Ăh jê̆ đĭ xơnăm 2020, vă jê̆ 50 unh hnam kon pơlei kueng Cao Biền, xăh Phú Thượng, apŭng Võ Nhai pơtơm đei unh hơyuh Teh đak.

Cao Biền duh jing kueng mă hơtuch đĭ đăng lơ̆m dêh char xut lê̆ tơdrong “ưh đei” unh hơyuh. Tơdrong mă âu hlôi bơ̆ng pang ăn đei jơnei Pơkăp dui unh hơyuh vih tơring pơxĕl dêh char Thái Nguyên, jăl xơnăm 2016-2020. Pơmai Triệu Thị Sinh, kueng Cao Biền, xăh Phú Thượng, apŭng Võ Nhai tơroi: Adrol ki, yua hnam kơmăi unh hơyuh iĕ ‘măn tơ̆k hơdăh đĕch ưh gơh yua kơtuh hơngeo ôh. Đơ̆ng mă đei unh hơyuh noh hiôk hloh, chơt hơ iă chă răt bơ̆n kơtuh hơngeo ‘măn tơmam xa.

Ƀok Triệu Phúc Tiến, Kơdră kueng Cao Biền, xăh Phú Thượng, apŭng Võ Nhai tơroi: Đei Đảng, Khul Kơpal teh đak dui unh hơyuh vih truh kueng Cao Biền nhôn xô̆ lơ̆m đon. ‘Nâu jing tơdrong hơpơi đei đơ̆ng dôm jĭt xơnăm kơ âu đơ̆ng kon pơlei tơ̆ tơring âu.

Ưh adrô̆ đei unh hơyuh, lơ tơchơ̆t kăp gĭt nai ăn kon pơlei kon kông adoi đei dêh char Thái Nguyên tơlĕch pơm jang nhen: Pơkăp tơgŭm ƀoh I ốt tang găn păng tơjră bŏng ako, rơven kơ̆l ‘ngok; Tơdrong hơtŏk mŭk drăm, tơpôl tơring ATK păng tơring kon kông tơnap tap; Tơchơ̆t vei răk păng hơtŏk joh ayŏ kon kông dêh char Thái Nguyên truh xơnăm 2020... Ƀok Lý Văn Mùa, Ƀĭ thư Chi ƀô̆ kueng Lũng Luông, xăh Thượng Nung, apŭng Võ Nhai tơroi: Kiơ̆ dôm tơdrong tơlĕch jang duh tơgŭm kon pơlei klaih đơ̆ng hin dơnuh, pơm trong tơgŭm ăn kon pơlei hơtŏk mŭk drăm, adoi nhen pơjing um ai joh ayŏ kơ kon pơlei pơla.

‘Nao âu, Tơchơ̆t kơsô̆ 39 đơ̆ng Anih vei lăng kon pơlei dêh char Thái Nguyên “Pơkăp tơdrong pơtho kang ƀô̆ ăn hơdrung kon kông tơmơ̆t lơ̆m dôm hnam trưng phôh thŏng dân tŏk nô̆i trŭ lơ̆m tơring”, duh jing minh trong jang kăp gĭt, hlôi tơgŭm pơklaih tơnap tap ƀơ̆t tơchơ̆t ‘nao minh ƀar xăh, thôn lơ̆m pơkăp tơnap tap ƀơm pơm kơđeh. Ƀok Nguyễn Thái Nam, Phŏ kơdră Anih jang hơvơn kon pơlei kơ dêh char, xơ̆ jang Kơdră Anih jang kon kông dêh char Thái Nguyên ăn tơbăt: Hopa kŏm Đảng ƀô̆ dêh char Thái Nguyên đei tơchơ̆t kăp gĭt, adrin đei 8% kon hơ ioh kon kông đei năm hŏk tơ̆ dôm hnam trưng dân tŏk nô̆i trŭ. Kiơ̆ Tơchơ̆t 39 anih jang pơtho pơhrăm dêh char Thái Nguyên hlôi pơkăp tôm kơsô̆ hŏk tro.  

Mưh nhen xơnăm 2016, dêh char Thái Nguyên oei  48 xăh tơnap tap noh truh đĭ xơnăm 2021, oei pă 14 xăh (tơjur 70%), kơsô̆ unh hnam hin dơnuh tơring kon kông păng groi kông tơjur 3% rim xơnăm. Đĭ xơnăm 2021, jâ̆p dêh char Thái Nguyên đei 73/100 xăh kon kông păng groi kông đei jơnei pơkăp tơring pơxĕl ‘nao, hloh 3 ‘măng pơkăp atŭm kơ teh đak. Dôm kơsô̆ kăp gĭt âu ăn ƀôh, đơ̆ng dôm tơchơ̆t kăp gĭt ăn kon pơlei kon kông, tơpă iŏk đơ̆ng dôm pơkăp jang tơtom kơ dêh char Thái Nguyên.