VOV4.Bahnar - Đei Đảng, tĕh đak tơ rĕk, lơ ƀato chơ tơ mam têt yak năm tơ̆ apŭng lơ̆m achon kông đak dơ sĭ Trường Sa ƀât hơ tuch rim sơ năm dơ̆ng, vă kon pơ lei tơ̆ âu gơ̆h đei 1 pơ yan Têt chơt hơ iă, tôm tơ mam, đei ƀĕnh tơ drong ‘mêm kơ eng đơ̆ng tơ ring groi kông. Rok trong yak tơ̆ đak ‘nŏh, đei kơ băt dôm yơ tơ drong nol, tơ drong hơ iă. Kiơ̆ ƀai chih “Trong năm truh hăm Trường Sa: Tơ̆ ƀato chơ pơ yan Puih mak”, gô tơ gŭm ăn bơ̆n ƀôh hơ dăh trong yak tơ̆ đak vă năm truh tơ̆ dôm tơ ring tĕh gĭt kăl, tơ̆ jih kơ tĕh đak:

Đơ̆ng rŏng kơ keng tĭt pơ ‘ngoi tơ klăh hăm groi tĕh tơ̆ kông, ƀato Trường Sa 571 găh khul linh đak dơ sĭ 411, lữ đoàn 955 lĕch đơ̆ng tơ nŏk Cam Ranh chơ ba khul nhôn năm hmach thơ thou têt ăn linh hăm kon pơ lei tơ̆ lơ anih lơ̆m achon kông Trường Sa.  Ƀato chĕp ba ƀơ̆r ôr tơ kĕch, jơ va tap ti, kơ kuơch ti păng ƀĕnh jơ hngâm đon 'mêm đơ̆ng kông gơih ăn groi tĕh gĭt kăl tơ̆ jih kơ tĕh đak. Năm roi hơ tăih kơ kông, jơ va đak pŏh yă roi re, nơ̆r pơ ma nuh, hiĕk roi tŏ sĕt, tơ drong xoay hăk mưh hao ƀato đei hăm lơ bơ ngai lơ̆m ƀato. Hơ tuch sơ năm, đak dơ sĭ pŏh yă, kial hơ bŭt; lơ bơ ngai lơ̆m khul nhôn kŭm đei bơ ngai ưh kơ hiôk lơ̆m jơ hngâm. Hui bơ ngai băt, hao ƀato pơm ăn rim bơ ngai xoai ngăl mă đơ̆ng pran, dăh mă rơ mơ̆n; bu juăt năm tơ̆ đak dơ sĭ dăh mă ưh. Jô̆ hloi Khul pơ vih pơ văn 'nŏh jĭ đe linh mơ lôh, pran jăng păng đei rơih tôch hơ len adrol kơ năm kŭm oei xoai 'mơ̆i. Mă lei rim năr thoi nŏh ngăl, hơ nơ̆ng mưh truh jơ sŏng xa 4 vât, kơ hrĕng tơ pu por 'nhot đei pơ vih, sŏ hơ met klĕm tôch 'lơ̆ng, đei măh mai kơ chơ̆t bek 'lơ̆ng.

Bơ ngai chih hla ar tơ roi Đức Thu găh Ƀăo Khul linh đak dơ sĭ tơ roi: “‘Măng năm tơ̆ đak dơ sĭ mă âu nhôn tơ ƀâp đak pŏh yă tih, kơ na bu bu kŭm lap dih dih yoa soai hăk, ưh ‘mĕh sŏng xa kiơ mă lei lăng ƀôh tơ drong glĕh hret đơ̆ng đe linh lơ̆m ƀato nhôn nhen đei tơ gŭm dơ̆ng kơ sư̆k adrin năm truh hăm Trường Sa.”

Vă gơ̆h đei dôm ‘măng sŏng xa ‘lơ̆ng, tơ drong jang pơ vih pơ văn lơ̆m ƀato mưh đei đak pŏh yă ưh kơ đe ƀônh kiơ. Lơ gŏ lơ̆m hnam gŏ pơ yan ‘nâu athei chô̆ kơ jăp tơ̆ tơ năr vă hei kơ huŏng. Ƀât lăp nhen tơ drong chĕp xăng, kăt ‘nhĕm ‘nhot athei đei ki thuơ̆t ‘mơ̆i vă huei kơ hiĕt ƀơm ti mưh “pai por gŏ”.

Oei kiơ̆ ‘nhŏng Trần Nam Giang, Bơ ngai vei lăng khul pơ vih lơ̆m ƀato tơ drong iŏk yoa tơ mam vă pai gŏ kŭm đei trong jang kơ dih ‘mơ̆i: “Hăm tơ drong juăt bơ̆ jang pơ vih lơ̆m ƀato năm tơ̆ Trường Sa lơ̆m lơ sơ năm đơ̆ng kơ dih, vă gơ̆h đei tơ mam sŏng xa ‘lơ̆ng hlŏh ăn khul, tơ mam nhôn iŏk pai dar dĕh, pai dang yơ iŏk yoa truh dang ei, ‘nhot ƀônh hư nhôn iŏk pai hơ drol, vă gơ̆h ‘lơ̆ng; đơ̆ng rŏng kơ ‘nŏh iŏk pai dôm tơ mam gơ̆h lê̆ đunh ƀiơ̆. Tơ drong sŏng xa thoi nŏh kŭm roi ‘lơ̆ng ƀiơ̆. Mưh bơ̆ jang, nhôn klăih song kiơ̆ grŭp, vă gơ̆h pơ vih ăn khul ‘lơ̆ng hlŏh.”

Tơ drong jang tơm đơ̆ng ƀato 571 ‘nŏh chông ba khul năm hmach thơ thou têt tơ̆ Trường Sa. Hơ dai hăm dôm tơ mam yoa kăl, ƀato oei chơ ba ‘long mai, ‘long quất, hla prit, phe tơ yông, ‘nhĕm nhŭng, bĕng, mưt, keo,… chĕp ba tơ mam têt đơ̆ng kông jur tơ̆ đak dơ sĭ hơ tăih hơ tŏ. Rok trong hao ƀato năm tơ̆ Trường Sa ‘măng mă âu oei đei lơ tơm 'long vă hơ păh ăn achon kông pơ tăm, hơ met pơ 'lơ̆ng hiong răm đơ̆ng 'mi kial kơ sô̆ 9 âu ki. Dôm tơ mam gĭt kăl âu đei đi linh lơ̆m ƀato tôch 'mêm, vei lăng tôch 'lơ̆ng.

Thiếu tá Trần Hữu Hào -–Phŏ kơ dră vei lăng tơ drong jang pơ vih pơ văn kơ lữ đoàn 146, tơ ring 4 Khul liunh đak dơ sĭ ăn tơ băt: “Yoa ƀơm kơ nê̆ đơ̆ng kial tơ ngiĕt, kial hơ bŭt, đak pŏh yă, khul jang kơ chăng pơ tho ăn dôm khul linh chô̆ hơ met, ming tơ mam mă klĕp ‘lơ̆ng, iŏk đak ƀlăng lơ̆m ƀato vă tơ roi ăn kơ ‘long vă huei kơ hư. Mưh tung đơ̆ng ƀato jur, đơ̆ng thŏng nan tŏk tơ̆ kông, khul pơ tho athei jang mă ‘lơ̆ng tơ drong ‘nŭng hơ met, pĕng găn, ưh ăn đak dơ sĭ mât lơ̆m tơ mam, pơm ‘lơ̆ng ăn rim tơ mam gơ̆h truh hăm linh păng kon pơ lei tơ̆ achon kông”.

Pơ yan đak dơ sĭ pŏh yă oei pơm ăn khul jang păng tơ mam đơ̆ng ƀa to tŏk tơ̆ dôm achon kông roi mơ mat ƀiơ̆. Ƀato Trường Sa 571 lăp gơ̆h dơ̆ng jê̆ dôm achon kông đĕch; tơ drong chơ tơ mam, bơ ngai tŏk tơ̆ kông gô mơ̆ng đơ̆ng thŏng nan dơ̆ng. Đak pŏh yă, rim bơ ngai hao lơ̆m thŏng nan athei hrŭk ao chai ngăl, tơ mam yoa đei chô̆ hơ met hăm tơ pu ming lŏng vă hhei đei đak dơ sĭ mât. Yak hlŏh dôm tơ drong mơ mat tat, khul jang nhôn mă hơ tuch kŭm năm truh tơ̆ dôm anih mă blŭng tơ̆ Trường Sa, păng pơ jao ăn đe linh dôm tơ mam oei ‘lơ̆ng hlŏh.

Sơng iŏk tơ mam đơ̆ng kông, bơ ngai jang chinh trĭ tơ̆ achon Đá Nam Hoàng Kim Lâm ưh kĕ ôn jơ hngâm đon chơt hơ iă: “Hăm kăn ƀô̆, linh tơ̆ achon kông, mưh iŏk đei dôm tơ mam đơ̆ng kông gơih ăn, kơ dih kâu nhôn ƀôh tôch hiôk jơ hngâm, ƀôh nhen nhôn đei ngôi hơ dai hăm hnam tơ nŏ, hăm pơ lei pơ la, lơ̆m khei ‘năr bơ̆ jang tơ̆ achon kông”.

Tơ drong hơ iă đơ̆ng đe kăn ƀô̆, linh păng kon pơ lei tơ̆ dôm achon kông tơ̆ Trường Sa mưh iŏk đei dôm tơ mam pơ yan puih mak đơ̆ng kông kŭm jing tơ drong hơ iă đơ̆ng khul jang nhôn, đơ̆ng đe linh jang lơ̆m ƀato 571 oei “chơ pơ yan puih mak” năm tơ̆ dôm anih, tơ ring tĕh gĭt kăl tơ̆ jih kơ Tĕh đak.

Dơ̆ng: Tơ blơ̆