Tơpăt păng tơnăp. Noh jĭ tơdrong mă rim bơngai tang măt păng kon pơlei tah hla adoi ƀôh hơdah lơ̆m 2 năr minh puơ̆t apinh tơl nơ̆r. Rim bơngai tang măt ăn Kuôk hô̆i hlôi pơtruh nơ̆r apinh kơđeh, hơdah trŏ tơdrong kăl lơ̆m tơdrong hơrih: mă kăl, ưh đei pơngơ̆t apinh gah dôm tơdrong "đei ƀôh" lơ̆m tơpôl. Tơpăt tơbang tơdrong oei tơjruh, rim bơngai tang măt hơpơi ‘meh Jơnŭm pơgơ̆r teh đak, rim hơnih jang tơm pơtoi đei trong jang kơtang, tơnăp, kơyuơ tơdrong hơtŏk tơ-iung tenh, kơjăp sơđơ̆ng kơ teh đak: "Apinh tơl nơ̆r hăm tơdrong tơpăt jue, akŏm đơ̆ng tơdrong pơgơ̆r đơ̆ng Kơdră Đoan, adoi nhen nơ̆r pơtruh đơ̆ng bơngai apinh păng tơdrong tơl nơ̆r đơ̆ng đe kơdră kơ dôm anih jang, đơ̆ng Phŏ Thủ tướng teh đak păng tơdrong tơl nơ̆r tơpăt jue".

 “Dôm nơ̆r apinh mă bơngai tang măt pơtruh, kơdră anih jang hlôi tơl nơ̆r trŏ tơdrong. Inh lăp kơ đon kơlih dôm trong jang mă Ƀô̆ trương tơlĕch"

Puăn "kơdră kơpal" anih jang dơnơm chih tơbang nơ̆r tơl adoi jĭ dôm ƀô̆ trương, kơdră anih jang dơnơm ‘măng mă blŭng tơl nơ̆r apinh tơ̆ Kuôk hô̆i jăl 15. Hăm sơnong jang tơnăp, trong jang hơdah păng pơkăp lơ̆m pơgơ̆r jang, vei lăng, rim Ƀô̆ trương, kơdră anih jang dơnơm ưh đei veh ver dôm nơ̆r apinh đơ̆ng bơngai tang măt, đei trong jang hơdah hăm lơ tơdrong mă bơngai tang măt pơtruh. Minh ƀar bơngai tang măt Kuôk hô̆i sơkơ̆t hơdah: “Inh ƀôh hơdah Ƀô̆ trương Anih jang Mŭk drăm păng Cham char lui ngeh, tơpăt tơl nơ̆r kơtă lơ̆m tôm tơdrong apinh đơ̆ng bơngai tang măt Kuôk hô̆i. Gah nơ̆r tơl đơ̆ng Ƀô̆ trương noh inh tôch lăp kơ đon. Inh pơtruh nơ̆r pơma đam vă pơm hơdah hloh dôm tơdrong jang tơgar kôch chuơh mă pơrăm truh tơ̆ cham char đak dơsĭ”.

 “Anih jang Kŏng thương, anih jang vei lăng kơ teh đak đei minh tơdrong hơlen, sơkơ̆t dôm tơdrong tơm pơm ăn anih jang mŭk drăm lĕch jăk đơ̆ng tơring jang xa. Rim anih jang mŭk drăm athei jang gah tơdrong jang, tĕcch tơmam drăm kiơ? Sơnăm pơm jang kơ anih jang mŭk drăm ‘noh dôm yơ, vă đei trong jang tơgŭm mă trŏ ƀlep. Kĕ jang đei thoi noh bơ̆n pơtơm gơh đei trong jang tơgŭm ăn anih jang mŭk drăm”

Tơl nơ̆r hơnăp Kuôk hô̆i, Ƀô̆ trương Anih tơm Mŭk drăm păng Cham char Đặng Quốc Khánh tơƀôh hơdah tơdrong tơnap tap gah tơmam drăm ming man ăn dôm tơdrong jang tơm kơ teh đak, mă kăl ming man jăl trong tih; tơbang hơdah dôm trong jang vă "pơ-‘lơ̆ng" dôm  "đak krong răm" kơyuơ ‘mê̆ ‘mach cham char pơm đei.

Sơkơ̆t hơdah, akŏm hơtŏk joh ayŏ tơring kon pơlei kon kông, Ƀô̆ trương Anih tơm Joh ayŏ - Tơplŏng kơdâu păng Tơmang pơhiơ̆ Nguyễn Văn Hùng akhan: pơkăp jang joh ayŏ tơ̆ tơring jĭ trong jang kăl păng tôm tong vă pơjing đei cham char joh ayŏ. Atŭm hăm noh ăn tơbăt, gô đei trong jang ‘nao, pơm trong hiôk hloh ăn bơngai tơplŏng kơdâu, bơngai jang joh ayŏ đơ̆ng rŏng kơ akŏm pơlong, pơdah đei jơnei...

Tơl nơ̆r hơnăp Kuôk hô̆i, Phŏ Thủ tướng teh đak bơ̆n Trần Hồng Hà ră hơdah dôm trong pơgơ̆r hơmet kơjă vă vei sơđơ̆ng tơchơ̆t hơlen tơdrong huach kư̆ kă ah hơmet hơtŏk jên khei jang đơ̆ng năr 01/7 âu kơnh.

Bơngai tang măt Phạm Thị Thanh Mai, khul Hà Nội pơtruh nơ̆r: "Phŏ Thủ tướng jĭ bơngai hlôh vao hơdah gah tơl nơ̆r apinh jet lơ̆m hop akŏm kơ Kuôk hô̆i. Nhôn ƀôh hơdah dôm tơdrong đei apinh jet Phŏ Thủ tướng adoi băt tôm tơdrong, tơl nơ̆r tơpăt hăm dôm tơdrong đei apinh. Đei dôm tơdrong hơdah păng đei dôm trong jang tơnăp noh nhôn hơpơi ‘meh athei đei jơ ‘năr vă pơkăp pơm jang kiơ̆ tơchơ̆t tơlĕch. Tơdrong mă noh kăp gĭt tơpă vă kon pơlei tah hla, tôm kon pơlei, adoi nhen Kuôk hô̆i hơlen lăng".

Atŭm hăm dôm trong jang păng nơ̆r pơkăp đei rim ƀô̆ trương, kơdră anih jang dơnơm tơlĕch lơ̆m ‘măng hop akŏm âu, bơngai jang tang măt păng kon pơlei tah hla hơpơi ‘meh, trong jang hơlen gô đei iŏk jang tơnăp vă vei sơđơ̆ng dôm trong tơlĕch jang đei iŏk jang jơnei, iŏk yua tơdrong tơnăp đơ̆ng apinh jet tơl nơ̆r đei ƀôh tơpă.