Mŏ Y Hương, bơngai Xơ đăng oei tơ̆ dêh char Kon Tum tơbăt, dôm sơnăm tơjê̆ âu đei Khŭl vei lăng drŏ kăn dêh char Kon Tum pơgơ̆r lơ tơdrong pơlong nhen: Bơngai tơroi tơbăt hơgei găh pơjing drŏ kăn chăl ‘nao tơring kon kông, lui khop; sơđơ̆ng ăn drŏ kăn păng hơioh... kơna kơdih kâu păng lơ drŏ kăn hlôi hlôh băt găh dôm tơdrong kon kông, lui khop, Luơ̆t hơtŏ  băl drŏ nglo hăm drŏ kăn, Luơ̆t iŏk ŭnh om chom gŏ păng ŭnh hnam...:

“Kiơ̆ đơ̆ng lơ tơdrong pơlong ĭnh đei băt lơ tơdrong hlôh vao găh drŏ kăn, dôm tơdrong jang tơm kơ teh đak tơring kon pơlei kon kông, tơring groi kông jăl jang 2021- 2030. Dôm tơdrong hlôh vao găh lui kơ yang, lui khop. Tơdrong jang vei lăng hơdrĕch kon kông đơ̆ng Đảng păng teh đak bơ̆n. Hơtŏk đei hơnăp jang đơ̆ng drŏ kăn, lui ngeh hloh tôch kơ lơ lơ̆m pơma dơnuh, lơ̆m dôm tơdrong jang tơpôl vang jang tơdrong jang chĭnh trĭ”.

Mă loi ‘noh tơ̆ Kon Tum sơnăm ‘nâu, đe oh bơngai kon kông kŭm đei vang akŏm Tơdrong jang pơma dơnuh đơ̆ng Khŭl vei lăng hơioh hăm Kơdră chĕp kơ̆l Jơnŭm pơgơ̆r vei lăng kon pơlei dêh char Kon Tum.  ‘Nâu jĭ tơdrong ‘lơ̆ng gĭt kăl vă hơioh kơ dêh char tơƀôh jơhngơ̆m hơpơi ‘meh vă Khŭl kơdră chĕp kơ̆l Jơnŭm vei lăng kon pơlei dêh char kŭm hăm rim kơdră tơring tơƀôh tơdrong bơngơ̆t truh, vei lăng, răp mơ̆ng nơ̆r pơma đơ̆ng hơioh. Oh Phan Phúc Phú, hŏk tro lăm 8C2, hnam trưng hŏk jăl 2 - jăl 3 Liên Việt Kon Tum, tơbăt:

“Mon đĭ apĭnh 3 nơ̆r apĭnh ƀơm truh tơdrong mạng tơpôl Internet, tơdrong pơ ƀrơh tơrôp păng teh dong tơ̆ hŏk tro hăm hnam chă pơ yơ̆ng tơ̆ hnam trưng đĭ hư. ‘Moi kiơ̆ dôm nơ̆r tơl đơ̆ng đe duch, đe ma ‘noh mon hlôh đei ‘noh jĭ yua mạng Internet ‘noh kăl đei tơdrong tơm, đon băt kơdih. Tơdrong pơƀrơh tơrôp dăh mă tơdrong teh dong băl ‘noh mon kŭm băt akhan dôm anih jang kŭm hlôi đei tơdrong bơngơ̆t truh. ‘Moi kiơ̆ ‘măng pơma dơnuh âu mon ƀôh tôch kơ đei yua.”

Dôm sơnăm âu ki, kŭm hăm dôm tơdrong jang tơgŭm tơdrong jang sa vă tơgŭm mŏ oh hơtŏk tơiung mŭk drăm, dôm kơdră vei lăng khŭl drŏ kăn tơ̆ Dak Lak oei hơdrin tơlĕch dôm tơdrong jang pơm jên mong vă răt ƀao hiêm pơgang asong ăn bơngai jang lơ̆m khŭl mơ mat tat. Tơdrong jang ‘nâu hlôi tơgŭm dơ̆ng lơ mŏ oh đei tơdrong hiôk gơh yua hăm pơvih pơvăn pơgang, vei lăng jơhngơ̆m pran, tơjur pŭ trăp mŭk drăm mưh ưh kơ pŭn chă jĭ pơ lŏ. Nhen mŏ Đặng Thị Bình, oei tơ̆ thôn 1, xăh Ea Kpam, apŭng Cư Mgar ƀơ̆t iŏk đei the ƀao hiêm pơgang yua đơ̆ng khŭl vei lăng drŏ kăn xăh pơjao asong, ƀôh sơđơ̆ng jơhngơ̆m ƀiơ̆:

“Tơdrong arih sa ŭnh hnam nhôn ‘noh kŭm tŏk bŏk mơmat tat, đei păih Khŭl vei lăng drŏ kăn xăh ăn 1 kơ suơ̆t the ƀao hiêm ‘noh ĭnh kŭm bơnê lơ, đei the ƀao hiêm vă ĭnh năm khăm jĭ kŭm dă ƀiơ̆ kơ hoach jên ‘noh ĭnh kŭm sơđơ̆ng ƀiơ̆ mưh năm khăm hơmet jĭ, tơjur tơdrong kơhret găh kon jên mưh năm khăm ăn kơ dih kâu ĭnh.”

Tơ̆ Lai Châu, tơring kon pơlei kon kông đei lơ tơdrong joăt mă hơnăp jang đơ̆ng drŏ kăn lơ̆m tơdrong arih sa lăp jing bơngai jang, bơngai rơneh kon đĕch. Gơnang đơ̆ng đei trong tơroi tơbăt trŏ lăp, truh dang ei hơnăp jang đơ̆ng drŏ kăn lơ̆m tơring kŭm đĭ tơplih pha păng đei nơ̆r pơma lơ̆m ŭnh hnam. Mŏ Ma Thị Chư, oei tơ̆ plei Phìn Chải, xăh Giang Ma, apŭng Tam Đường tơbăt: yua kơ đei klo ‘noh jang lơ̆m xăh păng đei kang ƀô̆ hơnơ̆ng năm tơ̆ pơlei tơroi tơbăt kơna hlôi tơplih trong tơchĕng, trong jang, tơgŭm kon hơkăn lơ ƀiơ̆:

“Rim năr tơdrong jang đơ̆ng oh ‘noh jang mir, jang chŭn na, rong nhŭng, rong bip, rong kơpô păng pai tơdrô hơlăk. Pơgê brŏk đơ̆ng jang, hơkăn tam mă tom pai gŏ ‘noh klo brŏk tơgŭm hơkăn pai gŏ tơ̆ kơ ‘năr dơ̆ng, gô 3 ‘mĕ kon sơ brŏk vang sŏng sa hơdai. Năr drou, năr pơh đei pơdơh ‘noh klo kŭm năm tơgŭm mĕ ƀă , tơgŭm hơkăn jang mir, jang lơ̆m hnam. Dang ei ŭnh hnam đei tơdrong arih sa, iŏk yua sơđơ̆ng, klo kŭm ưh kơ teh dong hơkăn kiơ hloi păng ŭnh hnam kŭm hiôk hơdai.”

Hăm tơdrong mơ̆t jang hơdrin đơ̆ng dôm anih tơm, anih jang, khŭl grŭp păng kơdră đảng, kơdră rim tơring, drŏ kăn păng hơioh kon kông tŏk bŏk roi ‘năr roi đei vei lăng păng dôm tơdrong đei yua trŏ ƀlep. Drŏ kăn, hơioh kon kông đei năm hŏk pơhrăm, hơtŏk ‘lơ̆ng tơdrong hlôh vao, vang jang tơdrong jang tơpôl; đei vei lăng jơhngơ̆m pran, vei lăng tơdrong pơm tơm, đei yua trŏ luơ̆t.