Axong lơ jơ tơrĕk hơlen dôm tơdrong kăl kơ ‘măng hop akŏm mă 4, Kuôk hô̆i jăl 15, ƀok Võ Tấn Tài, Phŏ Kơdră juăt jang kơ Jơnŭm dôm anih jang tơbôl dêh char Đăk Lăk, xơ̆ jang Kơdră Anih jang Kon kông – Tơdrong khop Pơgơ̆r jang Tây Nguyên chơt hơ iă hăm tơdrong đei 94,38% bơngai tang măt ăn Kuôk hô̆i drơ̆ng nơ̆r, Tơchơ̆t găh tơlĕch minh ƀả trong jang kăp gĭt vă hơtŏk pơlei tơm Buôn Ma Thuột, dêh char Đăk Lăk hlôi tơpă đei hơlen pơkăp. Ƀok Võ Tấn Tài ăn tơbăt: “Jing kon pơlei kơ pơlei tơm Buôn Ma Thuột nhôn ƀôh xô̆ hơ iă găh tơdrong tơrĕk tơgŭm đơ̆ng Đảng păng Khul Kơpal teh đak hăm tơdrong hơtŏk tơ-iung pơlei Buôn Ma Thuột. Nhôn kơchĕng, Buôn Ma Thuột pơma adrô̆ păng Đăk Lăk pơma atŭm đơ̆ng rŏng đei Kuôk hô̆i hơlen pơkăp trong jang kăp gĭt pơgenh jơ ‘năr pơm trong hiôk păng chĕp vei tơdrong kơ ‘nôh kơdih po vă tơlĕch pơkăp trong jang kăp gĭt hăm lơ tơchơ̆t hơdăh pơm trong hiôk ăn rim tơdrong jang, hơkŏm jơhngơ̆m pran tơ-iung pơjing pơlei tơm Buôn Ma Thuột tơpă jing anih tơm”.

Kiơ̆ kơ ƀok Thái Hồng Hà, Kơdră Anih Joh ayŏ Tơplŏng kơdâu Tơmang pơhiơ̆ Đăk Lăk: Tơchơ̆t đei hơlen hlôi tơmơ̆t atŭm dôm tơchơ̆t kăp gĭt minh ƀar trong jang kăl hăm pơlei tơm Buôn Ma Thuột, dêh char Đăk Lăk găh vei lăng jên hu, jên mong kơ teh đak; pơkăp jăl pơgơ̆r kơ teh đak găh tơdrong pơkă; chă hơvơn axong jang; tơgŭm hăm dôm bơngai juăt jang, bơngai jang khoa hŏk păng bơngai rơgei kăp gĭt. Kơyươ noh, ƀok Thái Hồng Hà hơpơi ‘moih: “Kuôk hô̆i hlôi tơlĕch hơlen trong jang kăp gĭt, 5 trong jang noh chơt hơ iă dêh. Noh jing tơdrong pran, hơtŏk jơhngơ̆m mă đơ̆ng noh adrin pơjing pơm thoi yơ kiơ̆ pơkăp 67 đơ̆ng Anih tơm Chĭn trĭ păng Tơchơ̆t 103 dar deh pơjing Buôn Ma Thuột jing anih dơnơm kơ tơring kiơ̆ tơchơ̆t 23 ‘nao âu”.

Kơtă ăh hop akŏm juăt jue khei 10 kơ Anih vei lăng kon pơlei dêh char Đăk Lăk, ƀok Phạm Ngọc Nghị, Kơdră Anih vei lăng kon pơlei dêh char hlôi pơkăl rim anih jang, rim tơring chih akŏm kơtă hloi dôm trong jang kăp gĭt ‘nao đei Kuôk hô̆i hơlen pơkăp vă pơlei tơm dăh hrôih pơm kiơ̆ pơkăp, xơnong vei lăng đơ̆ng teh đak păng jơnŭm pơgơ̆r tơring kơdrâ̆m, pơm ăn ăn kon pơlei gơh tơnăp hloh. Ƀok Phạm Ngọc Nghị ră hơdăh: “ ‘Nguaih kơ dôm tơdrong tơbang pơkăp noh pơkăp đe kơpal tơrĕk kăp gĭt truh trong jang kăp gĭt ăn Buôn Ma Thuột, đei hơlen bơih noh bơ̆n athei iŏk akŏm hloi lơ̆m tơdrong jang 2023 hăm trong pơkăp ăn Buôn Ma Thuột păng lơ Tơchơ̆t đơ̆ng Khul Kơpal teh đak đơ̆ng Trung ương noh Anih jang Kơpal athei kơchăng tơmơ̆t akŏm vă tơgŭm ăn ƀan châ̆p hanh.