Lơ̆m 11 khei kơ sơnăm 2022, khul jang kơpal kơ dêh char Kon Tum chă ƀôh 83 tơdrong pơm glăi Luơ̆t vei lăng bri, thu iŏk hlŏh 419m3 ‘long lơ kơloăi, tĕh bri đei đe kŏh phă xă hlŏh 32ha. Tơ̆ jơ jet hơlen Jơnŭm pơgơ̆r kon pơlei dêh char Kon Tum, bơngai tang măt Trần Bá Tuấn pơma tơlĕch 2 tơdrong đei tơ̆ apŭng Ia H’Drai păng Sa Thầy, hiong răm truh kơhrĕng m3 ‘long, ƀok pơma hơdăh, đei tơdrong pră hơchăng, vei lăng ưh ‘lơ ‘lŏ, jang ưh tơnăp, ƀât lăp oei tơgŭm ăn bơngai kŏh phă bri ‘long dơ̆ng:

“Hăm ‘long đei kŏh iŏk tôch lơ thoi nŏh, tơdăh bơ̆n jang ‘lơ̆ng tơdrong jang hơdoi, băt hơdăh hơnăp jang vei lăng đơ̆ng dôm anih jang, khul grŭp lơ̆m nŏh đei tơ ‘ngla bri, bơngai vei lăng bri, khul kơdră tơ ring... ‘nŏh ưh đei 1 ‘nu bơngai yơ gơ̆h mât tơ̆ bri kŏh iŏk ‘long lơ thoi nŏh. Kŏh iŏk lơ thoi nŏh tơdrong chơchuĕn ‘long lĕch trong yơ? Yoa oei đei lơ anih gak dơ̆ng, đơ̆ng nŏh athei pơm hơdăh hơnăp jang đơ̆ng dôm anih gak ‘nŏh thoi yơ?”

Tơl tơblang tơ̆ hơnăp Jơnŭm pơgơ̆r kon pơlei dêh char, ƀok Nguyễn Hữu Tháp, Phŏ Kơdră vei lăng kon pơlei dêh char Kon Tum pơma hơdăh, lê̆ đei dôm tơdrong pơm glăi luơ̆t vei lăng bri ‘nŏh yoa tơdrong chĕp kơ̆l, pơgơ̆r đơ̆ng anih jang đảng, khul kơdră pơ gơ̆r tơ̆ 1,2 tơring bơ̆ jang tam gan tơnăp; Hơnăp jang đơ̆ng mĭnh kơsô̆ kăn ƀô̆ vei lăng bri tam mă kơjung; Oei đei đon hŭt hơchăng, jang ưh 'lơ 'lŏ, chă trong tơgŭm ăn bơngai kŏh 'long, chơ chuĕn 'long glăi luơ̆t; Tơdrong tơgŭm mưh vei lăng bri 'long oei tam mă lăp; Đon hlôh vao găh vei lăng bri đơ̆ng 1,2 'nu tơ 'ngla bri tam mă jrŭ…

Găh trong jang vei lăng bri, ƀok Nguyễn Hữu Tháp, ăn tơbăt: “Dơnŏ anih vei lăng kon pơlei dêh char vă hơnơ̆ng pơtho ăn dôm anih jang kơpal păng dôm tơring, mă hơdăh jĭ apŭng păng xăh vă gơ̆h vei lăng ‘lơ̆ng bri ‘long. Hơtŏk hơnăp jang ăn tơ ‘ngla brei păng khul vei lăng bri. Hơtŏk hlŏh dơ̆ng tơdrong dăr joang, vei lăng, mă loi jĭ lơ̆m pơyan jang mir roh. Dơnŏ anih vei lăng kon pơlei dêh char vă chih pơjing trong jang vă hơtŏk tơdrong dăr joang, vei lăng păng pơtho ăn dôm tơring đơ̆ng apŭng truh tơ̆ xăh păng dôm khul jang vei lăng vă chă ƀôh, sek tơlang, kăl loi jĭ athei sek tơlang tơ păt dôm bơngai pơm glăi”.

Ƀok Nguyễn Hữu Tháp, Phŏ Kơdră vei lăng kon pơlei dêh char Kon Tum oei pơma dơ̆ng, pơtêng hăm khei âu sơnăm 2021 tơdrong pơm glăi luơ̆t vei lăng bri tơ̆ dêh char đei jur găh kơsô̆ tơdrong glăi, hơgăt tĕh đei kŏh phă păng kơsô̆ ‘long hloi ră. Lơ̆m sơnăm, dêh char sek phak jên 63 tơdrong; sek phak kron 17 tơdrong păng oei dăr hơlen, pơm hơdăh 23 tơdrong. Găh hơnăp jang hlôi sek ki luơ̆t 27 ‘nu, lơ̆m nŏh đei 16 ‘nu kơdră chĕp kơ̆l. Anih sek tơlang kon pơlei tơ̆ tơring hlôi pơgơ̆r sek 4 tơdrong, phak 20 ‘nu bơngai pơm glăi truh 347 khei oei lơ̆m hnam phak, 65 khei phak ăn oei tơ̆ ‘ngoăih păng phak pơtho đon ưh đei rôp kron truh 60 khei.