Lơ̆m hnam oei tơ̆ plei Ea Rông, xăh Krông Na, apŭng Buôn Đôn, dêh char Dak Lak, oh H’Hải Niê Kdăm, hŏk tro lăm 7A, Hnam trưng hŏk jăk 2 Võ Thị Sáu hơ ngŏr hŏk ƀai, hăm hơ pơih ‘meh đơ̆ng rŏng âu kơnh jing kô pơtho hŏk. Oh mơ ti ƀă đơ̆ng ƀơ̆t 2 sơnăm, ŭnh hnam mơmat tat dêh hloh, mĕ sư ‘noh hơnơ̆ng jĭ pơ lŏ. Ƀôh tơdrong arih sa mơmat tat đơ̆ng oh, sơnăm 2019, Kơ đông lĭnh vei lăng tơring sơlam Sêrêpôk hlôi iŏk tơgŭm H’Hải kiơ̆ tơdrong jang “ tơgŭm oh năm hŏk”. Kŭm hăm tơgŭm rim khei 500.000 hlak jên, kang ƀô̆, khŭl linh Kơ đông Sêrêpôk kŭm hơnơ̆ng năm ngôi, pơlung păng pơtho tơƀôh ăn kơ oh hŏk pơhrăm. Hlôh đei tơdrong mơmat tat đơ̆ng ŭnh hnam păng ƀôh tơdrong ‘mêm kơ eng đơ̆ng đe ma ƀô̆ đô̆i tơring sơlam, H’Hải ling lang hơdrin păng iŏk đei jơnei ‘lơ̆ng lơ̆m hŏk pơhrăm:

“Đe ma hlôi tơgŭm kon tôch kơ lơ, mon bơnê kơ đe ma yua kơ đe ma hlôi tơgŭm năm hŏk. Mon kŭm hlôi hơdrin lơ̆m hŏk pơhrăm, đe ma hlôi pơlung hơdrin hŏk pơhrăm păng đe ma kŭm tơgŭm hŏk dôm môn hloi.”

Kŭm mơ ti ƀă păng ŭnh hnam tôch  kơ mơmat tat, oh Hà Duy Khánh oei tơ̆ plei Đừng Nhạp, xăh sơlam Ia Lốp, apŭng Ea Súp hlôi đei Kơ đông lĭnh vei lăng tơring sơlam Ea H’leo tơgŭm năm hŏk. Mŏ Lò Thị Loan, mĕ Khánh tơbăt, tơdrong bơngơ̆t truh tơgŭm đơ̆ng ƀô̆ đô̆i vei lăng tơring sơlam hlôi hơnhăk ăn tơdrong hiôk chơt, pơlung tôch kơ tih hăm ŭnh hnam:

“Ƀô̆ đô̆i vei lăng tơring sơlam tơgŭm ăn kơ mon ‘noh 500.000 hlak jên 1 khei, đei dơ̆ng bơ̆n tơmam, hla ar hŏk, hla ar chih, tơmam yua, đang kơ ‘noh kŭm năm ngôi tơ̆ ŭnh hnam pơlung, bơngơ̆t truh, pơtho mon hŏk ƀai. Lơ̆m khei ‘năr âu ki ‘noh mon đei hŏk păi ƀiơ̆ lơ̆m hŏk pơhrăm.”

Trung uý Hà Văn Tân, kang ƀô̆ Khŭl krao hơvơn tơpôl Kơ đông lĭnh vei lăng tơring sơlam Ea H’leo jĭ 1 lơ̆m dôm kang ƀô̆ kơtă bơ̆ jang kiơ̆ hơnăp jang “ Tơgŭm oh năm hŏk” păng “ kon rong Kơ đông lĭnh vei lăng tơring sơlam”. ‘Nhŏng tơbăt, đe mon đei tơgŭm vă đĭ đăng ‘noh hơioh mơti ngăl, mơmat tat găh tơmam drăm hai, ưh kơ đei tơdrong ‘mêm ăn hai. Yua thoi noh, đe sư ling lang băt hơdăh ưh khan lăp tơgŭm găh tơmam mă pơm liơ athei păr ang đei tơdrong ‘mêm kơ eng, tơgŭm đe mon đei tưk tơiung jơhngơ̆m hơdrin:

“ ‘Nhŏng oh kang ƀô̆, khŭl linh kơ đông lĭnh hơnơ̆ng năm ngôi, apĭnh jet gia, pơtho đe mon hŏk pơhrăm. Hloh khei ‘năr bơ̆ jang kiơ̆ tơdrong jang ‘noh đe mon tă kơ hŏk gơh, đe mon adoi đei tơdrong hơdrin lơ̆m hŏk pơhrăm.”

Tơlĕch jang tơdrong jang “ tơgŭm oh năm hŏk” păng tơdrong jang “ kon rong kơ đông lĭnh tơring sơlam”, đơ̆ng sơnăm 2014 truh dang ei, Ƀô̆ đô̆i vei lăng tơring sơlam dêh char Dak Lak hlôi iŏk tơgŭm ăn vă jê̆ 250 ‘nu mon. Kŭm hăm jên tơgŭm rim khei ‘noh 500.000 hlak jên, dôm anih jang lĭnh vei lăng tơring sơlam oei đei lơ tơdrong jang pơ jao asong hŏk ƀŏng, dôm tơmam đei kơjă kăp gĭt tơgŭm đe mon sơđơ̆ng hŏk pơhrăm. Thiếu tá Vũ Văn Dương, Chính trị viên phŏ kơđông lĭnh vei lăng tơring sơlam Ea H’leo tơbăt, roi găh trong tơlĕch tơdrong jang:

“Bơ̆ jang kiơ̆ athei đơ̆ng Anih jang Đảng, anih tơm pơgơ̆r lĭnh vei lăng tơring sơlam dêh char, anih jang hlôi jang hơdai hăm kơdră đảng, kơdră tơring păng dôm hnam trưng kŭm nhen ŭnh hnam đe mon lơ̆m xăh Ia Lốp vă pơgơ̆r dăr hơlen, rơih iŏk đe mon hŏk tro đei tơdrong tơdrong arih tôch kơ mơmat tat vă tơgŭm. Truh dang ei, anih jang hlôi tơgŭm ăn 50 ‘nu mon. Găh tơring ‘noh ling lang lăp đon, tơgŭm ‘lơ̆ng, oei dôm hnam trưng păng ŭnh hnam đe mon ‘noh tôch kơ chhôk hơiă, ‘nă hal.”

Hăm tơdrong yak hơdai đơ̆ng dôm khŭl linh grat jơk, lơ hơioh lơ̆m tơring sơlam kơ Dak Lak hlôi păng tŏk bŏk tơgŭm năm hŏk, yak hloh tơdrong arih sa mơmat tat hloh vă đơ̆ng rŏng âu kơnh jing bơngai đei yua ăn pơlei pơla, teh đak.