Kơdră Kuô̆k hô̆i Vương Đình Huệ pơma dơ̆ng, sơnăm 2022 tĕh đak bơ̆n jang đei lơ tơdrong jơnei gĭt kăl, tôm tơdrong. Mŭk drăm lơ̆m tĕh đak hơnơ̆ng đei vei kơjăp; kơjă tơmam đei vei lăng ‘lơ̆ng, kơsô̆ răt yoa tơmam lơ̆m sơnăm tŏk 3,15% lăp hăm kơsô̆ hơ găt đơ̆ng Kuô̆k hô̆i; jang tŏk GDP đei 8,02%, kơsô̆ lơ hlŏh lơ̆m 10 sơnăm âu ki; dôm tơdrong tih găh mŭk drăm đei vei lăng ‘lơ̆ng ngăl. Kuô̆k hô̆i, Anih chĕp kơ̆l pơgơ̆r Kuô̆k hô̆i, dôm anih jang kơ Kuô̆k hô̆i, Jơnŭm pơgơ̆r kon pơlei jơ̆p tơring hơnơ̆ng đei lơ tơdrong tơplih, pơm hơtŏk tơdrong ‘lơ̆ng, đei yoa mư̆h bơ̆ jang.

“Tơdrong Kuô̆k hô̆i set hơlen, tơchơ̆t 5 grŭp tơdrong tih, gĭt kăl tơ̆ Hop akŏm ưh ê ‘măng mă 2 vang tơgop hơmet pơ ‘lơ̆ng tơtom lơ tơdrong mơmat tat, tơhlăk tăk tơ̆ yăn âu, atŭm hăm ‘nŏh, pơjing tơdrong kăl vă bơ̆ jang tơdrong jang lơ̆m sơnăm 2023 păng dôm sơnăm đơ̆ng rŏng dơ̆ng”.

Kơdră Kuô̆k hô̆i Vương Đình Huệ athei, sơnăm 2023, rim tơring, anih jang kơpal, anih tĕch mơdro păng kon pơlei athei hlôh vao kơjăp, jang kiơ̆ dôm tơdrong tơchơ̆t, nơ̆r pơtho đơ̆ng Khul kơdră chĕp kơ̆l Trung ương Đảng, Tơdrong tơchơ̆t 68/2022 đơ̆ng Kuô̆k hô̆i găh trong jang atŏk tơiung mŭk drăm, tơpôl sơnăm 2023; mă loi athei tơplih ‘nao đon tơchĕng, đei trong jang ‘nao, ‘lơ̆ng, kơchăng, gơ̆h hơgei păng pran kơtang mưh chĕp kơ̆l pơgơ̆r.

Kơdră Kuô̆k hô̆i tơtă, athei hơtŏk tơdrong hơmet pơ ‘lơ̆ng trong pơgơ̆r jang tŏk, akŏm jơhngâm hơmet pơ ‘lơ̆ng mơmat tat, tơgŭm ăn tơdrong jang xa, tĕch mơdro kơ kon pơlei, anih tĕch mơdro, pơjing tơdrong ‘lơ̆ng păng jơhngâm pran ‘nao vă jang tŏk. Năng kăl tơdrong jang tŏk găh joh ayŏ kơ dŏ xoang hơtŏ hăm jang tŏk mŭk drăm, chĭnh trĭ, tơpôl; jăh tơchĕng hơlen, pơjing tơdrong jang tơm kơ tĕh đak găh jŏh ayŏ kơ dŏ xoang vă tưk tơiung tơdrong ‘lơ̆ng đơ̆ng joh ayŏ kơ dŏ xoang kiơ̆ nơ̆r pơtho đơ̆ng Tổng bí thư Nguyễn Phú Trọng. Bơ̆ jang ‘lơ̆ng dôm trong jang vei sơđơ̆ng tơdrong arih xa tơpôl, tơjur tơnuh hin kơjăp ‘lơ̆ng, lăp hăm khei ‘năr hơgăt, hơtŏ ‘lơ̆ng tơpôl, vei lăng cham char, pơ ‘ngơ̆t truh tơdrong arih xa găh tơmam drăm păng jơhngâm đon ăn kon pơlei, mă loi jĭ hăm bơngai đei kŏng, unh hnam tơnuh, dôm bơngai đei tơdrong arih xa mơmat tat tơ̆ tơring hơtăih yăih, tơring sơlam, achon kông tơ̆ đak dơsĭ, tơring kon kông oei xa.

Hơdai hăm ‘nŏh athei hơtŏk jơhngâm pran, hơmet pơ ‘lơ̆ng, vei kơjăp tơdrong sơđơ̆ng tĕh đak; hơtŏk păng tưk tơiung tơdrong pơvei jang tơbôl, hơtŏk tơdrong đei yoa, tơdrong ‘lơ̆ng đơ̆ng mât jang hơdoi hăm apŭng plenh tĕh, vei lăng ‘lơ̆ng tơdrong rơngei, jang hơdoi vă jang tŏk hrĕnh păng kơjăp. ‘Nŏh jĭ tơdrong tơm vă jang tŏk.

Vă bơ̆ jang hrơ̆ch ‘lơ̆ng păng đei yoa dôm tơdrong tơchơ̆t trŏ ƀlep đơ̆ng Hop akŏm ưh ê ‘măng mă 2, Kuô̆k hô̆i jăl XV, Kơdră Kuô̆k hô̆i Vương Đình Huệ athei: “Khul kơdră tĕh đak, Thủ tướng tĕh đak, Anih chĕp kơ̆l pơgơ̆r Kuô̆k hô̆i, Anih vei lăng hơdrĕch kon kông, dôm anih jang kơ Kuô̆k hô̆i, rim khul kơdră pơgơ̆r, anih jang kơpal lơ̆m tĕh đak, dôm Khul tang măt Kuô̆k hô̆i, dôm bơngai tang măt Kuô̆k hô̆i pơgơ̆r tơlĕch jang kiơ̆ hrĕnh, tơtom dôm khôi luơ̆t, Tơdrong tơchơ̆t ‘nao đei drơ̆ng nơ̆r, tơmât kơjăp đon tơchĕng hăm tơdrong pơgơ̆r jang, tơdrong jang kăn ƀô̆ vă pơm kiơ̆ ‘lơ̆ng thoi nơ̆r pơtho “kơpal, hơla mĭnh jơhngâm”, “rŏng năp, ‘ngieu ‘ma hiôk hian” mă Tổng Bí thư Nguyễn Phú Trọng đei lơ ‘măng pơma truh. Mă loi, dôm bơngai tang măt Kuô̆k hô̆i kiơ̆ đơ̆ng trong jang lăp ‘lơ̆ng, roi tơbăt hrĕnh, tôm tĕch ăn bơngai tăh hla lơ̆m tĕh đak dôm tơdrong iŏk đei đơ̆ng hop akŏm; chă mơ̆ng, chih akŏm păng roi tơbăt nơ̆r pơma, đon hơpơi ‘mĕh đơ̆ng bơngai tăh hla; dăr lăng ‘lơ̆ng tơdrong sek tơlang kiơ̆ dôm nơ̆r apinh, nơ̆r tơkêng đơ̆ng kon pơlei”.

Atŭm hăm ‘nŏh, kơchăng hơmet ‘lơ̆ng rim tơdrong pơvih ăn kon pơlei ngôi pơchơt Pơyan Puih mak, sơng Têt Nguyên đán Quý Mão chơt hơiă ‘nă hal, sơđơ̆ng ‘lơ̆ng, gơ̆h ‘mơ ‘met, pơjing jơhngâm pran ‘nao đơ̆ng tơring, đơ̆ng rim unh hnam, khŏm bơ̆ jang đei jơnei tơdrong tơchơ̆t đơ̆ng Hop akŏm mă XIII kơ Đảng; trong jang atŏk tơiung mŭk drăm, tơpôl sơnăm 2023 đơ̆ng dôm năr blŭng, khei blŭng kơ sơnăm ‘nao hloi.