Mưh đei apinh găh tơdrong kăl đơ̆ng 3 tơdrong jang tơm kơ teh đak, pơjing tơring tơrang ‘nao, tơjur tơnuh hin kơjăp ‘lơ̆ng păng jang tŏk tơiung mŭk drăm tơ̆ tơring kon kông păng groi kông oei tơlĕch jang, lơ bơngai akhan ‘nâu jĭ dôm tơdrong tơchơ̆t tôch ‘lơ̆ng đơ̆ng Quốc hội vă pơih trong ăn kon pơlei tŏk klăih đơ̆ng tơnuh hin, dar deh jang tŏk kơtă lơ̆m groi teh tơ̆ pơlei pơla kơdih.

Ƀok Hoàng Nhị Sơn, Bí thư đảng apŭng Xín Mần, dêh char Hà Giang tơroi, đơ̆ng jên tơdrong jang Tơjur tơnuh hin, tơdrong jang tơm kơ teh đak, tơring hlôi pơjing đei lơ kơjă kăp gĭt ‘nao kiơ̆ trong jang pơm tơlĕch tơmam drăm: “Tơ̆ apŭng âu tôch pơmat tat, kơna nhôn athei chă trong sơng dôm anih tĕch mơdro vă tơlĕch trong jang pơm hơtŏk kơjă tơmam đơ̆ng choh jang xa, kiơ̆ tơdrong jang tơjur tơnuh hin, tơdrong jang tơm kơ teh đak. Hrei ‘nâu nhôn hlôi đei trong jang pơtăm hla ƀei ƀum, trong jang găh tơƀăng, trong jang rong ka tơ̆ đak tơngiĕt, pơtăm ‘long hla che, plei ‘long, pơm hơmet ‘nhĕm nhŭng, ‘nhĕm rơmo, dang ei hơnơ̆ng đei anih tĕch mơdro jang hơdoi hăm kon pơlei tôch ‘lơ̆ng.”

Tơdrong iŏk đei đơ̆ng rŏng hlŏh 2 sơnăm bơ̆ jang 3 tơdrong jang tơm kơ teh đak găh pơjing tơring tơrang ‘nao, tơjur tơnuh hin kơjăp ‘lơ̆ng, jang atŏk tơiung mŭk drăm, tơpôl tơ̆ tơring kon kông păng groi kông đei ƀôh tôch ‘lơ̆ng, gơ̆h lăng ƀôh hăm tơdrong čhôk ‘nă roi tŏk đơ̆ng kon pơlei. Mă lei kiơ̆ tơdrong dăr hơlen ‘nao âu đơ̆ng Khul dăr lăng kơ Quốc hội tơroi lơ̆m Hop akŏm mă 6 Quốc hội jăl 15, ‘nŏh tơdrong pơgơ̆r bơ̆ jang dôm tơdrong jang tơm kơ teh đak tơ̆ lơ tơring oei tam mă lăp păng tơƀgâp lơ pơmat tat, nhen jang hiơ̆ hyĭn, hơnơ̆ng kơ tơhlăk, pơduinh tam mă băt hơdăh vă tơlĕch jang thoi yơ.

Ƀât lăp đei tơring tơlĕch jang dôm tơdrong jang âu, đe kăn ƀô̆ pŭ iŏk nơ̆r “kăn ƀô̆ hơngăh ƀơ̆r hoh” tơ̆ hơnăp kon pơlei, nhen thoi Phŏ Kơdră vei lăng kon pơlei xăh Thượng Trạch, apŭng Bố Trạch, Quảng Bình Nguyễn Trường Chinh: “Hơngăh vă pơm hnam. Sơnăm 2022 hơngăh, 2023 oei hơngăh dơ̆ng (hiek). Dang ei hnam oei, đei tơgŭm jên man 44 triu, mưh tŏk iŏk kiơ̆ tơdrong Hơgăt 28 ‘nŏh kon pơlei tơ̆ âu tŏk iŏk ưh gơ̆h, hli ưh kơ đei jên kla. Hnam đơ̆ng apŭng pơm tơƀôh đĭ truh 130 triu bơih, kơjă thoi noh pơmat tat ăn tơring tơpă. Sơnăm 2022-2023 ưh tam mă man đei 1 pôm hnam yơ.”

Ưh lăp tơƀâp pơmat tat mưh tơlĕch jang nhen Quảng Bình, dêh char Hà Giang truh dang ei đĭ jang đei hlŏh 80% tơdrong hơgăt găh tơgŭm hnam oei ăn unh hnam bơngai kon kông, tơring kon kông. 1 kơsô̆ pơm ăn lơ tơring, mă loi jĭ dôm dêh char groi kông, hơtăih yăih tôch ‘mĕh vă. Mă lei Hà Giang tơtă tơƀâp pơmat tat găh tơdrong nai dơ̆ng. Ƀok Dương Việt Hùng, Kơdră Anih jang mŭk drăm, pơm trong, man anih jang apŭng Xín Mần, Hà Giang tôch tơtăm: “Mĭnh kơsô̆ unh hnam mưh hơlen blŭng a ‘nŏh trŏ. Mă lei, hơlen hơlơ̆k dơ̆ng sơnăm 2022 păng truh sơnăm 2023 tơlĕch jang ‘noh pă trŏ bơih, rŏ năng kơplăh âu, đe đĭ chă pơm ming hnam kơdih, mă ưh ‘nŏh đĭ klăih đơ̆ng tơnuh bơih dăh mă đei lơ tơdrong nai dơ̆ng jing ưh pă đei măt lơ̆m hơnăn dôm bơngai đei xa yoa đơ̆ng tơdrong jang.”

Ưh đei măt lơ̆m hơnăn dôm bơngai đei xa yoa ưh kơsĭ kon pơlei pă đei pơmat tat bơih ôh, mă lei sư jing đei tơdrong pơm ăn tơring ưh gơ̆h jên tơlĕch jên jang. Tơdrong tơhlăk sek tơlang tôch pơmat tat âu đei ƀôh tôch lơ mưh dôm tơring tơlĕch trong bơ̆ jang 3 tơdrong jang tơm kơ teh đak. Đang kơ ‘nŏh jĭ tơdrong tơlĕch jang răhh rai, klăih song hơnăp jang ưh kơ rơđăh pơm ăn dôm trong jang, tơdrong tơgŭm jing ưh đei iŏk yoa ‘lơ̆ng.

Pơma nuh hăm nhôn, ƀok Hoàng Xuân Ánh, Kơdră vei lăng kon pơlei dêh char Cao Bằng akhan: “Tơpă mơ̆n tơring tơƀâp lơ tơdrong tơhlăk, pơtih gia tơmât hơdai jên jang, nhôn ưh kơ băt vă jang thoi yơ. Anih jang tơgŭm roi tơƀôh năr ‘nâu thoi âu, tơning pinh hơlen anih tơm ‘nŏh pơma pha dơ̆ng. Mă hơtuch jing pơduinh ưh băt thoi yơ, ưh đei trong vă bơ̆ jang.”

Tơdrong ƀôh tôch hơdrơ̆k ‘nŏh, ƀât mă kon pơlei ưh kơmăh jên, ‘mĕh đei tơdrong tơgŭm ‘nŏh jên đơ̆ng tơdrong jang tơtă dơ̆ng 1 ƀôt tơ̆ anih mong jên, tơring pơhual ưh đei trong vă iŏk tơlĕch thoi yơ. Ƀât lăp đei tơring athei chă trong pơdreu dơ̆ng jên ăn teh đak, nhen dêh char Lạng Sơn. Kiơ̆ ƀok Hồ Tiến Thiệu, Kơdră vei lăng kon pơlei dêh char Lạng Sơn, yoa rim tơdrong jang đei 1 anih pơgơ̆r, mă lei bơngai đei xa yoa ‘nŏh tơtă 1 đĕch, oei kiơ̆ tơdrong hơgăt 1 ‘nu lăp gơ̆h xa yoa 1 tơdrong jang, 1 tơdrong tơgŭm yơ ‘nŏh đĕch, jing hơdrom băl mưh pơm hla ar kơna tơring âu rŏ năng athei pơm hla ar pơdreu dơ̆ng hlŏh 355 ti hlak jên đơ̆ng dôm tơdrong jang tơm kơ teh đak: “Jên pơyoa ăn tơdrong jang oei tơhlăk tôch dêh. Dang ei oei đei 355 ti hlak jên vă jang ưh gơ̆h tơlĕch păng nhôn oei vă pơm hla ar apinh pơdreu dơ̆ng ăn Trung ương.”

Tơhlăk tăk, ưh băt vă bơ̆ jang kiơ̆ nơ̆r pơtho yơ. Bơ̆ jang ‘nŏh hli glăi, ‘mĕh pơdreu dơ̆ng jên ăn trung ương ‘nŏh hli ƀơm ưh ‘lơ̆ng truh tơdrong hơlen năng hơnăp jang tơ̆ tơring. Tơdrong ‘nâu tŏk bŏk pơm ăn lơ tơring đei 3 tơdrong jang tơm kơ teh đak oei huŏng lơ̆m tơdrong “năm ‘nŏh tơvŏk, brŏk ‘nŏh tơhlăk”.