Lơ̆m khei ‘Mêm mơnat sơnăm 2024, mă kăl đơ̆ng ‘năr 8/5 truh ‘năr 19/5, dôm kơdră Jơnŭm jang dêh char Gia Lai hơdrin krao hơvơn 6 ti 500 triệu hlak jên, tơgŭm ăn kơ 30.000 ŭnh hnam đei tơdrong arih sa mơmat tat hăm lơ trong jang tơgŭm nhen pơgơ̆r khăm, hơmet jĭ ‘mêm mơnat, pơtho tơƀôh jơhngơ̆m pran, asong đĕch pơgang.

Asong hloh 7000 tơpu tơmam, pơgơ̆r tơroi tơbăt, krao hơvơn năr plang song pham tơgŭm hăm 1300 tơpu pham. Jơnŭm ‘Long pơglang ƀrê dêh char Gia Lai tơbăt, dôm tơdrong jang ‘mêm mơnat sơnăm ‘nâu ưh khan lăp tơgŭm dôm bơngai đei tơdrong arih sa mơmat tat tơ̆ Gia Lai, mă oei lang să jơ̆p jang ‘moi kiơ̆ tơdrong jang “Kơtriê̆u hơyak jơ̆ng ‘mêm kơ eng” yua đơ̆ng Trung ương Jơnŭm ‘long pơglang ƀrê tơlĕch jang.