Tổng thư ký, Kơdră chĕp pơgơ̆r Hơnih bơ̆ jang Kuô̆k hô̆i Bùi Văn Cường tơbăt, Jăl I, rim hơnih bơ̆ jang hlôi pơchoh trong, iung jang tơgŭm jơnei 2 ‘Măng hop akŏm hăt hot kơ Kuô̆k hô̆i, 8 ‘măng hop akŏm kơ Hơnih bơ̆ jang chĕp pơgơ̆r Kuô̆k hô̆i, lăng hơlen, pơdrơ̆ng kiơ̆ păng ăn tơgop nơ̆r hăm 02 khôi luơ̆t, 04 tơdrong tơchơ̆t kơ Kuô̆k hô̆i, 66 tơdrong tơchơ̆t đơ̆ng Hơnih bơ̆ jang Kuô̆k hô̆i; pơgơ̆r Hop akŏm kơdră tang măt Kuô̆k hô̆i joăt jang vă chă pơma dơnuh, tơgop nơ̆r găh 08 tơdrong vă pơjing khôi luơ̆t pơtruh ăn Kuô̆k hô̆i lăng hơlen pơdrơ̆ng kiơ̆ tơ̆ ‘Măng hop akŏm mă 7, Kuô̆k hô̆i jăl XV…

Bơ̆ jang pơchoh trong, tơgŭm ăn tơlĕch jang kiơ̆ rim tơdrong jang pơjing khôi luơ̆t hơnơ̆ng đei tơlĕch jang kiơ̆ kơjăp, ‘lơ̆ng hơnơ̆ng atŏk kơtang, kiơ̆ ƀlep Nơr pơma pơtôch 19 kơ Hơnih tơm Chinh trĭ, Tơdrong jang tơ iung pơjing Khôi luơ̆t, tơdrong tơchơ̆t tơm teh đak sơnăm 2024, Trong pơprŏ jang kơsô̆ 81 kơ Hơnih bơ̆ jang chĕp pơgơ̆r Kuô̆k hô̆i. ‘Ngoăih kơ ‘noh, tơmơ̆t dơ̆ng 19 tơdrong jang pơjing khôi luơ̆t ‘nao lơ̆m Pơprŏ jang kơsô̆ 81 vă tơtom tơlĕch jang kiơ̆ rim tơdrong tơchơ̆t đơ̆ng Đảng păng trŏ lăp hăm tơdrong ‘meh vă yan au.

Rim tơdrong jang tơbôl jang kiơ̆ kơjăp trong tơlĕch jang đơ̆ng Đảng, Teh đak, đei tơlĕch jang kiơ̆ kơtang păng jơnei lơ̆m rim tơdrong, ƀar pang păng lơ pang. Bơ̆ jang kơdră tang măt, bơ̆ jang pơrô̆ pơrôp kon pơlei, bơ̆ jang chă tơchĕng hơlen khoa hŏk hơnơ̆ng tơlĕch jang kiơ̆ ‘lơ̆ng, roi năr roi trŏ lăp hăm yan au.

      Lơ̆m jăl II au, rim hơnih bơ̆ jang kơ Kuô̆k hô̆i gô pơm pơkeh hla bơar au to pơtruh ăn Kuô̆k hô̆i pơdrơ̆ng kiơ̆ tơ̆ ‘Măng hop akŏm mă 7 hăm 09 tơdrong vă pơjing khôi luơ̆t, 01 trong vă pơjing Tơdrong tơchơ̆t; pơm pơkeh, sơđơ̆ng ‘lơ̆ng rim hla bơar choh tơbăt bơ̆ jang dăr lăng vă pơtruh ăn Kuô̆k hô̆i ăn tơgop nơ̆r găh 11 tơdrong vă pơjing khôi luơ̆t hlôi đei lơ̆m Tơdrong jang tơ iung pơjing khôi luơ̆t, tơdrong tơchơ̆t teh đak.

         Lăp đơ̆ng rŏng mơ̆ng nơ̆r tơgop tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang tơdrong jang lơ̆m khei 3 păng jăl I, rim hơnih bơ̆ jang kơ Kuô̆k hô̆i hlôi iung jang lơ tơdrong jang, tôch trŏ lăp; ‘moi kiơ̆ kơjăp trong pơprŏ jang kơ Đảng khul Kuô̆k hô̆i, adoi jang kiơ̆ ‘lơ̆ng hơ iă rim tơdrong tơlĕch jang hăt hot; bơ̆ jang kơ rim hơnih bơ̆ jang kăl, tơklep kơjăp hăm tơdrong yan au, tơklep kơjăp hăm nơ̆r pơrô̆ jang đơ̆ng Ban Bí thư, ƀlep hăm tơdrong tơchơ̆t kơ khôi luơ̆t.

Bơ̆ jang kơ Kuô̆k hô̆i tơlĕch tôm tong lơ̆m rim tơdrong pơjing khôi luơ̆t, dăr lăng păng tơchơ̆t rim tơdrong kăl kơ teh đak; bơ̆ jang tang măt kon pơlei; jang tơbôl; bơ̆ jang pơchoh trong; dăr lăng, pơrô̆ jang đơ̆ng Jơnŭm vei lăng kon pơlei; pơgơ̆r ‘lơ̆ng rim ‘măng hop akŏm kơ Kuô̆k hô̆i, ‘măng hop akŏm kơ Hơnih chĕp pơgơ̆r Kuô̆k hô̆i, rim hơnih bơ̆ jang kơ Kuô̆k hô̆i, rim tơdrong pơkăp jang lơ̆m tơdrong jang chinh trĭ ...v.v. Dôm tơdrong jang trŏ lăp hăm tơdrong đei ƀôh yan au, trŏ lăp hăm jơhngơ̆m đon hơpơi ‘meh vă đơ̆ng bơngai tăh hla păng kon pơlei. Tang măt ăn Hơnih bơ̆ jang chĕp pơgơ̆r Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang dôm tơdrong jơnei mă rim hơnih bơ̆ jang Kuô̆k hô̆i iŏk đei; rim kang ƀô̆ ling lang tơnăp, trŏ lăp lơ̆m jơnei atŭm kơ Kuô̆k hô̆i.

Lơ̆m khei năr kơnh, Kơdră chĕp pơgơ̆r Kuô̆k hô̆i Vương Đình Huệ athei: “Găh tơdrong bơ̆ jang kơ khei 4, jăl II, mă kăl ‘noh hơmet tơgŭm ăn hop akŏm Trung ương 9; ‘măng hop akom Kuô̆k hô̆i ‘măng mă 7 păng hơdrol kơ ‘noh, ‘măng hop akŏm mă 32, 33 kơ Hơnih bơ̆ jang vei lăng Kuô̆k hô̆i. Ĭnh athei lăp đơ̆ng rŏng hop akŏm au, Tổng thư ký, Kơdră Hơnih bơ̆ jang Kuô̆k hô̆i lăng hơlen, tơgoăt iŏk nơ̆r tơgop lơ̆m ‘măng bơ̆ jang vă dăr lăng tôm tong tơdrong đơ̆ng dang ei truh đĭ jăl II. Hăm rim hla bơar khôi luơ̆t păng rim hla bơar đei ƀơm truh tơdrong tơchơ̆t khôi luơ̆t, kăl dăr lăng hơlen tơmơ̆t lơ̆m tơdrong pơma dơnuh kơ ‘măng hop akŏm Hơnih bơ̆ jang ‘măng mă 32, 33 kiơ̆ mĭnh ƀar tơdrong pơkăp. Mă blŭng đĭ đăng rim tơdrong đơ̆ng dang ei truh đĭ jăl 2, tơlĕch jang hơdrol ‘noh ‘măng hop akŏm mă 7, Kuô̆k hô̆i jăl XV. Mă ƀar, đĭ đăng khôi luơ̆t păng trong vă pơjing Tơdrong tơchơ̆t tơdăh tim mă đei lơ̆m tơdrong Kuô̆k hô̆i tơchơ̆t lei kăl athei Hơnih tơm Tư pháp tang măt ăn Khul kơdră chĕp pơgơ̆r teh đak pơtruh ăn vă Hơnih bơ̆ jang Kuô̆k hô̆i lăng hơlen ‘moi kiơ̆ Hơnih bơ̆ jang Khôi luơ̆t tơmơ̆t lơ̆m tơdrong vă pơma dơnuh lơ̆m hop akŏm”.

 Kơdră chĕp pơgơ̆r Kuô̆k hô̆i jei pơkă, rim hơnih bơ̆ jang kơ Kuô̆k hô̆i dăr lăng trong jang, trong pơkăp găh vei lăng hrĕp dôm tơdrong kơtơ̆ng ang, trong bơ̆ jang vei răk hla bơar kăl, trong jang vei lăng năng tông tơdrong hrĕp kăl teh đak, vei lăng năng tông chinh trĭ lơ̆m hơnih, găh tơdrong pơma tơlĕch nơ̆r. Rim hơnih jang dăr lăng păng athei rim kang ƀô̆ jang kiơ̆ kơjăp tơdrong tơchơ̆t găh jang kiơ̆ bơ̆ jang bơ̆ jang vei lăng kang ƀô̆ păng tơdrong bơ̆ jang. Rim hơnih bơ̆ jang kơ Kuô̆k hô̆i kăl hơtok loi dơ̆ng jơhngơ̆m đon bơ̆ jang tơnăp lơ̆m rim tơdrong, adoi atŏk kơtang bơ̆ jang hơdoi pơđĭ găh lăm, găh ‘ngoăih lơ̆m jang kiơ̆ hơnăp jang, tơdrong jang đei pơjao.