏk bŏk mât lơ̆m tơdrong arih xa rim năr.

Ƀok Pang Ting Brăng ăn tơbăt: “Dang ei, Tĕh đak hơnơ̆ng yak hơdoi hăm kon pơlei, ling lang đei trong tơgŭm ăn kon pơlei jang chŭn mir. Mă hơdăh, tơ̆ tơring pơih đei lơ lăm hŏk pơhrăm găh khoa hŏk ki thuơ̆t, vă kon pơlei jang chŭn mir băt trong jang kiơ̆ Khoa hŏk ki thuơ̆t ‘nao mưh rei pơtăm, rong kon tơrong. Dôm bơngai pơnam vang kiơ̆ hŏk tơ̆ dôm lăm ‘nŏh păng jang kiơ̆ dôm tơdrong đei hŏk pơhrăm, ưh jor gô jang xa đei iŏk yoa kơjăp. Roi đunh jang roi ‘lơ̆ng, tơmam jang đei kŭm ‘lơ̆ng ƀiơ̆ đơ̆ng nŏh tĕch mơdro kŭm ƀônh hlot ƀiơ̆”.

Đơ̆ng rŏng kơ hop akŏm mă 4, Kuô̆k hô̆i jăl XV, hơtuch khei 11/2022 âu ki, Anih chĕp kơ̆l pơgơ̆r Kuô̆k hô̆i hop akŏm mă 17, drơ̆ng nơ̆r klăih song jên jang iŏk đơ̆ng jên trung ương vă bơ̆ jang đơ̆ng 2021-2025 ăn 3 Tơdrong jang tơm kơ teh đak. Lơ̆m nŏh, Tơdrong jang tơm kơ tĕh đak atŏk tơiung mŭk drăm, tơpôl tơ̆ tơring kon kông păng groi kông đei văjê̆ 2.500 ti hlak jên; Tơdrong jang tơm kơ tĕh đak tơjur tơnuh hin kơjăp ‘lơ̆ng đei 2.000 ti; Tơdrong jang tơm kơ tĕh đak pơjing tơring tơrang ‘nao ‘nŏh 3.000 ti hlak jên. ‘Nâu jĭ tơdrong tơgŭm đei lơ bơngai tăh hla tơ̆ tơring Tây Nguyên tôch tơrĕk.

Ƀok K’Khét Atô – Phŏ Kơdră Anih vei lăng hơdrĕch kon kông dêh char Dak Nông pơma hơdăh: “Găh tơdrong jang tơm kơ tĕh đak mă 3 âu ‘nŏh jĭ 1 tơdrong jang tôch tih. Hrei ‘nâu tơ̆ Dak Nông oei bơ̆ jang trŏ trong jang đơ̆ng Kuô̆k hô̆i păng Khul kơdră tĕh đak tơlĕch, nhôn pơgơ̆r bơ̆ jang tôch ai. ‘Nâu jĭ 1 tơdrong jang đei kon pơlei gô chang, yoa ‘nâu jĭ trong jang trŏ đon Đảng, lăp jơhngâm kon pơlei. Hrei ‘nâu hlôi đei 10 tơdrong jang đei Thủ tướng tĕh đak kĭ ăn. Pơtih gia, Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char, đei tơdrong jang pơtho ăn kon pơlei tơ̆ dôm pơlei pơla jang atŏk tơiung chă tơmang lăng lơ̆m tơpôl, chĕp vei kơjăp dôm tơdrong juăt ‘lơ̆ng tơ̆ tơring kơdih”.

Vă bơ̆ jang 3 Tơdrong jang tơm ‘nâu, dêh char Dak Nông vă tơlĕch hlŏh 1.000 ti hlak jên, bơ̆ jang dôm tơdrong jang: pơjing tơring tơrang ‘nao; atŏk tơiung mŭk drăm, tơpôl tơ̆ tơring kon kông păng groi kông păng tơjur tơnuh hin kơjăp ‘lơ̆ng.

Hăm dôm trong jang tôch trŏ đơ̆ng Kuô̆k hô̆i, Khul kơdră tĕh đak, dôm dêh char Tây Nguyên hơmĕng sơnăm 2023 păng dôm sơnăm đơ̆ng rŏng dơ̆ng gơ̆h đei tơdrong ‘lơ̆ng vă jang tŏk pran kơjăp, vă Tây Nguyên gơ̆h jang tŏk hơdoi hăm tĕh đak.