Lơ̆m kơsơ̆ năr 20/2, tơgop nơ̆r lơ̆m Khôi luơ̆t groi teh (hơmet ming), rim kơdră lơ̆m Khul tơbăt tơdrong hơtŏ hơnơ̆ng păng khôi luơ̆t, rim bơngai joăt jang, bơngai khoa hŏk kơ Hơnih bơ̆ jang Trung ương MTTQ Việt Nam athei pơm hơdăh hloh dơ̆ng tơdrong iŏk tơvih teh vă atok tơ iung mŭk drăm-tơpôl kơ yuơ đei iŏk yua ăn Teh đak, kon pơlei, adoi kăl sơđơ̆ng đei iŏk yua kơjăp hăm dôm bơngai plang ăn teh.

Kiơ̆ đơ̆ng rim bơngai tang măt, lơ̆m bơ̆ jang iŏk tơvih teh đei tơnap tap, tơhlăk tơhlĭn pơm ăn truh rim ‘măng tơkêng kơtang, lơ bơngai, kơ yuơ tim mă tôm tơdrong tơchơ̆t khôi luơ̆t, dăh mă tim mă hlôh vao khôi luơ̆t, tơdrong jang hơdoi tim mă hrơ̆p mĭnh ‘măng lơ̆m khul chĭnh trĭ rim hơnih. Kơ yuơ lơ loh, tơdrong bơ̆ jang hrŭ ăn, tơgŭm djru, pơjing hơnih oei ‘nao, iŏk tơvih teh kăl đei tơchơ̆t hơdăh, tơpăt, trŏ ƀlep păng tơblang hơdăh, sơđơ̆ng đei iŏk yua ăn teh đak, hơnih mơdro sa păng kon pơlei; Lơ nơ̆r tơgop athei pơjing lơ trong jang lơ̆m trong hrŭ ăn; kơjă teh hrŭ ăn kiơ̆ kơ jă tĕch răt yan au; pơjing hơdăh găh kon jên hrŭ ăn, kon jên tơgŭm ăn, tơgŭm djru, pơjing hơnih oei ‘nao ‘nŏh iung jang hơdrol vă tơchơ̆t iŏk tơvih teh.