Unh hnam ‘nhŏng Hồ Văn Lách tơ̆ plei Trung, xăh Trà Sơn, apŭng Trà Bồng găh unh hnam tơnuh. Sơnăm 2023, đơ̆ng Tơdrong jang tơm kơ teh đak tơjur tơnuh hin, unh hnam ‘nhŏng Hồ Văn Lách đei tơgŭm 2 tŏ rơmo yŏng vă rong. Klo kăn ‘nhŏng đei pơtho tơƀôh trong pơm hơdrong, pơtăm ‘ngiĕt rong rơmo. ‘Nhŏng Lách adrin tŏk iŏk 50 triu đơ̆ng anih mong jên tơgŭm ăn tơpôl hăm jên kon tŏ sĕt, kŭm hăm kơsô̆ jên tơgŭm man hnam đơ̆ng Tơdrong jang tơm kơ teh đak găh tơjur tơnuh hin, ‘nhŏng man đei hnam kơjăp ‘lơ̆ng.

‘Nhŏng Hồ Văn Lách tôch hơiă mưh klo kăn măr sư đei tơdrong jang sơđơ̆ng, tŏk klăih đơ̆ng tơnuh hin: “Đei  dơ̆ng rơmo ‘nŏh roi ‘lơ̆ng, pơma atŭm nhôn đei pơtâp pơhrăm ngăl bơih. Hơdrong ‘nŏh pơm mă xă ƀiơ̆, ‘ngiĕt ‘nŏh bơ̆n pơtăm ăn rơmo xa. Jơ rơhơi ‘nŏh năm vei rơmo, tơdăh ưh văn, năm jang ‘nŏh yoă ‘ngiĕt ăn rơmo xa. Teh đak tôch tơrek, vang tơgŭm tôch lơ, pơma atŭm bơnê kơ teh đak chă tơgŭm ăn.”

Khul kơdră apŭng Trà Bồng, dêh char Quảng Ngãi pơih lơ lăm pơtâp pơhrăm ăn unh hnam tơnuh păng kon pơlei kon kông, pơtho ăn mih ma duch nă trong rei pơtăm, rong kon tơrong vă pơm hơtŏk tơdrong đei yoa đơ̆ng choh jang xa, tŏk klăih đơ̆ng tơnuh. Sơnăm ‘nâu, xăh Trà Sơn, apŭng Trà Bồng adrin tơlĕch hlŏh 200 unh ham lĕch đơ̆ng unh hnam tơnuh. Ƀok Đinh Văn Phong, Kơdră vei lăng kon pơlei xăh Trà Sơn, apŭng Trà Bồng ăn tơbăt, lơ unh hnam tơnuh tơ̆ xăh jĭ kon pơlei bơngai Cor, tơdrong hlôh vao ưh kơ jrŭ. Kăn ƀô̆ xăh jur dăr lăng tơ̆ yăn âu, chă iŏk nơ̆r tơgop đơ̆ng rim unh hnam kăl đei tơgŭm, đơ̆ng rŏng kơ ‘nŏh tơlĕch jên tơgŭm ăn mih ma duch nă.

Ƀok Đinh Văn Phong tơroi dơ̆ng: Khul kơdră pơgơ̆r athei rim unh hnam tơnuh pơkăp, iŏk yoa jên tơgŭm mă trŏ hăm tơdrong vă jang: “Dôm anih jang, khul grŭp tơlĕch jang truh tơ̆ tơring, chă iŏk nơ̆r tơgop đơ̆ng kon pơlei ưh kơsĭ ba tơlĕch jang kiơ̆ kơdih ba ôh. Pơtih gia ƀok âu ưh đei teh, ƀok ‘nâu ưh đei hnam, ƀok ‘nâu kăl đei tơgŭm jên vă jang xa, kăl đei rơmo vă vei rong  dăh mă kăl đei hơdrĕch, tơđăh ‘long vă pơtăm, ‘noh xă chih hơmet. Dăr lăng lăp hăm yăn âu, lê̆ kon pơlei chă rơih kơdih, đe sư đei nơ̆r pơkăp păng adrin jang tŏk klăih đơ̆ng tơnuh hin”.

Sơnăm 2020, kơsô̆ unh hnam tơnuh tơ̆ apŭng Trà Bồng, dêh char Quảng Ngãi đei hlŏh 42% ‘nŏh truh hơtuch sơnăm 2023 lăp pă hlŏh 29%. Gơnơm đei tơdrong tơgŭm đơ̆ng dôm tơdrong jang tơm kơ teh đak, truh dang ei, tơdrong choh jang xa đơ̆ng kon pơplei đei tơplih ‘lơ̆ng. Mă loi, kon pơlei Cor tơ̆ apŭng Trà Bồng ưh pă đei choh jang xa ƀât dâu, kơdâu oei tơ̆ to bơih, kon pơlei đei pơjao teh, pơjao bri, tơdrong arih xa roi tŏk ‘lơ̆ng. Sơnăm ‘nâu, apŭng Trà Bồng adrin sut pơđĭ 1.500 unh hnam tơnuh kiơ̆ Tơdrong jang tơm kơ teh đak găh tơjur tơnuh hin kơjăp ‘lơ̆ng.

Ƀok Nguyễn Văn Dũng, Bí thư Đảng apŭng Trà Bồng ăn tơbăt: Anih jang đảng apŭng pơgơ̆r hơlen năng tơ̆ yăn âu găh tơdrong jang tơjur tơnuh hin tơ̆ 16 xăh lơ̆m apŭng, băt hơdăh tơdrong ‘mĕh vă đơ̆ng rim pơlei, rim unh hnam vă đei trong pơgơ̆r bơ̆  jang ‘lơ̆ng tơdrong tơjur tơnuh hin:

“’Nao âu, Bí thư Đảng apŭng hlôi jur tơ̆ 16 xăh, mât tơ̆ pơlei vă hơlen năng tơdrong tơgŭm man hnam oei, tơdrong jang xa thoi yơ păng đei tơdrong kiơ oei pơmat tat, kăl chih răk, nhôn kŭm đei trong pơgơ̆r bơ̆ jang ăn rim xăh đei tơdrong juăt oei xa, jang xa pha ra. Tơ̆ 1 tơring mă lei tơ̆ plei ‘nâu pha, plei to pha. Trong pơgơ̆r bơ̆ jang hăm ‘nhŏng oh, ‘ngoăih kơ đei trong jang atŭm athei iŏk yoa ‘long pơtăm, kon tơrong, pơtho ăn mih ma duch nă jang thoi yơ lăp hăm pơlei, lăp hăm rim unh hnam ưh kơsĭ pơtho tơƀôh atŭm atŭm đĕch ôh”./.