VOV4.Bahnar - Iung pơma tơ̆ hop akŏm mă 2 kơ Jơnŭm chĕp pơgơ̆r Pơlong-Pôk hơpăh Trung ương pơgơ̆r pơgê năr 14/4, Thủ tướng Tĕh đak Phạm Minh Chính athei, tơdrong pơgơ̆r jang pơting dĭh băl ‘nŏh kăl tơpă iŏk đei kơ jăp păng tơpă đei jing đơ̆ng kon pơlei. Bơ̆ jang pơting dĭh băl pôk hơpăh kăl hơdrin hlŏh dơ̆ng, tơchăr mă brĕ, yak ƀlep trong, tơgŭm jang kiơ̆ jơnei Tơdrong tơchơ̆t Pơm lêh hop akŏm kơ Đảng ‘măng mă XIII, rim tơdrong tơchơ̆t kơ Trung ương, Kuô̆k hô̆i, Khŭl kơdră tĕh đak, kơ rim hơnĭh bơ̆ jang Đảng. Hơdrin tơchă ƀô̆h, pôk pơ ư rim khŭl, rim bơngai jang ‘lơ̆ng lơ̆m tang găn jĭ hơbuh Covid-19, tang găn sa pơgơ̆m pơjĭp, brăh brư, dôm bơngai gơ̆h hơgei lơ̆m bơ̆ jang, chŏh jang sa, hŏk pơhrăm vă lang să hlŏh dơ̆ng. Thủ tướng pơma hơdăh, rim tơdrong jang pơting dĭh băl kăl tơgop lơ̆m atŏk kơtang xut xa pơ đĭ 100.000 pơbŭng hnam hnăt hnot tơ̆ pơ đĭ 74 apŭng dơnŭh hăm kon jên jang tĕh đak păng chă hơvơn tơpôl, lơ̆m au iung jang hơdrol ăn rim bơngai đei iŏk yua ăn tĕh đak, ŭnh hnam đei iŏk yua ăn tĕh đak, tơring kĕch mang sơ̆, dôm tơring tơnap tap hlŏh.

Tơblơ̆ nơ̆r: Amazưt