Tơ̆ apŭng Cư Kuin, Jơnŭm jang ‘long pơglang brê dêh char Đăk Lăk ‘nao pơgơ̆r tơdrong Akŏm kơchơ Têt ‘mêm kơ-eng sơnăm 2024. Tơdrong akŏm pơjao 33 tơpu tơmam păng 300 kơphĭu năm kơchơ 0 hlj, đei kơjă hloh 233 trĭu hlj ăn kon pơlei đei tơdrong hơrih tơnap tap lơ̆m tơring teh kơ apŭng Cư Kuin.

Dôm tơmam drăm 0 hlj đei ƀanh chư̆ng, ƀanh kĕo, tơmam yua nai nhen (rơmă, đak măm, si yâu, sĭk, ƀôk ngok, mi tôm, phe). Lơ̆m pơkăp kơ tơdrong akŏm oei đei dôm tơdrong jang nhen kăt sŏk ưh đei iŏk jên, chih nơ̆r pơtruh; anih ‘nŭng ƀanh chư̆ng; anih chŭp um tơƀlŏk păng chă akŏm pơchơt pơsuh kră sơ̆. Đei iŏk hloi tơmam Têt đơ̆ng tơdrong akŏm, ‘nhŏng Y Gu Buôn Yă, oei tơ̆ pơlei Ea Mtá, xah Ea Bhok, apŭng Cư Kuin tơroi: “Inh sô̆ hơ̆k, păng hmach bơnê kơ đon bơnôh dơnưp hlôi pơgơ̆r minh tơdrong akŏm kăp gĭt păng sô̆ ăn dôm bơngai đei tơdrong hơrih tơnap tap nhen inh âu, gô tơgŭm ăn kơ nhôn đei minh pơyan Têt tơnŏ sô̆ hơ-iă hloh”

Kiơ̆ kơ yă AYun H’Hương, Kơdră Jơnŭm jang ‘long pơglang brê dêh char Đăk Lăk, tơdrong Akŏm kơchơ Têt ‘mêm kơ-eng sơnăm 2024 gô pơjao 25 rơbâu tơpu tơmam, hăm kơjă kăp truh 17,5 tih hlj ăn kon pơlei đei tơdrong hơrih tơnap tap lơ̆m jâ̆p dêh char. ‘Nguaih kơ 3 tơdrong akŏm dơnơm tơ̆ dôm apŭng Cư Kuin, Cư Mgar păng Ea Kar kơyuơ Jơnŭm jang ‘long pơglang brê dêh char jang atŭm hăm jơnŭm pơgơ̆r tơring pơgơ̆r, dôm tơring nai gô kơdih chă rơih trong pơgơ̆r akŏm mă trŏ ƀlep hăm tơdrong kĕ đei kơ tơring po: “Kiơ̆ đơ̆ng Akŏm kơchơ Têt ‘mêm kơ-eng âu, pơtruh nơ̆r hmach bơnê hăm dôm anih jang, bơngai jang tơgŭm hlôi tơgŭm ăn tơdrong akŏm, păng hơdoi hơpơi ‘meh khei năr truh, dôm anih jang păng bơngai jang ‘mêm bơnat gô pơtoi yak hadoi hăm Jơnŭm jang ‘long pơglang brê vă pơm kiơ̆ dôm tơdrong jang pơyua ăn tơpôl roi năr roi tơnăp hloh, tơgop tơgŭm ăn kon pơlei đei minh pơyan Têt sơđơ̆ng, tơnŏ păng jơnap”

Anih jang vei lăng kon pơlei dêh char Đăk Lăk ‘nao tơchơ̆t Asong jên năm hơpong păng ăn tơmam kơ dôm anih jang, bơngai jang lơ̆m ‘măng Têt Nguyên Đan Giáp Thìn sơnăm 2024 hăm kơsô̆ jên asong kiơ̆ tơchơ̆t noh hloh 77 tih hlj.

Ƀơ̆t ‘măng âu, jơnŭm pơgơ̆r dêh char Đăk Lăk gô akŏm khul kơpal năm hơpong, asong 51 tơpu tơmam ăn bơngai tơgŭm jơhngơ̆m hăm teh đak păng minh ƀar Anih jang tơgŭm kon pơlei, Kŏng an, Khul linh vei lăng sơlam teh kơ dêh char. Atŭm hăm noh, Anih jang Măt trâ̆n tôh kuôk dêh char, Anih jang ‘long pơglang brê dêh char Đăk Lăk adoi chă hơvơn thêm jên mong vă năm hơpeh hơpong, ăn tơmam kơ dôm unh hnam hin dơnuh, unh hnam đei tơdrong hơrih tơnap tap păng dôm bơngai mă teh đak tơchơ̆t tơgŭm... hơrih tơ̆ tơring hơtaih yaih, kon pơlei kon kông vă rim kon pơlei adoi gơh sơng Têt chơt hơ-iă tơnŏ.

Tơdrong vei sơđơ̆ng bu bu adoi đei Têt păng “Ưh đei prơih lê̆ bơngai ayơ tơ̆ rŏng” tŏk bŏk oei đei Anih tơm Asong jang, Linh jĭ rơka păng Tơpôl atŭm jăl, rim anih jang, rim tơring tơrĕk iŏk jang. Ƀok Phạm Hồng Đào, Phŏ Kơdră Anih jang Kơpal kơ teh đak gah tơjur hin dơnuh (Anih tơm Asong jang – Linh jĭ rơka păng Tơpôl) tơroi: “Jơnŭm pơgơ̆r tơring adoi nhen dôm anih jang ‘mêm bơnat păng dôm anih jang đei tơrĕk dih băl duh gô đei trong chă hơvơn dôm anih jang nai vă atŭm tơgŭm, vei sơđơ̆ng ăn đe yĕt sơng Puih mak chơt hơ-iă, sơđơ̆ng tơnŏ nhen tơdrong pơgơ̆r đơ̆ng Ƀan ƀĭ thư, Jơnŭm pơgơ̆r teh đak păng Thủ tướng teh đak. Mă kăl noh tơgŭm gah phe, hơnơ̆ng noh ah hơtuch sơnăm đei tơdrong jang tơgŭm noh. Atŭm hăm noh, đei tơmam asong đơ̆ng Kơdră teh đak, tơmam asong đơ̆ng dôm tơring. Tơdrong mă noh kiơ̆ kơ jên mong kĕ đei kơ rim tơring, gô hơdrin vă vei sơđơ̆ng tơnăp hloh ăn kon pơlei lơ̆m tơring ma ưpo vei lăng. Anih tơm Asong jang, Linh jĭ rơka păng Tơpôl adoi đei hla bar pơtruh ăn dôm tơring bơih, pơkăl athei tơgŭm Têt ăn bơngai hin dơnuh kiơ̆ trŏ nhen tơchơ̆t. Atŭm hăm noh tơring athei chă hơlen tơdrong pơm jang âu vă vei sơđơ̆ng asong trŏ bơngai gơh đei xa tơgŭm, ưh kơ lê̆ đei tơdrong pơjĭp pơyua ăn kơdih gah tơdrong jang âu”

Têt Nguyên đan Giáp Thìn tŏk bŏk jê̆ truh. Tơgŭm Têt ăn bơngai hin dơnuh, bơngai kue lơ̆m tơpôl gơh sơđơ̆ng rim bơngai adoi sơng Têt chơt hơ-iă, tơnŏ hlôi jing tơdrong juăt jue ‘lơ̆ng rŏ kơ kon pơlei Việt Nam.