Lơ̆m jăl jang âu ki, tơdrong jang “Sinh viên 5 ‘lơ̆ng” hơnơ̆ng jĭ tơdrong jang sinh viên tơm, đei rim khul Sinh viên Việt Nam akŏm jơhngâm tơlĕch jang hơnơ̆ng hăm lơ trong jang ‘nao, rơgei ‘lơ̆ng. Vă ƀôh hơdăh ƀiơ̆ dôm tơdrong jang đei, chih hơdăh trong jang ‘nao lơ̆m tơdrong jang “Sinh viên 5 ‘lơ̆ng” tơ̆ hơnăp kơnh, Võ Đức Phúc, tang măt ăn Khul Sinh viên Việt Nam plt Hồ Chí Minh akhan: tơplih ‘nao ‘nŏh jĭ tơdrong ưh gơ̆h veh, jĭ tơdrong tơm hlŏh lơ̆m tơdrong jang, jĭ nơ̆r krao hơvơn, athei iŏk sinh viên pơm tơm lơ̆m tơdrong jang.

“Bơ̆n tơplih ‘nao đon tơchĕng, iŏk đon tơchĕng trŏ pơm tơm ăn đon hlôh vao gơ̆h trŏ, trong jang ‘nao, bơ̆ jang mă lăp. Hăm sinh viên, bơ̆n athei tơplih ‘nao đon tơchĕng kiơ̆ trong ăn sinh viên băt, ƀôh hlôh vao, lui, huch ‘mêm kơ tơdrong jang, đơ̆ng noh đe boăl tơiung đei đon hưch hanh vă jang tŏk, jing đei. Hăm rim kăn ƀô̆ khul, bơ̆n athei lê̆ bôl boăl tơchĕng, đe boăl jĭ tơ ‘ngla chơng hơnhăk tơdrong jang hai, jĭ bơngai xa yoa đơ̆ng tơdrong jang hai. Đe boăl athei jing bơngai hlôh vao, jang hơgei đơ̆ng tơdrong jang ‘nâu vă kon bơngai jĭ tơ ‘ngla tơm, jĭ bơngai jang tơm lơ̆m tơdrong jang ‘nâu”

Nơ̆r tơbăt mưh bơ̆ jang ‘nŏh: Sinh viên Việt Nam, Chĕp vei kơjăp đon rơgei - Ƀĕnh jơhngâm đon hơmĕng – Pơjing tơdrong ‘lơ̆ng ăn ning mônh – Pơjing teh đak vă hơtŏk jơhngâm pran lơ̆m sinh viên Việt Nam hơmĕng tưk tơiung teh đak pơdrŏng pran kơjăp, hơnŭk hơnoa, gơ̆h hơgei, hiôk chơt, tơƀôh hơdăh đon lui đơ̆ng sinh viên hăm Đảng, teh đak, chăl chĕp kơ̆l pơgơ̆r Xã hội chủ nghĩa.

Mai Hải Yến, Kơdră vei lăng Khul sinh viên Hnam hŏk kăn ƀô̆ plt Hồ Chí Minh akhan:“Hop akŏm sơnăm ‘nâu oh tôch lăp đon hăm nơ̆r chih tơbăt yoa sư chĕp ba nơ̆r krao hơvơn tôch ‘lơ̆ng păng oh tôch lăp đon hăm nơ̆r chih tơbăt “Chĕp vei kơjăp đon rơgei” kơna oh ‘mĕh lơ̆m jăl jang truh, Khul Sinh viên Việt Nam kŭm nhen rim khul grŭp pơjing đei lơ anih ‘lơ̆ng hơiă vă đe bôl boăl tưk tơiung đon tơchĕng ‘lơ̆ng, pơtâp pơhrăm, hơmet jơhngâm đon vă gơ̆h tơƀôh hơdăh đon rơgei đơ̆ng chăl kơdih kŭm nhen hơnơ̆ng ‘moi kiơ̆ tơdrong pơjing jơhngâm đon rơgei đơ̆ng sinh viên Việt Nam”

Hăm hơnăn “Trong jang tưk tơiung dôm tơdrong pơjing anih tơƀôh trong, tưk tơiung đon tơchĕng ‘lơ̆ng găh tơdrong arih xa ăn sinh viên lơ̆m chăl ‘nao”, Vũ Thu Hằng, sinh viên 5 ‘lơ̆ng kơ plt Hà Nội tơroi tơ̆ Hop akŏm Khul sinh viên Việt Nam: “Ƀât mă oei hăt jang kiơ̆ tơdrong tơplih hăm kơmăy sô̆ kŭm nhen mât jang hơdoi jơ̆p plei teh oei tôch pran hrei ‘nâu, sư ăn kơ bơ̆n lơ tơdrong ‘lơ̆ng vă jang tŏk, mă lei hơdai hăm ‘nŏh sư tơlĕch hloi lơ tơdrong pơmat tat, pơlong nol vă pơtho pơhrăm jơhngâm đon jang chinh trĭ nuih mơng ăn sinh viên….”

Vă pơm lăp hăm tơdrong ‘mĕh vă đơ̆ng tơdrong jang kăch mang lơ̆m chăl ‘nao, athei tơdrong jang sinh viên păng Khul Sinh viên hơnơ̆ng adrin jang tŏk, tơplih ‘nao mă pran tơdrong jang păng trong pơgơ̆r jang, hơtŏk hơnăp jang gơ̆h hơgei năm hơdrol đơ̆ng sinh viên. Nguyễn Tuấn Thành, tơ̆ trưng Quốc tế (Hnam trưng Đăi hŏk quốc gia Hà Nội) akhan, hơdai hăm tơdrong vang jang đơ̆ng Khul sinh viên, athei rim sinh viên kơchăng, adrin, pơchĕh rơgei lơ̆m tơdrong hŏk pơhrăm, ngôi pơchơt vă pơjing tơdrong ‘lơ̆ng ăn ning mônh kơnh, vă Việt Nam jing teh đak gơ̆h dơ̆ng hơdai hăm rim teh đak pơdrŏng đei ƀôh tơ̆ 5 châu nhen Ƀok Hô hơpơi chang:

“Tơdrong jang đoàn, khul ăn kơ oh hŏk đei lơ tơdrong tơ̆ yăn âu, hăm lơ tơdrong đei ‘lơ ‘lŏ, hăm dôm bơngai tơpă, hơtŏk đon jang hơdoi lơ̆m grŭp, kơdih kâu athei hơbĕch hơbal lơ̆m rim tơdrong thoi noh. Păng oh chă đei dơ̆ng lơ bôl boăl, ‘noh jĭ dôm bơngai truh đơ̆ng dôm tơdrong jang khul ngăl, vă akhan oh hŏk tơ̆ hnam trưng, tơ̆ lăm, oh đei grŭp hŏk hơdai hăm băl. Oh vang truh hăm tơdrong thi iung jang xa blŭng a ‘nŏh bơ̆n kăl đei khul ‘năi, ‘nŏh jĭ tơdrong mă oh chă đei lơ bôl boăl lơ̆m tơpôl, thoi noh sư jing tơgŭm ăn oh pơjing đei lơ grŭp boăl juăt păng jang đei lơ tơdrong hơdai" 

Hơpơi ‘mĕh pơjing Khul Sinh viên Việt Nam pran kơjăp, tơgop ‘lơ̆ng ăn tơdrong pơjing, vei lăng Đảng păng tơdrong jang chinh trĭ, bơ̆ jang hrơ̆ch ‘lơ̆ng dôm trong jang pơjing Khul pran kơjăp, mât 1 ƀơ̆r đon, tơguăt đĭ đăng sinh viên; adrin vang tơiung pơjing, vei lăng Đảng păng anih jang chinh trĭ. Nguyễn Nguyệt Anh, Phŏ Kơdră vei lăng Khul Sinh viên Việt Nam dêh char Nghệ An, Kơdră Khul Sinh viên Việt Nam Hnam trưng  Đăi  hŏk Vinh akhan, hơdai hăm hŏk pơhrăm ‘nŏh sinh viên athei kơchăng pơcheh lơ tơdrong rơgei, tơchĕng hơlen khoa hŏk, vă tơgop đon rơgei ăn teh đak hai, vă hơtŏk đon hlôh vao ăn kơdih kâu hai:

“Tơdrong jang đơ̆ng sinh viên ‘nŏh ưh lăp hŏk pơhrăm đĕch mă oei đei hloi tơdrong tơchĕng hơlen kkhoa hŏk dơ̆ng, ‘nŏh jĭ tơdrong pha ƀiơ̆ kơ đe bôl boăl hŏk tro jăl 3. Tơ̆ hơnăp kơnh, tôch hơmĕng, hăm dôm tơdrong tơchĕng hơlen khoa hŏk ‘nŏh đei hloi dôm tơdrong thi păng đei tơdrong tơgŭm pơtho pơhrăm hơnơ̆ng đơ̆ng đe thây kô, dôm bơngai juăt jang găh khoa hŏk”./.