Pha hăm dôm tơdrong joăt au ki, tơ̆ ‘măng hop akŏm au, Kuô̆k hô̆i hơpĭnh kiơ̆ rim tơdrong jang. Kiơ̆ kơ ‘noh, rim kơdră jang lơ̆m Khul kơdră chĕp pơgơ̆r teh đak jei tơl hơdăh dôm nơ̆r hơpĭnh ƀơm truh dôm hơnăp jang vei lăng, chĕp pơgơ̆r; lăng hơlen dơ̆ng dôm tơdrong mă bơ̆n hlôi pơkăp, tơlĕch jang kiơ̆ truh dang yơ.

Bơngai tang măt Tạ Văn Hạ, Khul Quảng Nam hôn bơnê kơtang nơ̆r pơma đơ̆ng rim Kơdră dơnơm păng rim kơdră bơ̆ jang lơ̆m Khul kơdră chĕp pơgơ̆r Teh đak, dôm nơ̆r tơl hlôi trŏ lăp hăm dôm nơ̆r hơpĭnh đơ̆ng kơdră tang măt Kuô̆k hô̆i chă hơpĭnh. Tơdrong tơplih ‘nao au pơm ăn rim Kơdră chĕp pơgơ̆r Teh đak, kơdră chĕp pơgơ̆r rim Hơnih bơ̆ jang kăl băt hơdăh dôm tơdrong bơ̆ jang. ‘Nau jei mĭnh tơdrong rơvơn vă kơdră tang măt Kuô̆k hô̆i dăr lăng hơlen rim Kơdră dơnơm păng rim kơdră jang lơ̆m Khul kơdră chĕp pơgơ̆r teh đak lơ̆m tơdrong jang kiơ̆ nơ̆r pơkăp đơ̆ng kơdih tơ̆ rim ‘măng pơgơ̆r hơpĭnh jet:“Rim kơdră tang măt Kuô̆k hô̆i chă hơpĭnh rim tơdrong, trŏ lăp hăm rim tơdrong tơchơ̆t, hlôi hơlen tôch brĕ rim tơdrong tơchơ̆t dăr lăng hơlen nơ̆r hơpĭnh hơlen đơ̆ng Kuôk hô̆i. Rim kơdră dơnơm hơnơ̆ng tơgoăt iŏk dôm nơ̆r hơpĭnh păng tơl tơblang ăn tôch hơdăh, tôch kơ ƀlep dôm tơdrong mă kơdră tang măt chă hơpĭnh. Bơngai tang măt jei hơpĭnh se le truh troch. ‘Ngoăih tơdrong hơpĭnh hơlen, adoi pơma tơlĕch dôm nơ̆r tơgop, nơ̆r hơpĭnh hơthei, pơchoh ăn lơ trong jang vă tơgum ăn Khul kơdră chĕp pơgơ̆r teh đak, tơgŭm ăn rim Kơdră dơnơm rim hơnih jang lơ̆m bơ̆ jang chĕp pơgơ̆r ‘lơ̆ng hơ iă hloh dơ̆ng”

Bơngai tang măt Tô Thị Bích Châu, Khul pơlei tơm Hồ Chí Minh akhan, ‘măng hơpĭnh păng tơl nơ̆r hơpĭnh đei pơgơ̆r tôch kơ ‘lơ̆ng hơ iă, dôm nơ̆r hơpĭnh đơ̆ng rim kơdră tang măt pơma tơlĕch tơ̆ hop akŏm ‘nŏh dôm tơdrong mă bơngai tăh hla hơpơi ‘meh vă băt hơdăh. Mă lei, hăm mĭnh ƀar tơdrong jang nhen tơdrong jang pơgang, pơtho pơhrăm, joh ayŏ…jơ ‘năr ‘măn ăn kơdră tang măt hơpĭnh ưh kơ đunh, jơ ‘năr ăn rim kơdră chĕp pơgơ̆r hơnih bơ̆ jang tơl ăn ưh kơ tôm vă tơblang hơdăh dôm tơdrong mă bơngai tah hla hơpơi ‘meh vă.“Bơ̆n pơgơ̆r chă hơpĭnh lơ tơdrong dêh hnang, pơđĭ rim tơdrong jang găh mŭk drăm, joh ayŏ, oei sa, tơpôl, chinh trĭ, sơđơ̆ng kơ teh đak kơna lơ̆m 2 năr 1 poăt ‘noh chă hơpĭnh, tơl tơblang hơdăh ưh kơ tôm ôh. Kơ yơ lơ loh dôm nơ̆r tơl tơblang đơ̆ng kơdră dơnơm rim hơnih bơ̆ jang jei ưh kơ kĕ kơ đĭ, ưh kơ tôm tong ôh. Kơ yuơ bơngai tang măt ‘meh vă băt hơdăh kơna chă pơma dơnuh dih băl mă lơ hloh dơ̆ng. Kơ yuơ lơ loh, tơdăh đei pơgơ̆r hơpĭnh lơ̆m khei năr kơnh, kiơ̆ kơ ĭnh bơ̆n chă rơ̆ih mĭnh ƀar tơdrong kăl ayơ ‘nŏh vă chă hơpinh hơlen păng tơl hơdăh tôm tong hlŏh dơ̆ng”.

Chă lăng, mơ̆ng ‘măng hơpĭnh păng tơl nơ̆r hơpĭnh tơ̆ ‘măng hop akŏm mă 6, Kuô̆k hô̆i jăl XV, bơngai tah hla Lê Hữu Chỉnh, oei tơ̆ phương Thắng Lợi, pơlei tơm Buôn Ma Thuột, dêh char Dak Lăk akhan, bơ̆ jang hơpĭnh hơlen tơ̆ ‘măng hop akŏm mă 6 hlôi tơƀôh hơdăh tôch tơpăt, tôch trŏ lăp, tôch hơdăh. Bơngai hơpĭnh păng bơngai tơl nơ̆r hơpĭnh hơmet ăn tôch kơbrĕ, băt hơdăh dôm tơdrong chă hơpĭnh, tơl tơblang hơdăh. “Ƀar năr mĭnh poăt chă hơpĭnh păng tơl hơdăh, kiơ̆ kơ ĭnh ƀôh rim kơdră chĕp pơgơ̆r hơnih bơ̆ jang hlôi tơl tơblang ăn tôch hơdăh, Thủ tướng păng Kơdră chĕp pơgơ̆r Kuô̆k hôi jei lei lăi mơ̆n. Kiơ̆ kơ ĭnh, ‘nau tơdrong tơplĭh tôch kơtang hloh. Trong tơlĕch jang tih hloh iŏk đei jơnei đơ̆ng twodrong sơđơ̆ng chinh trĭ truh tơ̆ mŭk drăm tơpôl păng mă kăl Kuô̆k hô̆i hăm Khul kơdră chĕp pơgơ̆r Teh đak hlôi lăng ba kơjăp găh kon bơngai, pơtih gia nhen hơmet pơ ‘lơ̆ng jên khei; nhen tơdrong pơtho pơhrăm, tơdrong jang pơgang, tơdrong jang joh ayŏ kơdŏ soang oei sa, kơtơ̆ng ang hlôi lăng ba kơjăp; atŭm hăm trong gre nơnăm, dơnŏk duk, cham gre păr đơ̆ng noh hơdrin iŏk đei truh 3.000km trong gre rĕnh lơ̆m jăl jang au, kiơ̆ kơ ĭnh ‘nau jing tơdrong jang tih tên pran kơtang hloh. Jĭ mĭnh ‘nu bơngai tăh hla, ĭnh tôch kơ chơt hiôk păng lui kơjăp kơ Kuô̆k hô̆i gô jang keh đang rim tơdrong jang đei tơlĕch ăn”.

Hơlen găh nơ̆r tơl hơdăh đơ̆ng Kơ iĕng Thủ tướng Teh đak Trần Lưu Quang, bơngai tang măt Nguyễn Thị Sửu, Khul Thừa Thiên Huế tơbăt:“Ĭnh ƀôh găh jơhngơ̆m đon tơpăt, drơ̆ng nơ̆r chiu pŭ dôm tơdrong jang tim mă trŏ lăp. Hlôi drơ̆ng chiu pŭ dôm tơdrong jang tim mă trŏ lăp ‘noh ưh kơ jor gô hơmet pơ ‘lơ̆ng dôm tơdrong jang tim mă trŏ lăp păng twochă đei trong hơmet pơ-‘lơ̆ng ăn dôm tơdrong tơnap tap, tơhlăk tơhlĭn. Tơdrong mă bơngai tang măt chă hơpĭnh dôm tơdrong ‘noh ưh khan vă pơm tơnap ăn Khul kơdră chĕp pơgơ̆r teh đak, athei xek tơlang keh đang hloi, mă lei tơdrong hơpĭnh au jĭ vă đei tơdrong gơnang kơtang hơmŏ đei trong xek tơlang ăn dôm tơdrong tơguưm djru, tơdrong hơpơi ‘meh vă đơ̆ng bơngai tăh hla”.