Anih tơgŭm lơ̆m tơpôl kơ dêh char Gia Lai đơ̆ng sơ̆ đĭ jing bơbŭng hnam tơnŏ ‘lơ̆ng ăn đe hơiŏh ưh pŭn ai, đei tơdrong arih xa tôch pơmat tat. 1,2 ‘nu hơiŏh oei tơ̆ anih âu iŏk đơ̆ng ‘nao đei rơneh hloi, lơ oh nai truh tơ̆ âu ƀât hnam đei tơdrong mĕ ƀă liôch hơchăng, mă ưh ‘nŏh klo kăn hrĕch băl. Oh Kpuih H'Kiều, tơroi: “Inh hăm oh inh oei tơ̆ âu vă jê̆ 7 sơnăm bơih. Đơ̆ng đei mât tơ̆ âu đe duch rong vei tôch ‘lơ̆ng, bơnê kơ đe duch rong ‘me, pơtho tơƀôh ăn nhôn truh ‘lŏ”.

Yă Tạ Thị Anh Đào, Kơdră Anih jang tơgŭm tơpôl kơ dêh char Gia Lai, ăn tơbăt, dang ei anih oei iŏk vei rong hlŏh 60 ‘nu hơiŏh pơti păng kơmlo, jơ jăn. Dôm bơngai pơtho, bơngai jang hơnơ̆ng ‘mêm kơ eng, vei lăng năng tông, rong ‘me đe oh nhen thoi bơngai lơ̆m hnam: “’Ngoăih kơ jang kiơ̆ tơdrong tơgŭm đơ̆ng teh đak ‘nŏh jĭ tơdrong Hơgăt 20, đe mon oei đei jên sŏng xa, oei xa, jên hơbăn ao… Hơdai hăm ‘nŏh, Anih rong oei iŏk đei tơdrong tơgŭm đơ̆ng dôm khul grŭp, rim bơngai vă đe mon đei tơdrong arih xa roi ‘lơ̆ng ƀiơ̆. Pơm thoi yơ vă đe mon tơ̆ âu ƀôh kơdih kâu hơnơ̆ng đei vei lăng, rong ‘me đơ̆ng tơpôl”.

Nơ̆r tơroi đơ̆ng Anih vei lăng tơdrong jang xa, linh jĭ rơka păng tơpôl dêh char Gia Lai, lơ̆m dêh char dang ei đei hlŏh 5000 ‘nu hơiŏh arih xa tôch pơmat tat. Kŭm hăm ‘nŏh jĭ kơhrĕng rơbâu ‘nu hơiŏh tơ̆ tơring pơmat tat, hơtăih yăih hai. Hăm đon pơhnŏng vei lăng ‘lơ̆ng rim tơdrong ăn đe hơiŏh, găn lê̆ tơdrong krê teh dong, pơ̆k rơka, ƀơ ƀrơ̆h đe hơiŏh, dôm anih jang, tơring tơrang pơgơ̆r lơ ‘măng roi tơbăt, hơtŏk đon hlôh vao păng hơnăp jang đơ̆ng tơpôl.

Ƀok Phạm Trần Anh, Phŏ Kơdră Anih vei lăng tơdrong jang xa, linh jĭ rơka păng tơpôl dêh char Gia Lai, pơma: “Gia Lai năng kăl truh dôm tơring hơtăih yăih, anih pơm ngôi ăn đe hơiŏh oei kơƀăh. Anih nhôn oei athei dôm khul grŭp, tơpôl lơ̆m pơyan pơdơh he pơgơ̆r lơ tơdrong pơm ngôi ăn đe mon kơplăh đe mon oei pơdơ̆h hŏk vă gơ̆h đei anih pơm ngôi sơđơ̆ng ‘lơ̆ng; veh ver tơdrong đe mon chông băl năm ngôi tơ̆ dôm anih ưh sơđơ̆ng, hơmơt jing đei tơdrong sar bar, jĭ jơhngâm”.

Sơnăm sơ̆, Anih mong jên tơgŭm ăn đe hơiŏh dêh char Gia Lai krao hơvơn, mong akŏm đei hlŏh 3,380 ti hlak jên, đei hloi jên măt păng tơmam đơ̆ng lơ bơngai vang tơgŭm. Đơ̆ng kơsô̆ jên, tơmam âu, lơ̆m sơnăm 2023 păng 6 khei blŭng sơnăm 2024, Khul vei lăng jên tơlĕch 2,435 ti pơgơ̆r răih hơmet jĭ plei nuih ăn 20 ‘nu hơiŏh đei tơdrong arih xa pơmat tat, 17 ‘nu hơiŏh ƀơ̆r hong, muh hueh; hơpăh 50 tong gre tang vang ăn đe oh đei tơdrong arih xa pơmat tat.

‘Nhŏng Đỗ Đức Thanh, Phó Bí thư đoàn dêh char Gia Lai, tơroi, lơ̆m khei bơ̆ jang yoa đe hơiŏh sơnăm ‘nâu, druh dăm lơ̆m dêh char hơpăh truh rơbâu tơpu tơmam, tơlĕch lơ trong jang xa, pơgơ̆r tơplih râm rĕk, kơchai nhuơ̆ iŏk tơmam, hơpăh gre tang vang ăn đe hŏk tro tơnuh adrin hŏk vă pơlung đe oh: “Khul kơdră chĕp kơ̆l đoan dêh char oei tơlĕch tơdrong hơgăt rim anih jang đoan iŏk tơgŭm hơnơ̆ng ăn hơiŏh đei tơdrong arih xa pơmat tat, chih hơdăh măt păng đei trong jang hơdăh ‘lơ̆ng, ưh lăp hơdrô̆ tơmam, jên hu đĕch mă oei pơgơ̆r năm ngôi, pơma nuh, pơlung đe ŏh adrin lơ̆m tơdrong hŏk pơhrăm păng arih xa”.

Mă lei, yoa dêh char đei lơ kon pơlei kon kông, tơdrong arih xa oei tôch pơmat tat, athei đei tơdrong tơgŭm hơnơ̆ng đơ̆ng đĭ đăng tơpôl lơ̆m tơdrong vei lăng năng tông, rong ‘me đe hơiŏh ưh pŭn ai.

Vei lăng, rong ‘me păng pơtho tơƀôh ăn hơiŏh hrei ‘nâu jĭ pơjing khul jang gơ̆h hơgei vă jang tŏk pran kơjăp ăn teh đak ning mônh kơnh. Khei bơ̆ jang yoa đe hơiŏh jĭ jơnăr vă dôm anih jang, khul grŭp, bơngai đei đon ‘lơ̆ng lơ̆m dêh char tơƀôh hơnăp jang vang vei lăng năng tông păng pơtho pơhrăm ăn đe hơiŏh. Anih vei lăng tơdrong jang xa, linh jĭ rơka păng tơpôl dêh char Gia Lai krao hơvơn rim khul grŭp, rim bơngai, anih tĕch mơdro, bơngai đei jơhngâm đon ‘lơ̆ng vang tơgŭm jên tơmam vă gơ̆h bơ̆ jang đei yoa ‘lơ̆ng tơdrong tơgŭm ăn đe hơiŏh đei tơdrong arih xa pơmat tat dêh hlŏh, đe hơiŏh ưh pŭn ai… kiơ̆ đơ̆ng Anih mong jên tơgŭm ăn hơiŏh dêh char Gia Lai. Hăm tơdrong adrin đơ̆ng đĭ đăng tơpôl, hơiŏh đei tơdrong arih xa pơmat tat tơ̆ Gia Lai dar dĕh đei vei lăng, năng tông păng đei tơdrong arih xa roi ‘lơ̆ng ƀiơ̆.