Đơ̆ng năr blŭng sơnăm ‘nao 2023, Dơnŏ anih vei lăng kon kông hlôi pơgơ̆r Hop akŏm pơtôch tơdrong jang kon kông sơnăm 2022; hop akŏm pơtôch 1 sơnăm jang kiơ̆ Tơdrong jang the đak atŏk tơ iung Mŭk drăm-tơpôl tơring kon kông păng groi kông jăl jang 2021 - 2030 păng tơlĕch jang tơdrong jang sơnăm 2023.

Gơnơm pơrô̆ jang kơtang kơ Khul kơdră chĕp pơgơ̆r Tĕh đak, păng tơdrong hơdrin đơ̆ng kon pơlei rim hơdrung lơ̆m tơlĕch jang hrơ̆p mĭnh ‘măng rim trong jang tơgŭm kon kông, trong jang tơgŭm djru erih sa tơpôl kơna tơdrong erih sa kơ kon pơlei rim hơdrung kon kông sơđơ̆ng păng roi năr roi sơđơ̆ng hlŏh. Sơnăm 2022, ŭnh hnam dơnuh lơ̆m tơring kon kông tơjur 3% lơ̆m sơnăm. Kơdră chĕp pơgơ̆r Dơnŏ anih bơ̆ jang vei lăng Kon kông Hầu A Lềnh tơbăt, sơnăm 2023, tơdrong kăl hlŏh ‘nŏh tơlĕch jang rim tơdrong vă jang lơ̆m Tơdrong jang Teh đak hăm kon jên jang tôch kơ lơ đơ̆ng sơnăm 2022 pơtrŭh ăn păng trong tơlĕch jang kơ sơnăm 2023.

Kiơ̆ tơroi đơ̆ng Anih jang Măt trâ̆n tôh kuôk apŭng Lâm Hà, dêh char Lâm Đồng, 5 xơnăm kơ âu Khul Kơpal teh đak hlôi axong hloh 45 tih hlj đơ̆ng lơ kơsô̆ jên jang ăn tơring kon pơlei kon kông lơ̆m apŭng. Lơ̆m noh, hơdăh hloh noh tơgŭm bơ̆ hnam păng pơm trong jang xa ăn kon pơlei hơtŏk tơ-iung. Mă kăl noh, lơ̆m tơdrong tơgŭm jên jang, jơnŭm pơgơ̆r tơring păng anih jang kơpal hlôi tơgŭm kon pơlei hơtŏk pơtăm pơmur pơm brai. Dang ei, Lâm Hà jing tơring đei hơgăt teh pơtăm pơmur xă hloh tơ̆ d/c Lâm Đồng hăm hloh 3.620 ha pơmur. Ƀok K’Tân Phŏ Kơdră Anih Măt trâ̆n tôh kuôk apŭng Lâm Hà tơroi: “Adrol ki Đảng, Khul Kơpal teh đak duh hlôi tơrĕk tơgŭm, păng dang ei noh tơgŭm lơ hloh. Hơdăh nhen tơgŭm bơngai hin dơnuh bơ̆ hnam oei, tơgŭm chă pơm jang. Noh jing tơgŭm jên pơtăm pơmur rong hơdrông pơm brai, rim unh hnam 20 trĭu hlj dăh mă  50 trĭu hlj. Dăh mă tơgŭm hăm tơdrong man hnam oei ‘nao ăn bơngai hin dơnuh tơnap găh hnam oei, rim unh hnam đei iŏk tơgŭm 50 trĭu hlj. Unh hnam tơgop đơ̆ng 10 truh 20 trĭu hlj vă bơ̆ hnam kơjăp. Măt trâ̆n tôh kuôk Việt Nam apŭng Lâm Hà nhôn pơm kiơ̆ xơnong hơlen chă jâu đơ̆ng tơpôl vă hơlen tơdrong tơgŭm kon pơlei hơtŏk mŭk drăm, adrin pơm pơdrŏng”.

Apŭng Lạc Dương, dêh char Lâm Đồng đei vă jê̆ 70% măt bơngai ‘noh kon pơlei kon kông. Gơnơm tơlĕch jang ‘lơ̆ng rim tơdrong vă jang đơ̆ng Tơdrong jang tĕh đak tơmơ̆t jên jang, hơdrin tơphih ‘nao ‘long pơtăm, jang kiơ̆ khoa hok kih thuơ̆t lơ̆m choh jang sa kơna tơdrong tơjur dơnuh hin tĕnh koăng. Kiơ̆ đơ̆ng Ƀok Cill Poh, Kơ iĕng kơdră chĕp pơgơ̆r apŭng Lạc Dương, mă đơ̆ng 2 sơnăm au ki đei răm đơ̆ng jĭ hơbŭh Covid-19 pơrăm, mă lei rim tơmam drăm choh jang sa nhen ‘long pơgang Atisô, pơkao, rim kơ loăi ‘nhot păng chehphe jei tĕch mơdro sơđơ̆ng, kơjă măt kơna tơdrong erĭh sa kơ kon pơlei tơplih ‘nao; ŭnh hnam dơnuh lơ̆m apung tơjur đơ̆ng 8,6 lê̆ pă 5,8%, jang keh đang hloh nơ̆r tơlĕch jang.“Lơ̆m choh jang sa au ki ‘noh kon pơlei nhôn băt jang sa kiơ̆ kmăi kmŏk hơgei, nhen pơtăm ‘nhot, pơkao lơ̆m hnam pơnil, pơtăm pơkao lơ̆m hnam hơdrau, kơna jang sa iŏk yua kơjăp. Găh tơ iung pơjing tơring tơrang ‘nao ‘nŏh đĭ đăng tơring, thĭ trân kơ apŭng jei iŏk đei, sơđơ̆ng tơring đei kơjăp. Kon pơlei hlôi băt jang sa, băt hơdrin atŏk tơ iung mŭk drăm ŭnh hnam. Gơnơm đơ̆ng noh ŭnh hnam dơnuh tơjur kơtang pơtêng hăm trong pơjao ăn”.