Lơ̆m Khei jang ‘Mêm bơnat sơnăm âu, pơtơm đơ̆ng năr 1/5 truh năr 31/5, tôm Jơnŭm jang hơdrin tơgŭm 100.000 anih ‘mêm bơnat. Tơ̆ lêh pơtơm, Kơdră tơdăng kơ teh đak bơ̆n Võ Thị Ánh Xuân hlôi pơjao 300 suơ̆t jên hŏk đei kơjă 300 trĭu hlj ăn kơ đe hŏk tro kon kông găn hloh tơnap tap hŏk hơgei lơ̆m dêh char Điện Biên. Jơnŭm jang ‘Long pơglang brê Việt Nam adoi pôk bơnê hăm dôm jơnŭm jang, anih jang mŭk drăm, tơ-‘ngla bơngai jang hlôi tơgŭm hăm kơsô̆ jên hloh 480 tih hlj.

Ƀơ̆t ‘măng âu, Jơnŭm jang ‘Long pơglang brê Việt Nam adoi pơgơ̆r jang hadoi pơgơ̆r Kơchơ ‘mêm bơnat ăn 500 bơngai mă teh đak tơchơ̆t tơgŭm, bơngai đei tơdrong hơrih tơnap tap lơ̆m dêh char Điện Biên răt tơmam drăm kăl hăm kơphĭu răt tơmam đei kơjă 500.000 hlj 1 kơphĭu păng pơgơ̆r Tơdrong akŏm plang pham ‘mêm kơ-eng, tơroi gah tơdrong asong sĕch pham pơjing đei, hăm tơdrong vang jang đơ̆ng pơhlom 500 ‘nu.