Găh tơdrong jang tơgŭm phe dŏng pơngot năr Têt Nguyên đán Quý Mão păng ƀa pơtai hoăt sơnăm 2023, đei 18 dêh char tơƀơ̆p mơmat tat găh tơmam, jên ‘noh: Sóc Trăng, Ninh Thuận, Cao Bằng, Nghệ An, Tuyên Quang, Trà Vinh, Dak Nông, Quảng Bình, Dak Lak, Bạc Liêu, Gia Lai, Bắc Kạn, Kon Tum, Hà Giang, Bình Phước, Quảng Ngãi, Quảng Trị păng Lạng Sơn athei Trung ương tơgŭm phe dŏng pơngot ăn kon pơlei.

Kiơ̆ lơ̆m apĭnh đơ̆ng tơring, Anih tơm vei lăng găh Bơngai jang - Lĭnh jĭ rơka păng Tơpôl hlôi jang hơdai hăm Anih tơm vei lăng jên hu dăr hơlen lăng pơtruh ăn Thủ tướng teh đak kĭ ăn 6 tơdrong tơchơ̆t tơgŭm 18 rơbâu tấn phe vă kơ dôm tơring tơgŭm kon pơlei. Phe hlôi đei asong tơtom, ƀlep bơngai, vei sơđơ̆ng “ưh kơ lê̆ bu đei hŭt tơ̆ rŏng”.