Bơngai tang măt Nguyễn Chu Hồi, khul Kuô̆k hô̆i plt Hải Phòng akhan, tơdrong tơproh trong jang atŭm kơ tĕh đak đei lơ tơdrong ‘nao, kŭm hăm prŏh hơmet tơdrong jang pơm trong, lơ̆m nŏh kăl hơmet pơ ‘lơ̆ng tơdrong ưh kơ đei trong tơƀưh dôm dêh char tơter đak dơsĭ găh tơring Kơtu păng tơring Tŏk bŏk. Kiơ̆ bơngai tang măt âu mơ̆n, tơproh trong jang hlôi hơlen truh lơ anih jang nai vă pơm lăp hăm chăl jang mŭk drăm kơsô̆ păng vei lăng cham char hăm dôm tơring vei lăng tơmam bri brăh vă hơtŏk tơdrong tơjră hăm tŏ ‘mi kial tơplih:

“Anih jang hăm kơmăy sô̆ tơguăt rim tơring dang ei ưh lăp yak hăm gre ôtô, hao gre păr đĕch mă oei tơguăt hăm kơmăy internet hai. Mă 3 ‘nŏh pơm lăp hăm tŏ ‘mi kial tơplih, dang ei athei đei anih vei bri, athei pơtăm dơ̆ng bri, krơ̆p tơter đak dơsĭ vă găn ƀiơ̆ tơdrong ƀơm ưh ‘lơ̆ng đơ̆ng sar bar, tŏ ‘mi kial tơplih. Tơdrong ‘nŏh ăn ƀôh, tơdrong Tơproh trong jang atŭm kơ tĕh đak hlôi druh kiơ̆ tom tơdrong ‘mĕh vă chăl ‘nao păng pơtơm tơchĕng truh tơdrong tơmât yoa ‘lơ̆ng kơmăy kơmŏk.”

Oei hăm bơngai tang măt Bùi Hoài Sơn, Khul bơngai tang măt Kuô̆k hô̆i plt Hà Nội, Tơdrong tơproh trong jang atŭm kơ tĕh đak hlôi tơguăt kơjăp rim tơdrong jŏh ayŏ kơ dŏ xoang; năng kăl, sek tơlang ‘lơ̆ng tơdrong pơvei đơ̆ng jang tŏk păng vei lăng, tưk tơiung kơjăp kăp gĭt đơ̆ng jŏh ayŏ kơ dŏ xoang, jơ hnơr arih. Vei kơjăp, pơm hơtŏk dôm kơjă ‘lơ̆ng đơ̆ng jŏh ayŏ kơ dŏ xoang kơ dôm hơdrĕch kon kông; tưk tơiung kơmăy kơmŏk jŏh ayŏ kơ dŏ xoang pơm tơlĕch lơ tơmam, tơdrong pơvih găh jŏh ayŏ kơ dŏ xoang đei ư hơnhang păng ƀơm ‘lơ̆ng lơ̆m tơring păng apŭng plenh tĕh, kiơ̆ tơdrong tơchơ̆t đơ̆ng Hop akŏm mă 13 kơ Đảng:

“Tơproh trong jang atŭm kơ tĕh đak hlôi đei tơrĕk truh tơdrong jŏh ayŏ kơ dŏxoang, mă loi jĭ bơ̆n hlôi tơrĕk truh trong pơgơ̆r jŏh ayŏ kơ dŏ xoang. Tơdăh bơ̆n đei dôm trong pơgơ̆r jŏh ayŏ kơ dŏ xoang 'lơ̆ng, tơgăl nhen anih 'măn răk, hnam hơri, anih mong đŏk hla ar, ming pơdă... 'nŏh jĭ dôm anih vă bơ̆n pơgơ̆r dôm tơdrong tơgăl hăm tơdrong jang tŏk đơ̆ng tĕh đak. Mă lei kŭm kăl đei dơ̆ng dôm tơdrong nai hai păng bơ̆n đei lơ tơdrong jŏh ayŏ kơ dŏ xoang pha ra băl, đei lơ tơdrong kăp gĭt păng um ai pha ra băl. Mĭnh tơdrong tơproh trong jang atŭm kơ tĕh đak lăp gơ̆h jang kiơ̆ păng lăp hăm rim tơdrong tơ̆ tĕh đak ăp mă sư 'moi kiơ̆ dôm kơjă kăp gĭt, dôm tơdrong 'lơ̆ng đơ̆ng jŏh ayŏ kơ dŏ xoang đĕch.”

Akhan, Tơdrong tơproh trong jang atŭm kơ tĕh đak đơ̆ng 2021-2030, trong jang truh sơnăm 2050 ‘nŏh jĭ 1 lơ̆m dôm tơdrong tôch gĭt kăl yoa sư ƀưm truh tơdrong tơproh trong jang tơ̆ rim tơring, bơngai tang măt Lê Hữu Trí, Khul bơ ngai tang măt Kuô̆k hô̆i dêh char Khánh Hòa pơma hơdăh: “Lăng kiơ̆ luơ̆t tơproh trong jang, mă trŏ Tơdrong tơproh trong jang atŭm kơ tĕh đak athei tơlĕch hrôih ƀiơ̆ vă pơm trong ăn dôm tơring tơlĕch trong tơproh jang tơ̆ dêh char, hơla kơ dêh char. Mă đơ̆ng tơdrong Tơproh trong jang âu hiơ̆ ƀiơ̆ mă lei tơdrong kăl hlŏh ‘nŏh sư ‘lơ̆ng, đei đon tơchĕng păng băt lăng hơtăih vă tĕh đak jang tŏk hrĕnh, mă lei oei vei kơjăp tơdrong jang mŭk drăm tĕh đak kŭm nhen jang tŏk dôm tơdrong kăl vă vei kơjăp tơpôl bơ̆n, lơ̆m chăl hrei ‘nâu păng trong jang truh sơnăm 2050.”

Tơ̆ Hop akŏm ưh ê ‘măng mă 2 kơ Kuô̆k hô̆i jăl 15, kiơ̆ nơ̆r athei đơ̆ng Thủ tướng tĕh đak, Kơdră tơm tơlĕch nơ̆r sơkơ̆t tơmât jên jang Nguyễn Chí Dũng pơre hla ar tơroi găh tơdrong Tơproh trong jang atŭm kơ tĕh đak đơ̆ng 2021-2030, trong vă jang truh sơnăm 2050. Kiơ̆ kơ ‘nŏh, Tơdrong Tơproh trong jang atŭm kơ tĕh đak đơ̆ng 2021-2030, trong vă jang truh sơnăm 2050, tơlĕch đon pơhnŏng truh sơnăm 2030 Việt Nam jĭ tĕh đak oei vă tŏk pơdrŏng, đei kơmăy kơmŏk ‘nao ‘lơ̆ng, iŏk yoa jô̆ păh lăp lơ ƀiơ̆, jang tŏk mŭk drăm ‘moi kiơ̆ khoa hŏk kơmăy kơmŏk, tơplih ‘nao rơgei păng jang tơ plih hăm kơmăy sô̆; trong pơgơ̆r jang tŏk kơ tĕh đak đei yoa ‘lơ̆ng, dơ̆ng kơjăp, pơjing đei dôm tơring kăl, tơring jang mŭk drăm tơm, tơring kơ drâm jang tŏk pran, đei anih jang, trong yak ‘lơ̆ng; pơm lăp hăm rim tơdrong tih, hơtŏk jơhngâm pran ăn tơdrong jang mŭk drăm; cham char bri brăh đei vei lăng ‘lơ̆ng, pơm lăp hăm tơdrong tơplih đơ̆ng tŏ ‘mi kial; tơdrong arih xa găh tơmam drăm, jơhngâm đon kơ kon pơlei roi tŏk, tơdrong sơđơ̆ng tĕh đak đei vei kơjăp.