Bơ̆ jang kiơ̆ tơdrong tơchơ̆t kơsô̆ 45/QĐ-TTg đơ̆ng 2019 - 2021, 19 anih chih hla ar tơroi vang jang kiơ̆ đon pơhnŏng păng trong roi tơbăt; hơnơ̆ng tơplih ‘nao trong jang, tơdrong tơroi tơbăt; hơtŏk tơdrong ‘lơ̆ng hơ iă đơ̆ng tơdrong kơtơ̆ng ang, ƀai chih, um rup, tơroi trŏ ƀlep rim tơdrong arih xa tơ̆ tơring kon kông păng groi kông, tơring mơmat tat; um rup phĭn ‘lơ̆ng, rơđăh, lăp hăm tơdrong juăt, jơ hngâm đon, tơdrong joh ayŏ kơ dŏ xoang đơ̆ng kon pơlei… Hơ dai hăm dôm tơdrong đei yoa tôch ‘lơ̆ng lơ̆m tơdrong tơroi tơbăt kŭm đei 1,2 tơdrong mơmat tat, ưh hơiă ‘năi nhen: Kon pơlei đei xa yoa tơdrong tơgŭm mă lơ ‘nŏh arih tơ̆ tơring hơtăih yăih, tơring đei trong nơnăm oei mơmat tat, anih jang tam mă ‘lơ̆ng, kơna tơdrong ƀơk hla ar tơroi ƀât lăp oei hiơ̆, mă loi ‘nŏh lơ̆m pơyan ‘mi đak tih, tŏ ‘mi ưh ê. Ƀai chih lơ̆m 1,2 kơsơ̆p hla ar tơroi ƀât lăp tam mă pơm hơnơ̆ng kiơ̆ tơring păng dôm tơdrong jang; 1,2 tơdrong kơtơ̆ng ang, ƀai chih... tam mă lăp hăm đon hlôh vao păng tơdrong hơpơi ‘mĕh đơ̆ng kon pơlei. Tơdrong jang hơdoi đơ̆ng dôm anih jang kơ Trung ương păng tơring tam mă kơjăp. Mĭnh ƀar tơring, mă loi jĭ tơ̆ xăh, pơlei pơla tam mă vei lăng ‘lơ̆ng Hla ar tơroi; tơdrong hơlen năng tam mă đei bơ̆ jang hơnơ̆ng…

Kơdră Anih vei lăng hơdrĕch kon kông kơ tĕh đak Hầu A Lềnh tơroi, tơdrong ‘mĕh vă tơmât jên jang tơpă tơ̆ tơring kon kông păng groi kông ‘nŏh tôch lơ, mă lei mưh bơ̆ jang oei đei lơ tơdrong tơhlăk, ƀơm ưh ‘lơ̆ng truh tơdrong tơlĕch jên jang. Hăm tơdrong tơgŭm đei jang Pơlong năng chă ƀơk radio ăn tơring kon kông, groi kông, tơring mơmat tat dêh hlŏh, tơring sơlam, ƀok Hầu A Lềnh tơroi: “Tơdrong jang ‘nâu đei Thủ tướng tĕh đak kĭ lơ̆m sơnăm 2017, truh sơnăm 2018 Thủ tướng tĕh đak kĭ pơjao jên jang, mă lei đơ̆ng rŏng kơ pơjao jên, truh khei 8-2019, Anih vei lăng hơdrĕch kon kông ‘nao pơm hla ar pơgơ̆r chă rơih anih jang, oei chă rơih anih jang ‘nŏh ưh đei anih jang yơ đei tôm tơdrong hơgăt kăl đei. Atŭm hăm ‘nŏh kơplăh jơnăr âu, Anih vei lăng hơdrĕch kon kông tơroi ăn Kuô̆k hô̆i tơlĕch tơdrong jang tơm atŏk tơiung mŭk drăm, tơpôl tơ̆ tơring kon kông păng groi kông, lơ̆m noh chih tơmât tơmam mơ̆ng lăng ăn tơring kon kông lơ̆m tơdrong jang 10, kŭm nhen tơdrong tơgŭm nai tam đei bơ̆ jang. Sơnăm 2020-2021, Anih tơm vei lăng jên hu ưh đei pơjao jên vă bơ̆ jang tơdrong jang pơlong năng âu dơ̆ng, ‘nŏh nhôn athei gô tơdrong Tơchơ̆t pơjao jên đơ̆ng Tơdrong jang tơm kơ tĕh đak dơ̆ng. Truh dang ei, đĭ pơjao jên đơ̆ng tơdrong jang tơm ‘nŏh bơih, lơ̆m nŏh đei tơdrong jang 10, Anih vei lăng hơdrĕch kon kông pơtho ăn dôm anih juăt jang hơlen năng păng hơnơ̆ng bơ̆ jang tơdrong ‘nâu hăm kơsô̆ jên tĕh đak sơnăm 2022."

Hrei ‘nâu, lơ tơring kon kông păng groi kông hlôi iŏk đei hla ar chih nơ̆r pơtho tơlĕch jang kiơ̆ tơdrong tơgŭm chă ƀơk 1,2 kơsơ̆p hla ar tơroi găh tơdrong jang tơm kơ tĕh đak atŏk tơiung mŭk drăm, tơpôl tơ̆ tơring kon kông păng groi kông, đơ̆ng 2021 - 2030, jăl I: Đơ̆ng sơnăm 2021 - 2025. Kiơ̆ kơ ‘nŏh, Dơnŏ anih vei lăng kon pơlei dôm dêh char pơjao ăn Anih vei lăng hơdrĕch kon kông dêh char pơgơ̆r, jang hơdoi hăm dôm anih jang kơpal đei ƀơm truh, Dơnŏ anih vei lăng kon pơlei dôm apŭng kơchăng hơlen năng, rim sơnăm chih pơjing trong jang vă dăr hơlen, vei lăng tơdrong chă ƀơk hla ar tơroi tơ̆ dêh char, athei ƀơk trŏ bơngai, tôm kơsơ̆p păng tơtom trŏ thoi tơdrong hơgăt. Chih akŏm hơnăn dôm bơngai đei xa yoa, kơsô̆ kơsơ̆p hla ar tơroi truh tơ̆ xăh, pơlei pơla, hnam hŏk păng dôm anih jang chinh trĭ – tơpôl, Bơngai đei kon pơlei kon kông lui yom păng tơring groi kông lơ̆m dêh char kiơ̆ hơnăn chih dôm kơloăi hla ar tơroi đei ƀơk tơ̆ tơdrong Tơchơ̆t 45 đơ̆ng Thủ tướng tĕh đak. Anih vei lăng tơdrong tơroi tơbăt dêh char pơ gơ̆r dăr hơlen, vei lăng tơdrong chơ chuĕn, ƀơk dôm kơsơ̆p hla ar tơroi mă tơtom, trŏ bơngai, tôm kơsô̆ hơgăt, trŏ anih. Hơdrô̆ Dơnŏ anih vei lăng kon pơlei dôm apŭng athei hơtŏk tơdrong jang hơdoi hăm dôm khul jang chinh trĭ, tơpôl: Athei vei lăng, iŏk yoa, pơjing tơdrong ‘lơ̆ng ăn đe đoàn viên, bơngai jang gơ̆h đŏk, mơ̆ng, lăng, atŭm hăm ‘nŏh iŏk yoa vă roi tơbăt, pơtho tơƀôh lơ̆m dôm jơ hŏk hôp.... 

‘Nao âu, Anih vei lăng hơdrĕch kon kông jang hơdoi hăm 1,2 anih tơm, anih jang kơpal găh Trung ương kŭm hăm Dơnŏ anih vei lăng kon pơlei dôm dêh char, plt pơgơ̆r hop akŏm trư̆k tuyê̆n lơ̆m tĕh đak tơgop nơ̆r ăn Tơ drong jang "Hơnơ̆ng bơ̆ jang tơdrong tơgŭm, ƀơk 1,2 kơsơ̆p hla ar tơroi păng tơchĕng hơlen, tơplih ‘nao trong jang tơroi tơbăt mă lăp hăm rim tơdrong tơ̆ tơring kon kông păng groi kông, tơring mơmat tat dêh hlŏh" đơ̆ng 2023 - 2025.

Tơ̆ hop akŏm, dôm bơngai tang măt pơma hơdăh: Tơdrong tơchơ̆t 45/QĐ-TTg ‘nŏh jĭ tơdrong tơgŭm hơdrô̆, tơgop roi tơbăt trong jang, tơdrong tơgŭm đơ̆ng Đảng păng tĕh đak, jĭ anih vă kon pơlei hŏk pơhrăm kiơ̆ băl, chă mơ̆ng nơ̆r pơma đơ̆ng mih ma duch nă vă chih hơmet ming, pơjing tơdrong tơgŭm ăn tơring kon kông păng groi kông. Tơ̆ hơnăp kơnh, hơpơi ‘mĕh anih tơm, anih jang kơpal, dôm tơring hơtŏk hlŏh dơ̆ng tơdrong ‘lơ̆ng, tơplih ‘nao trong jang, chĕp ba lơ tơdrong mă kon pơlei kăl mă lei lăp hăm trong jang đơ̆ng Đảng păng tĕh đak. ‘Moi kiơ̆ dôm tơdrong Tơchơ̆t đơ̆ng Đảng, Kuô̆k hô̆i, Khul kơdră tĕh đak vă pơvih ăn kon pơlei, hơlen năng tơdrong ‘mĕh vă đơ̆ng mih ma duc nă, đe kăl yă kiơ.

Anih vei lăng hơdrĕch kon kông dôm tơring oei athei Anih vei lăng hơdrĕch kon kông kơ teh đak hơnơ̆ng roi tơƀôh ăn Thủ tướng tĕh đak tơchơ̆t, ƀơk đĕch hla ar tơroi ăn tơring kon kông păng groi kông đơ̆ng 2022-2025; Hơtŏk kơsô̆ kơsơ̆p hla ar tơroi ăn dôm Khul jang chinh trĭ – tơpôl tơ̆ pơlei pơla, dôm hnam trưng tĕh đak rong hŏk tro kon kông; Atŭm hăm ‘nŏh, pơih xă bơngai đei xa yoa, ƀơk ăn dôm anih jang găh kon kông tơ̆ jơ̆p tơring, kăn ƀô̆ vei lăng tơdrong jang ƀơm truh hơdrĕch kon kông tơ̆ xăh (mă loi jĭ kơsơ̆p hla ar tơroi, ƀăo tơchĕng hơlen jrŭ, chih tơroi tôm tơdrong păng ‘moi kiơ̆ tơdrong jang).

Kiơ̆ yă Hoàng Thị Hạnh – Phŏ Kơdră Anih vei lăng hơdrĕch kon kông kơ tĕh đak, hrei ‘nâu Anih vei lăng hơdrĕch kon kông athei tơplih ming ƀai chih, um rup hơmet pơrŏ vă roi tơƀôh mă lăp hăm dôm tơdrong tơ̆ tơring kon kông păng groi kông, tơring mơmat tat dêh hlŏh. Găh ƀai chih, lơ ƀăo, kơsơ̆p hla ar tơroi lăng kiơ̆ hơnăp jang đơ̆ng kơdih vă chih tơroi mă lăp ăn dôm bơngai đei xa yoa, vă hơmet pơ‘lơ̆ng tơdrong roi tơbăt hơdrom băl, ưh gơ̆h vei lăng, chih kơjung, athei găn tôch ai tơdrong hăl, lao đon, huach jên tĕh đak. Găh trong pơtruh tơdrong tơroi tơbăt: athei chih pơjing App ƀăo điên tư hơdrĕch kon kông păng groi kông vă roi tơbăt dôm tơdrong hơiă đei chih akŏm đơ̆ng rim ƀăo, kơsơ̆p hla ar tơroi vă pơtruh bơngai đŏk. Găh noh dơ̆ng, tơdrong kơtơ̆ng ang, ƀai chih tơm đơ̆ng dôm ƀăo, kơsơ̆p hla ar tơroi đei tơmât kơmăy đŏk kơdih hăm nơ̆r yoăn păng 1,2 nơ̆r kon kông nai vă roi tơbăt tơtom truh tơ̆ dôm tơring đei trong yak vih vât mơmat tat, truh hăm kon pơlei, anih vei lăng tơroi tơbăt hăm điên thoăi rơgei, kơmăy tĭnh păng rim kơmăy mơ̆ng – lăng nai:

“Tơdrong tơroi tơbăt đơ̆ng bơ̆n athei tưk tơiung pran hlŏh dơ̆ng, ƀônh hlôh hlŏh dơ̆ng, lăp hăm tơdrong juăt đơ̆ng kon pơlei, vă đe gơ̆h chă tơroi ăn băl. Păng tơdrong tơroi ăn băl đơ̆ng 2 păh âu ưh kơsĭ pơma vă hrăp đĕch mă athei đei đơ̆ng jơhngâm đon tơnăp hai. Tơroi lơ̆m Radio, tivi dăh mă dôm anih jang nai, dôm kơmăy kơmŏk tơroi tơbăt âu jing anih roi tơbăt tơtom hlŏh, păng vă truh hăm tơring kon kông ‘nŏh oei đei dơ̆ng 1,2 tơdrong kăl nai, ‘nŏh jĭ nơ̆r pơma, nơ̆r Yoăn ‘nŏh pă pơma bơih, mă lei vă đe hlôh jrŭ hlŏh dơ̆ng, lơ hlŏh dơ̆ng păng vă đe mơ̆ng hơlen ‘nŏh dơ̆ng ‘nŏh hrei ‘nâu Anih pơ dăh tivi VN, Radio nơ̆r pơma VN đei lơ kênh pơma nơ̆r kon kông, oei ƀăo in ‘nŏh kăl đei lơ trong jang phara băl dơ̆ng, mă loi jĭ um rup, nơ̆r pơma…."

Tơgĕch iŏk tơdrong jang tŏk kiơ̆ trong chih tơroi hăm lơ kơmăy kơmŏk, lơ kơloăi, tơ̆ hơnăp kơnh, trong jang ƀơk hla ar tơroi ăn kon pơlei kon kông athei jang kiơ̆ tơ̆ yăn âu, hơmet pơ ‘lơ̆ng tơdrong ƀơh hla ar tơroi ăn bơngai đŏk hiơ̆, dôm tơdrong đei chih tơroi jing ưh gan hơiă, “đei ming hŏh, ưh đei bơ ngai plơ̆ đŏk” tơ̆ tơring nhen hlôi đei tơ̆ 1,2 tơring adrol ki. Ưh lăp pơtruh tơdrong tơroi ăn kon pơlei kon kông đĕch, mă trong jang oei athei tơgŭm ăn kon pơlei lơ̆m tĕh đak păng apŭng plenh tĕh đei dơ̆ng tơdrong ‘lơ̆ng vă băt rim tơdrong tơroi găh tơring kon kông hrĕnh hlŏh, hơdăh hlŏh, trŏ ƀlep hlŏh, tơdrong đei yoa đơ̆ng roi tơbăt roi tŏk ‘lơ̆ng.