Pơgê 12/3, Khŭl tơgŭm ŭnh hnam lĭnh lôch dŏng teh đak Việt Nam pơgơ̆r tơƀơ̆p muh măt bơngai chih kơtơ̆ng ang Pơyan puih mak Giáp Thìn 2024. Trung tướng Hoàng Khánh Hưng, Kơdră Khŭl tơgŭm ŭnh hnam lĭnh lôch dŏng teh đak Việt Nam tơbăt; Khŭl hlôi iŏk đei tơdrong vang tơgŭm lơ̆m tơdrong jang ƀlŏk hơdơ̆r kơ lĭnh lôch dŏng teh đak đơ̆ng Kŏng ti tơm trong gre treng Việt Nam găh tơdrong ưh kơ iŏk jên gre chơ kơ ting lĭnh lôch dŏng teh đak năm hơdai đơ̆ng tơring Pơbăh năm tơ̆ tơring găh Tu. ‘Nâu jĭ tơdrong jang ‘mêm mơnat gĭt kăl, tơƀôh jơhngơ̆m đon “Nhă đak ƀlŏk kơ tu” đơ̆ng hơdrĕch hơdrŭng Việt Nam. 

Lơ̆m sơnăm 2024, Khŭl tơgŭm ŭnh hnam lĭnh lôch dŏng teh đak Việt Nam hơnơ̆ng bơ̆jang kiơ̆ ‘lơ̆ng dôm tơdrong jang ƀlŏk hơdơ̆r kơ lĭnh nuih mơng lôch dŏng teh đak nhen: Băt hơdăh hơnăn kơting lĭnh lôch dŏng teh đak oei kăl kơtơ̆ng ang, tơchă, kôch iŏk kơ ting lĭnh lôch dŏng teh đak; asong hnam ‘mêm mơnat, kơ sâp hla ar ‘mơ ‘met jên, pơjao hŏk ƀŏng ăn ŭnh hnam lĭnh lôch dŏng teh đak.... Mă loi ‘noh, lơ̆m sơnăm ‘nâu, Khŭl jang hơdai hăm Kŏng ti tơm Trong gre treng Việt Nam Nam pơgơ̆r chơ kơ ting  lĭnh lôch dŏng teh đak păng asong đĕch vĕ gre ăn kơ ŭnh hnam lĭnh lôch dŏng teh đak lơ̆m tơdrong pơ gơ̆r pơm lêh chơ ba kơ ting lĭnh lôch dŏng teh đak vih tơ̆ pơlei pơla hăm trong tre treng.