Yơ̆ng âu ki, Jơnŭm jang găh bơngai ƀơm pơgang pơnhŭl da cam/dioxin dêh char Kon Tum jang atŭm hăm Kŏng ti tĕch pơdro Tŏng hơp Kon Tum pơgơ̆r axong jê̆ 400 tơpu tơmam Têt đei kơjă hloh 146 trĭu hlj ăn bơngai hơven hơvo mă ƀơm pơgang pơnhŭl da cam hăm chăl mă 3 tơ̆ dôm apŭng: Đăk Hà, Kon Braih, Ngọc Hồi păng pơlei tơm Kon Tum. Atŭm hăm noh Jơnŭm jang găh bơngai ƀơm pơgang pơnhŭl da cam/dioxin dêh char Kon Tum duh axong Jên mong tơgŭm bơngai ƀơm pơgang pơnhŭlda cam/dioxin hloh 137 trĭu hlj axong ăn 846 ‘nu ƀơm răm lơ̆m tơring teh kơ dêh char.

Adrol kơ noh, Kŏng đoan dôm Anih jang kŏng ngĭp – Anih jang mŭk drăm dêh char Kon Tum jang atŭm hăm Kŏng đoan Viên chư̆k pơgơ̆r Tơdrong akŏm Têt tơnŏ - Puih mak tơguăt tơguăl xơnăm 2022. Ăh tơdrong akŏm đei 360 đoan viên kŏng đoan, bơngai jang đei tơdrong erih tơnap tap đei axong rim tơpu tơmam đei kơjă đơ̆ng 500 rơbâu truh 1 trĭu hlj. ‘Nguaih kơ noh, Kŏng đoan dôm Anih jang kŏng ngĭp – Anih jang mŭk drăm dêh char Kon Tum duh axong 200 tơpu tơmam ăn đoan viên kŏng đoan păng bơngai jang. ‘Nhŏng Trần Duy Hưng, bơ̆ jang tơ̆ Kŏ\ng ti Axong ming man hơtŏk hnam Anih jang mŭk drăm dêh char Kon Tum đei 2 ‘nu kon ƀơm jĭ jăn, tơdrong erih mŭk drăm unh hnam tơnap tap ăn tơbăt: “Xơnăm 2022 anih jang duh hlôi pơm trong hiôk tôm tong kiơ̆ pơkăp ăn bơngai pơm jang. Inh hmach bơnê kơ dôm anih jang tơpôl, mă kăl noh anih jang kŏng đoan hlôi tơnăng truh bơngai jang đei tơdrong erih tơnap tap. Unh hnam đei 2 ‘nu kon hơ-‘lâ̆p jĭ jăn adoi akŏm đei minh pơyan Têt tơnŏ păng tơguăt tơguăl”

Pơm kiơ̆ dôm tơdrong jang ‘mêm bơnat ƀơ̆t pơyan Puih mak Quý Mão 2023, đe mơlôh Đăk Lăk tơlĕch lơ tơdrong jang ‘nao, hơyak truh lơ khul bơngai phara băl tơ̆ dôm tơring. Chĕp hla kơphĭu axong tơmam lơ̆m ti đei kơjă 500 rơbâu hlj, pơmai H’No Kbuôr, tơ̆ pơlei Kmrơng Prong A, xăh Ea Tu, pơlei tơm Buôn Ma Thuột tơhăt tơmơ̆ng dôm bơngai năm jang tơroi găh dôm tơmam đei lơ̆m “Siu thĭ mini” vă rơih ăn kơdih po dôm tơmam drăm kăl. Pơmai ăn tơbăt: “Đei tơdrong tơgŭm đơ̆ng đe kơpal Jơnŭm jang găh bơngai măt tol adoi nhen dôm anih jang ‘mêm bơnat, ăh Têt adoi nhen đei khul jang ‘mêm bơnat truh noh nhôn adoi đei axong ăn dôm tơmam ‘mêm kơ eng đơ̆ng rim bơngai răk ăn kơ po. Inh ƀôh tơdrong jang âu noh kăp gĭt, tơnŏ ‘lơ̆ng, hăp tơgŭm inh adoi nhen bơngai nai, minh păh vă hơlêm duh nhen tơdrong xô̆ hơ-iă ăn kơdih po inh”

Hăm rim hla kơphĭu răt tơmam đei kơjă 500 rơbâu hlj, bơngai iŏk tơmam axong gô kơdih rơih ưh kơ huach jên dôm tơmam mă po kăl tơ̆ siu thĭ nhen: xĭk, đak toh, phe, mi tôm, ƀoh ƀôk ngok, ƀanh kĕo âu to. Xơnăm âu, tơdrong jang axong ăn 700 kơphĭu răt tơmam ăn bơngai hin dơnuh tơ̆ pơlei tơm Buôn Ma Thuột păng thĭ xăh Buôn Hồ.

Pơmai H’Giang Niê, Ƀĭ thư anih jang Đoan dêh char Đăk Lăk ăn tơbăt, atŭm hăm “Siu thĭ mini Tết 0 hlj”, khei năr âu, tôm 22 anih jang đoan lơ̆m jâ̆p dêh char adoi đei dôm tơdrong jang hơdăh tơnăng truh bơngai hin dơnuh, mă tơm noh: khăm hơlen axong pơgang hơmet jĭ ưh iŏk jên, axong tơmam drăm xa, man hnam ‘mêm kơ eng, axong ăn gre jrot, jên hŏk ‘nâu nai hia. ‘Nâu jing dôm tơdrong jang kăp gĭt tơgop atŭm hăm tơring vă tơgŭm ăn bơngai hin dơnuh gơh chă pơchơt puih mak, xơng têt: “Nhôn lăng kăl adrol hloh noh bơngai jang, bơngai hin dơnuh păng mă kăl noh đe hơ-ioh đei tơdrong erih tơnap tap. Păng xơnăm âu nhôn xơkơ̆t đei minh khul ‘nao noh bơngai ‘nao lĕch keh đang đơ̆ng pơm linh.  Hăm dôm khul bơngai âu noh nhôn ‘meh jang tơnăp tơdrong jang tơgŭm ăn khul linh hăm dôm bơngai tŏk bŏk oei pơm linh. Păng hăm dôm bơngai hlôi keh đang pơm linh chôt vih hăm tơring adoi đei tơnăng tơgŭm, pơm thoi yơ vă ƀôh hơdăh tơdrong jang chĭn trĭ păng tôm jăl jang kơpal kơ đoan păng dôm jăl jang Đảng adoi đei tơnăng tơgŭm, vă hơlêm đom bơnôh lơ̆m xơnăm 2023 noh pơtoi adrin lơ̆m tơdrong hơtŏk mŭk drăm adoi nhen vang akŏm lơ̆m dôm tơdrong jang kơ anih jang đoan, hô̆i lơ̆m tơring”

Anih Axong jang dêh char Đăk Lăk duh hlôi pơgơ̆r Tơdrong akŏm  “Têt akŏm tôm” xơnăm 2023 hăm hơnăn “Têt akŏm tôm  - Puih mak tơguăt tơguăl”. Kiơ̆ đơ̆ng noh, tơbang đon bơnôh, tơdrong tơgŭm đơ̆ng dôm anih jang Kŏng đoan hăm đoan viên, bơngai jang đei tơdrong erih tơnap tap, bơngai ƀơm tơdrong jĭ đunh năr, xar bar lơ̆m pơm jang... vă đe yĕt da ƀiơ̆ tơnap tap, tơgŭm ăn bơngai jang xơng Têt Nguyên đăn Quý Mão 2023 tơnŏ, rơhŏ rơhŏm. Lơ̆m tơdrong akŏm, đe đoan viên, bơngai jang hlôi đei mơ̆ng lăng tơdrong joh hơri hăm dôm ƀai hơri hơ-‘ngươ̆u kơ Đảng, xô̆ hơ-iă Puih mak, akŏm pơma dơnuh, chă rơih pôk hơpăh. Ƀơ̆t ‘măng âu, Anih Axong jang dêh char Đăk Lăk axong 5 tŏ Hnam tơnŏ Kŏng đoan (50 trĭu hlj 1 pôm hnam) ăn dôm unh hnam tơnap tap găh hnam oei păng axong 500 tơpu tơmam ăn đoan viên, bơngai jang.