Saroi vă jê̆ Têt nguyên đán Quý Mão 2023, rim hơnih bơ̆ jang tơ̆ dêh char Đak Lăk saroi atŏk kơtang hơmet ăn Pơm lêh chehphe Buôn Ma Thuột ‘măng mă 8. Hăm Khul jang chehphe Buôn Ma Thuột, tơdrong tơm kơ rim tơdrong hơmet ăn ‘nŏh ‘Măng pơlong pơm đak chehphe gĭt kăl Việt Nam, gô đei pơgơ̆r blŭng a.

Kiơ̆ đơ̆ng ƀok Lê Đức Huy, Kơ iĕng Kơdră chĕp pơgơ̆r Khul jang chehphe Buôn Ma Thuột, ƀok lui kơtang lơ̆m ‘măng pơlong truh au kơnh đei pơgơ̆r keh kong kơ yuơ khul hlôi joăt lơ̆m rim ‘măng pơlong chehphe gĭt kăl, pơlong hơdrĕng chehphe, đei pơgơ̆r hơnơ̆ng đơ̆ng sơnăm 2018 truh dang ei. Ƀok Huy sơkơ̆t hơdăh, rim ‘măng pơlong mĭnh păh ‘nŏh tơdrong pơchơt pơhiơ̆ kơ khul jang chehphe gĭt kăl Việt Nam, hôn bơnê tơdrong tơchơ̆t jên jang ăn tơdrong ‘lơ̆ng, adoi nhen trong pơhrăm kơ khul, sơng hơlau dôm tơdrong rơvơn ‘nao mưh Tây Nguyên tơlĕch jang kiơ̆ Tơdrong tơchơ̆t 23 kơ Dơnŏ anih tơm Chĭnh trĭ:“ ‘Ngoăih kon pơlei ‘nŏh kăl đei dôm bơngai thơ̆ hơgei, vă tơgăl ăn chehphe găr Việt Nam jing chehphe hơdrĕng tơ̆ Việt Nam. Truh au kơnh gô kơtang hloh dơ̆ng ‘nŏh đei trong tơgŭm djru kơtang mư̆h tơmơ̆t jên jang tơ̆ Buôn Ma Thuột. Hăm tơdrong pơgơ̆r au, tơdrong mă nhôn hơmŏ gô đei rim bơngai joăt hơdrĕng. Rim đe boăl gô tơmơ̆t jên jang chă hơdrĕng, pơm tơlĕch ‘lơ̆ng tơ̆ Việt Nam păng tơ̆ Đak Lăk păng tơ̆ Buôn Ma Thuột”.

Jĭ kơdră Kơdră chĕp pơgơ̆r, Bí thư chi bộ mĭnh hơnih mơdro tơm, vang jang lơ̆m pơm tơlech ‘lơ̆ng chehphe-plei ‘long, ƀok Nguyễn Xuân Lợi- Kông ty Tơmơ̆t jên jang Atŏk tơ iung An Thái, dêh char Đăk Lăk sa roi lăng kơjăp trŭh Tơdrong tơchơ̆t 23. Ƀok akhan, trong jang atŏk tơ iung rơgŏh ‘lơ̆ng, tơrŏh klŏh klĕch Tây Nguyên mă tơdrong tơchơ̆t đei pơma truh ‘nŏh tôch trŏ lăp, păng hơnih jang An Thái tŏk bŏk atŏk tơ iung kiơ̆ trong au, hăm kmăi pơm tơlĕch chehphe ‘lơ̆ng 40.000 tân lơ̆m 1 sơnăm; pơđi\ kơđŏh chehphe đơ̆ng rŏng ot jei pơm tơlĕch đei mơ̆r ‘lơ̆ng. Mă lei, vă đei trong jang rơgŏh ‘lơ̆ng ăn Tây Nguyên, ‘nŏh kăl đei iung jang kơtang hlŏh dơ̆ng, ƀok Lợi akhan kăl đei mĭnh jơhngơ̆m đon đơ̆ng pơđĭ khul kơdră chĕp pơgơ̆r, kon pơlei păng hơnih mơdro sa:“ ‘Nau jing rơvơn ‘lơ̆ng hloh. Găh păh rim hơnih mơdro sa ‘nŏh nhôn kăl tơchĕng hơlen akhan Tơdrong tơchơ̆t au đei yă kiơ ‘lơ̆ng, đei yă kiơ lơ̆m khei ‘năr kơđeh, đei tơdrong yă kiơ iung jang lơ̆m đunh đai păng tơgăl hăm Tơdrong tơchơ̆t ‘nŏh găh hơnih mơdro sa kơ bơ̆n đei tơdrong rơvơn yă kiơ tơmơ̆t jang kiơ̆ hloi ‘nŏh kơdih hơnih mơdro sa kăl băt hơdăh dôm tơdrong yă kiơ rơvơn, tơdrong yă kiơ tơnap tap păng dôm tơdrong long mư̆h rim hơnih mơdro sa Tây Nguyên jang kiơ̆ Tơdrong tơchơ̆t 23 au. ‘Nŏh kăl đei hơnăp jang vei lăng teh đak pơjing ăn trong tơlĕch jang mă trŏ ƀlep, mă ‘lơ̆ng vă rim hơnih mơdro sa dă ƀiơ̆ tơhlăk tơhlĭn.”

Sơnăm 2023, sơnăm blŭng rim dêh char Tây Nguyên tơlĕch jang kiơ̆ Tơdrong tơchơ̆t 23 đơ̆ng Dơnŏ anih tơm Chinh trĭ, đei pơjing lơ̆m tơdrong jang mŭk drăm tơpôl tôch rơvơn, mư̆h tơdrong tŏk mŭk drăm kơ rim dêh char iŏk đei 7,6 truh hloh 12%, lơ hlŏh pơtêng hăm pơkăp 7 trŭh 7,5% mă Tơdrong tơchơ̆t 23 tơlĕch ăn lơ̆m jăl jang trŭh sơnăm 2030. Mă lei, rim dêh char Tây Nguyên jei dei ƀô̆h lơ tơdrong tim mă pran kơtang. Truh hloi hăm dêh char Lâm Đồng, dêh char iŏk đei tŏk mŭk drăm truh 12%, lơ hlŏh pơtêng hăm rim dêh char anai kơ Tây Nguyên, ‘nŏh dôm tơdrong tim mă ‘lơ̆ng oei ƀô̆h hơdăh, mă kăl lơ̆m tơdrong chĕp pơgơ̆r păng hơmet pơ ‘lơ̆ng trong bơ̆ jang. Kiơ̆ đơ̆ng ƀok Trần Đức Quận, Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Lâm Đồng, dôm tơdrong jang tim mă ‘lơ̆ng kơ dêh char hlôi đei ƀô̆h hơnơ̆ng lơ̆m lơ sơnăm. Tơdăh ư̆h kơ hrôih hơmet pơ ‘lơ̆ng, Lâm Đồng mơmat mă tơlĕch jang kiơ̆ ‘lơ̆ng rim trong jang tơm hlôi đei tơlĕch lơ̆m Tơdrong tơchơ̆t 23: “Tơdra hơdrol oei đei lơ tơdrong tơnap tap, tơdrong long adoi nhen dôm tơdrong jang tim mă ‘lơ̆ng, tim mă gơ̆h hơgei tơ̆ rim tơdrong jang, rim hơnih bơ̆ jang, mă kăl tim mă gơ̆h hơgei lơ̆m chĕp pơgơ̆r, pơrô̆ iung jang kơ minh ƀar hơnih jang, tơring hlôi pơdui đunh sơnăm hơnơ̆ng. Ƀơm kơnê̆ ưh tŏ sĕt trŭh tơdrong jang atŏk tơ iung Mŭk drăm-tơpôl kơ dêh char, adoi nhen tơdrong jang pơm tơlĕch, tĕch mơdro tơmam drăm păng tơdrong erih sa kơ kon pơlei. ‘Nau jing trong tơhlăk, tơdrong jang ư̆h kơ ‘lơ̆ng păng kăl tơ ƀô̆h hơdăh vă hơnơ̆ng hơmet pơ ‘lơ̆ng, hơnơ̆ng iung jang kiơ̆ tơdrong jang lơ̆m sơnăm 2023”.

Vă jang kiơ̆ Tơdrong tơchơ̆t 23 kơ Dơnŏ anih tơm Chinh trĭ, atŏk tơ iung Tây Nguyên tĕnh koăng păng kơjăp, ‘lơ̆ng hơ iă pơđĭ chŏh jang sa-bri ‘long, ŭnh hơyuh, tơmang pơhiơ̆, jang kmăi kmŏk, Khul kơdră tĕh đak hlôi tơchơ̆t hơdăh tơmơ̆t jên jang 9 tơdrong vă jang trong nơnăm tơm. Atŭm hăm dôm tơdrong vă jang hlôi đei kĭ tơchơ̆t đơ̆ng hơdrol, Tây Nguyên đei 11 tơdrong vă jang trong nơnăm tơgoăt klŏh klĕch lơ̆m tơring, akŏp kon jên tơmơ̆t jang dang 180.000 ti hlak jên. ‘Nau jing trong jang kăl hlŏh, jingh rơvơn tih tên ăn Tây Nguyên mă lei jei dôm tơdrong long tih tên, kơ yuơ tŏk bŏk đei lơ tơdrong vă jang teh đak tơmơ̆t jên jang tơ̆ Tây Nguyên iung jang hiơ hiơ̆ keh đang dăh mă iŏk yua ư̆h kơ jơnei. Kơ yuơ lơ loh, kiơ̆ đơ̆ng ƀok Lê Đình Trung, Bí thư Đảng dêh char Đak Lăk, vă Tơdrong tơchơ̆t 23 tơpă jing hơyak pran ăn atŏk tơ iung ăn jăl trŭh au kơnh, dêh char pơkăp atŏk kơtang hơnăp jang, sơnong jang, bơ̆ jang hơdoi ‘lơ̆ng hlŏh dơ̆ng, kơjăp hlŏh dơ̆ng hăm rim hơnih tơm, hơnih bơ̆ jang, tơring tơrang: Dêh char Đak Lăk pơkăp atŏk kơtang hlŏh dơ̆ng hơnăp jang, pơjing đei hrơ̆p minh ƀơ̆r đon lơ̆m tơlĕch jang kiơ̆; xơkơ̆t hơdăh hơnăp jang kơ rim dơnŏ anih bơ̆ jang lơ̆m chĕp pơgơ̆r jang kiơ̆. Tơlĕch jang kiơ̆ kơtang rim tơdrong jang kơ tơring. Dêh char gô tơlĕch jang kơtang hlŏh dơ̆ng, pơjing đei hrơ̆p mĭnh ƀơ̆r đon lơ̆m riom hơnih jang lơ̆m atŏk kơtang iung jang hơdoi rim tơring pơjing đei tơlĕch jang kiơ̆ ‘lơ̆ng hơ iă, hoei tơhlăk tơhlĭn, atŏk kơtang kĕ pơjei, iung jang kiơ̆ ‘lơ̆ng dôm tơdrong đei”.

Sơnăm ‘nao 2023 truh hăm Tây Nguyên atŭm hăm Tơdrong tơchơ̆t 23, mĭnh tơdrong tơdrong tơchơ̆t pơjing rơvơn tih tên mă lei tơlĕch ăn Tây Nguyên lơ tơdrong jang tih tên păng tơnap tap. Vă jang keh đang dôm tơdrong jang tĭh tên ‘nau, kăl đei nơ̆r pơkăp hơnăp jang tơnăp đơ̆ng khul đảng-kơdră chĕp pơgơ̆r rim dêh char Tây Nguyên atŭm hăm lăp đon đơ̆ng kon pơlei păng tơpôl hơnih mơdro sa. Atŏk kơtang hơnăp jang, tơtom hơmet pơ ‘lơ̆ng rim tơdrong tơhlăk tơhlĭn, hăm hơdrin đơ̆ng kơdih păng hăm tơdrong tơmơ̆t jên jang đơ̆ng teh đak, Tây Nguyên hơmŏ đei tơ iung pơjing kĕ jing tơring atŏk tơ iung kơ lơ̆m teh đak, trŏ ƀlep hăm trong tơlĕch jang đơ̆ng Tơdrong tơchơ̆t pơtruh ăn.