Bơngai tang măt Hà Ánh Phượng, khul Phú Thọ tơbăt, tơdrong pơtho pơhrăm sơnăm 2018 hơnơ̆ng atŏk tơ iung ‘lơ̆ng, trŏ lăp hăm tơdrong ‘meh vă kơ Tơdrong tơchơ̆t 88 đơ̆ng Kuô̆k hô̆i tơlĕch ăn. Mă lei, bơngai tang măt Hà Ánh Phượng tơtăm hăm tơdrong vă pơjing ‘măng mă 2 kơ Tơdrong tơchơ̆t sơkơ̆t hơdăh rơ̆ih kơsơ̆p hla bơar hŏk lơ̆m rim hnam trương pơtho pơhrăm jăl ƀar pêng. Kiơ̆ kơ ‘noh, mĭnh hnam trương pơtho pơhrăm pơjing 1 khul rơ̆ih kơsơ̆p hla bơar pơtho pơhrăm. Tơchơ̆t lơ loh oei đei lơ tơdrong ưh kơlăp: “Mă blŭng, lơ hơnih pơtho pơhrăm lơ̆m yan au lăp đei mĭnh truh ƀar ‘nu ƀok thây kô kơ mĭnh môn hŏk. Lơ̆m mă noh, kơsô̆ kơloăi kơsơp hla bơar hŏk ‘noh jĭ tôch kơ lơ. ‘Nau jĭ mĭnh tơdrong jang tôch gleh hrat păng tơdrong trŏ lăp tim mă tơpă kơ yuơ tơdrong gơ̆h hơgei kơ đe ƀok thây kô ưh kơ lei lăi dih băl. Mă ƀar, kiơ̆ kơ ĭnh tơdrong au gô pơm tơnap tap lơ̆m pơtruh ăn dăh mă hŏk pơhrăm ming ăn ƀok thây kô pơtho iŏk yua kơsơ̆p hla bơar hŏk hle, mă kăl ‘noh pơm tơnap tap ăn hŏk tro mưh chă hŏk ming dơ̆ng dăh mă năm hŏk tơ̆ hnam trương anai”.

Kiơ̆ đơ̆ng bơngai tang măt Trần Văn Sáu, khul Đồng Tháp, Tơdrong tơchơ̆t 88 sơkơ̆t hơdăh, Hơnih tơm vei lăng Hnam trương pơtho pơhrăm pơgơ̆r chih tơlĕch mĭnh kơsơ̆p hla bơar pơtho pơhrăm. Kơsơ̆p hla bơar au đei hơlen, kĭ tơchơ̆t hơtŏ dih băl hăm rim kơsơ̆p hla bơar hŏk kơ yuơ hơnih jang, bơngai nai pơm tơlĕch. Tơƀôh hơdăh Tơdrong tơchơ̆t 88 đei pơjing lơ̆m sơnăm 2014, truh sơnăm 2020 mă đei Tơdrong tơchơ̆t 122, bơngai tang măt Trần Văn Sáu tơlĕch nơ̆r apĭnh 6 sơnăm, kơ yuơ kă kiơ Hơnih tơm vei lăng Hnam trương pơtho pơhrăm ưh kơ pơm kiơ̆ Tơdrong tơchơ̆t au? Lơ̆m mă noh, tă pơm hơtŏk đĭ đăng tơdrong jang chih, pơm tơlĕch kơsơ̆p hla bơar hŏk kiơ̆ trong tơpôl vang pơjing, đơ̆ng noh pơm ăn truh vei lăng ưh kơ kĕ kơsơ̆p hla bơar hŏk, kơjă tŏk măt kơtang: “Đảng krao hơvơn tơpôl vang iung jang lơ̆m tơdrong pơtho pơhrăm, mă lei Teh đak kăl vei kơjăp hơnăp jang tơm hloh lơ̆m pơtho pơhrăm. ‘Nĕ lê̆ đei tơdrong pơgơ̆m tơdrong tơpôl vang iung jang mă vă tĕch mơdro kơsơ̆p hla bơar hŏk pơhrăm. Yan au đei ƀôh, tơ̆ rim tơdrong jang ayơ mưh tơpôl vang iung jang jei tơjur kơjă, hơdrô̆ kơsơ̆p hla bơar hŏk mưh tơpôl vang iung jang ‘nŏh tă pơm ăn kơjă tŏk măt kơtang hloh dơ̆ng. ‘Nau jĭ mĭnh tơdrong hơdrơ̆k păng ưh kơ đei trong ayơ khan vă pơm kĕ kơsơ̆p hla bơar hŏk ưh kơtŏk măt dơ̆ng.”

Kơdră chĕp pơgơ̆r Hơnih tơm vei lăng Hnam trương pơtho pơhrăm Nguyễn Kim Sơn tơblang hơdăh:“Rim kơdră tang măt lăng ba kơjăp truh tơdrong tơchơ̆t đơ̆ng Khul bơ̆ jang dăr lăng ‘noh pơjao ăn Hơnih tơm vei lăng Hnam trương pơtho pơhrăm hơmet pơtruh ăn Kuô̆k hô̆i dôm trong jang đei ƀơm truh tơdrong chih tơlĕch, pơm tơlĕch kơsô̆p hla bơar hŏk pơhrăm. Nhôn tơchĕng lơlau đơ̆ng dang ei truh sơnăm 2024 tơdrong kăl hloh ‘noh iung jang hơdrol găh tơdrong hơlen ‘lơ̆ng kơsơ̆p hla bơar lăm 5, lăm 9, lăm 12 mă ‘lơ̆ng, sơđơ̆ng măh mai kơsơ̆p hla bơar hŏk hơdrol sơnăm hŏk ‘nao, găh tơdrong đei pơjao ‘noh nhôn gô tơchĕng hơlen hơdrin lơ̆m 2 sơnăm kơnh, mư̆h trong tơlĕch ‘nao kơsơ̆p hla bơar hŏk jang keh đang lei gô đei pơgơ̆r lăng hơlen mă brĕ hloh dơ̆ng păng tơlĕch trong jang hăm Kuô̆k hô̆i đơ̆ng rŏng”.

Hop akŏm Kuô̆k hô̆i jei pơma dơnuh kơtang hăm dôm nơ̆r chă pơma dơnuh đei ƀơm truh găh tơdrong bơ̆ jang pơgang. Rim bơngai tang măt tơƀôh hơdăh, lơ̆m khei năr au ki oei đei tơdrong pơm hiơ hiơ̆ pơtruh ăn pơgang. Tơdrong pơgơ̆r tơchă hơnih tĕch răt, răt pơgang hlôi đei bơ̆ jang ‘lơ̆ng mă lei tơdrong chă tĕch răt tơmam drăm jang pơgang ‘noh tôch mơmat tat. Mơmat tat hloh hrei au ‘noh, răt ưh kơ đei tơmam drăm ‘lơ̆ng păng atŏk tơ iung đei tơdrong kih thuơ̆t ‘nao. Tơdrong kon pơlei tơpoh jĭ ung thư roi lơ ... Bơngai tang măt Nguyễn Tri Thức, Khul pơlei tơm Hồ Chí Minh pơma hơdăh:“Ĭnh apĭnh Kuô̆k hô̆i, Khul kơdră chĕp pơgơ̆r Teh đak lăng ba kơtang hloh dơ̆ng 2 Hơnih tơm xă trĭ proton tơ̆ Hà Nội păng pơlei tơm Hồ Chí Minh vă kon pơlei Việt Nam đei chă ming hơmet jĭ jăn kiơ̆ rim trong jang kih thuơ̆t gơ̆h hơgei hloh kơ apŭng plĕnh teh. Bơ̆n đei mĭnh tơdrong tôch rơvơn, rim ƀak si tŏk bŏk bơ̆ jang lơ̆m Tơdrong jang ming hơmet xă trĭ tơ̆ Hà Nội păng pơlei tơm Hồ Chí Minh gơ̆h chă ming hơmet jĭ jăn kiơ̆ kih thuơ̆t au đơ̆ng rŏng 6 khei đei hŏk pơhrăm tơ̆ teh đak đe”.

Iung pơma tơblang hơdăh, Kơdră chĕp pơgơ̆r Hơnih tơm vei lăng jang pơgang Đào Hồng Lan tơbăt: tơdrong tơm mă kăl kơ yuơ hơnih tĕch mơdro pơgang ming hơmet au lơ̆m apŭng plĕnh teh hui kơ đei, kơjă tŏk măt pơ đĭ lơ̆m plei teh ... Hơnih tơm tŏk bŏk hơdrin tơchă trong vă hơmet pơ ‘lơ̆ng dôm tơdrong tim mă trŏ lăp găh ưh kơ măh pơgang, kmăi kmŏk jang pơgang lơ hơnih jang pơgang. Đei rim trong jang tơgum djru hăm dôm tơdrong tơhlăk tơhlĭn lơ̆m tơlĕch jang kiơ̆. Găh trong vă jang lơ̆m khei năr kơnh, Kơdră chĕp pơgơ̆r Hơnih tơm vei lăng jang pơgang Đào Hồng Lan tơbăt, gô iung jang hơdoi hăm rim tơring, rim hơnih jang pơgang tơring vă dăr lăng hơlen rim tơdrong tơhlăk tơhlĭn đei ƀơm truh tơdrong pơm sơđơ̆ng pơgang, kmăi kmok jang pơgang vă sek tơlang kiơ̆ hơnăp gơ̆h jang.