Truh dang ei, hăm bơ̆ jang pơtrui tơchă rôp kơtang đơ̆ng khul bơ̆ jang, atŭm hăm tơdrong hơdrin chă pơrô̆ pơrôp, pơtho khan, pơtrui dăr joang, vei lăng sơđơ̆ng đơ̆ng kyul kơdră tơring, tơdrong hơrih sa sơđơ̆ng dơ̆ng kơjăp vih hơlơ̆k dơ̆ng hăm apŭng Cư Kuin, dêh char Đak Lăk.

Năm dơ̆ng tơ̆ Ea Ktur đơ̆ng rŏng đei tơdrong 3 năr, kon pơlei lơ̆m tơring hlôi vih hơlơ̆k hăm tơdrong oei sa hiôk hian nhen so. ‘Moi kiơ̆ trong glung đơ̆ng tơring năm truh rim pơlei pơla, tơdrong hơrih sa vih hơlơ̆k dêl so dơ̆ng. Hnam tĕch mơdro plôih ‘măng tĕch mơdro tơmam drăm dơ̆ng. Vă vei lăng sơđơ̆ng dơ̆ng kơjăp ăn kon pơlei, dêh char Đak Lăk hlôi pơjing rim hơnih gak vei lăng prăt măng prăt năr (24/24 jơ). Đơ̆ng tơdrong au kơna mă pơm ăn kon pơlei sơđơ̆ng jơhngơ̆m hơrih sa.

Pơgĕnh ‘năr rơvơn, ƀok Ngô Văn Hồng (thôn 22, tơring Ea Ning, apŭng Cư Kuin) hơgŭr chă jang hơmet ăn pơtăm chehphe. Tơdăh ưh kơ đei tơdrong lei tơdrong jang au ŭnh hnam đĭ jang đang dôm năr kơ au bơih, mă lei kơ yuơ đei tơdrong kơna pơdơ̆h jang kơ yuơ mir pơgar ŭnh hnam au lơ̆m groi teh kơ tơring Ea Ktur. Đơ̆ng rŏng đei tơdrong khul đei phao kơtoang năm tơdrŭt lơ̆m hơnih bơ̆ jang ƀar tơring Ea Tiêu păng Ea Ktur, ŭnh hnam măh pơdơ̆h năm tơ̆ mir, kơ yuơ hli. Mă lei, mư̆h ƀôh dôm tơdrong bơ̆ jang đĭ ai đơ̆ng rim khul bơ̆ jang păng hăm tơdrong bơ̆ jang pơrô̆ pơrôp ‘lơ̆ng hơ iă đơ̆ng khul kơdră tơring, ƀok mă sơđơ̆ng jơhngơ̆m iung năm jang mir dơ̆ng.

Ƀok Ngô Văn Hồng tơbăt: "Đơ̆ng rŏng pơm tơdrong chư̆ kơnê̆ đơ̆ng khul đei phao kơtoang lơ̆m gơmăng năr 11/6, kon pơlei tôch tăr văr, hli hlơt. Mă lei truh dang ei, lăng ƀôh khul ƀô̆ đô̆i kŏng ang năm pơtrui druh rôp kơtang, kơdră tơring chă pơrô̆ pơrôp, pơtho khan, tơbăt kơtơ̆ng ang tơtom dôm tơdrong kiơ̆ lơ̆m al loa kơna kơ dih ba adoi nhen kon pơlei lơ̆m pơlei pơla sơđơ̆ng jơhngơ̆m. Hăm tơdrong nhen dang ei, kon pơlei nhôn sơđơ̆ng jơhngơ̆m păng vih hơlơ̆k hơrih sa hiôk hian nhen đêl".

Jei plôih dơ̆ng ‘măng hơnih tĕch mơdro vă tĕch mơdro tơmam drăm pơyua ăn choh jang sa, kmăi ot ƀa ăn kon pơlei đơ̆ng rŏng tang ‘măng vă vei lăng năng tông ăn ŭnh hnam, mŏ Nguyễn Thị Anh, tơring Ea Ktur oei tăr văr đĕch. Hnam tĕch mơdro mŏ lơ̆m trong tơm, hơtăih Hơnih bơ̆ jang tơring Ea Ktur dang 1km.Lơ̆m pơgê năr 11/6, mư̆h kơtơ̆ng tơdrong au, ŭnh hnam tôch tăr văr, ưh kơ pơ̆n plôih ‘măng tĕch mơdro hloi. Truh dang ei, ‘moi kiơ̆ chă lăng kơtơ̆ng ang au to băt dôm tơdrong hlôi đei khul bơ̆ jang vei lăng năng tông sơđơ̆ng kơna ŭnh hnam mă pơ̆n plôih ‘măng tĕch mơdro tơmam drăm dơ̆ng.

Mŏ Nguyễn Thị Anh tơbăt, lăp đơ̆ng rŏng đei tơdrong, gơnơm khul kơdră tơring, ƀô̆ đô̆i kŏng ang vei lăng năng tông pơlei pơla kơna ŭnh hnam mŏ păng kon pơlei tăp dăr sơđơ̆ng jơhngơ̆m plôih ‘măng tĕch mơdro tơmam drăm, năm jang tơ̆ mir dơ̆ng. Mă kăl, mư̆h khul ƀô̆ đô̆i, kŏng ang năm pơtrui tơchă rôp đei mĭnh ƀar ‘nu bơngai pơm yoch ‘nŏh, kon pơlei mă dă ƀiơ̆ tăr văr, hli hlơt, sơđơ̆ng jơhngơ̆m ƀiơ̆.

Tơdrong pơm kơnê̆ đơ̆ng khul đei phao kơtoang, săng đao năm tơdrŭt lơ̆m Hơnih bơ̆ jang vei lăng kon pơlei ƀar tơring Ea Tiêu păng Ea Ktur hlôi pơm ăn jơhngơ̆m đon kon pơlei oei tơ̆ apŭng Cư Kuin tôch kơ blĕk. Mục sư Ae Smit (oei krao akhan Y Djan Eban, 73 sơnăm, oei tơ̆ buôn Kniết, tơring Ea Ktur, apŭng Cư Kuin, dêh char Đăk Lăk) tơbăt jơhngơ̆m đon : "Kiơ̆ kơ ĭnh ƀôh ‘noh mĭnh tơdrong pơm kơnê̆ tê̆ hloh, đơ̆ng ‘lơ̆p tơ̆p tơ̆ kră dang ei tim biơh ƀôh kơna hli tơpă mơ̆n".

Vă rim pơlei pơla tơ̆ ƀar tơring Ea Tiêu, Ea Ktur kơ apŭng Cư Kuin, dêh char Đắk Lắk hrôih vih hơlơ̆k hơrih sa sơđơ̆ng dơ̆ng kơjăp nhen so, khul ƀô̆ đô̆i kŏng ang dêh char, kơdră chĕp pơgơ̆r apŭng, tơring hlôi gak vei lăng prăt măng prăt năr, kơrŭn đĭ jơhngơ̆m tơchă rôp dôm bơngai pơm tơdrong. ‘Ngoăih kơ ‘noh, hăm lơ trong jang pơrô̆ pơrôp, pơm pơ ‘lơ̆ng jơhngơ̆m đon kon pơlei, lăp đơ̆ng rŏng 3 năr đei tơdrong, tơdrong hơrih sa sơđơ̆ng dơ̆ng kơjăp hlôi vih hơlơ̆k hăm rim pơlei pơla kơ ƀar tơring au dơ̆ng.

Ƀok Nguyễn Kim May, Kơ iĕng Kơdră chĕp pơgơ̆r Đảng, Kơdră chĕp pơgơ̆r Hơnih bơ̆ jang vei lăng kon pơlei tơring Ea Ktur, apŭng Cư Kuin, dêh char Đăk Lăk tơbăt, dang ei, tơdrong hơrih sa păng jơhngơ̆m đon kon pơlei lơ̆m 19 pơlei hlôi sơđơ̆ng, vih hơlơ̆k hơrih sa sơđơ̆ng nhen đêl đơ̆ng năr 12/6.

Vă kon pơlei  sơđơ̆ng jơhngơ̆m đon hơrih sa, jang sa, mơdro sa lăp đơ̆ng rŏng đei tơdrong, tơring hlôi pơrô̆ pơrôp, pơtho khan, tơbăt ăn rim khul jang chinh trĭ rim pơlei pơla păng kon pơlei găh tơdrong bơ̆ jang đơ̆ng vei lăng năng tông kơjăp iăp kơtang đơ̆ng khul bơ̆ jang; hơlêm kon pơlei ‘nĕ chă tăr văr, hul hơl jơhngơ̆m đon păng hlôi athei kon pơlei, tơdăh ưh kơ đei tơdrong kăl lei ‘nĕ chă lĕch tơ̆ ‘ngoăih lơ̆m gơmăng păng pơgê hrôih; atŏk jơhngơ̆m đon kơchăng lơ̆m kon pơlei, krao hơvơn kon pơlei, tơdăh ƀôh đei tơdrong hlĭch ‘nŏh năm tơroi ăn kơdră tơring dăh mă hơnih bơ̆ jang băt hloi vă tơtom iung jang vei lăng sơđơ̆ng.

‘Ngoăih tơdrong chă pơrô̆ pơrôp, pơtho khan đơ̆ng kơdră tơring, rim hnam hơkŭm jei hơdrin chă pơtho khan vă kon pơlei sơđơ̆ng jơhngơ̆m, tơgŭm ăn kon pơlei hrôih vih hơlơ̆k hơrih sa hiôk hian nhen so. Mục sư Ae Smit tơbăt, khei năr kơnh, lơ̆m rim ‘măng hơkŭm, nhôn jei vă pơtho khan ăn kon pơlei oei sa ‘lơ̆ng hơ iă, pơm lơ liơ oei sa ‘lơ̆ng hơ iă, lui kơ jăp păng ‘mêm kơ eng teh đak. Tơdrong hơdrin jang kiơ̆ keh đang tơdrong jang mă Đảng păng Teh đak pơjao ăn; pơm kiơ̆ ‘lơ̆ng nơ̆r athei jang kiơ̆, trong bơ̆ jang đơ̆ng kơdră chĕp pơgơ̆r tơring tơlĕch ăn.