Truh dang ei Anih tơm jang gah Mŭk drăm păng Cham char hlôi pơgơ̆r chih akŏm 6 Tơchơ̆t păng 4 Thông tư, lơ̆m ‘noh, hăm chih akŏm Tơchơ̆t hơdah pơm kiơ̆ minh ƀar tơdrong lơ̆m Luơ̆t Teh đei 10 Apăng, 115 Tơdrong pơkăp hơdah 51 tơdrong tơm đei chih lơ̆m Luơ̆t, akŏm lơ̆m pơkăp hơtŭm nhen: sơnong jang, pơgơ̆r jang kơ anih chih măt gơh yoa teh, anih jang hơtŏk teh mong; pơjao teh, ăn thuê tơplih trong yoa teh; sek tơlang tơdrong tơgar teh, sek tơlang pơm yoch glăi gah teh hăm bơngai pơm glăi luơ̆t pơkăp gah teh. Thứ trưởng Anih tơm jang gah Mŭk drăm păng Cham char Lê Minh Ngân ăn tơbăt: “Anih tơm jang gah Mŭk drăm păng Cham char pơtruh nơ̆r hăm rim anih jang đei tơrĕk kơ 63 dêh char, pơlei tơm mă Trung ương vei lăng, kiơ̆ đơ̆ng 4 tơdrong hop akŏm tơ̆ dôm tơring; iŏk nơ̆r tơgop chih hăm hla bơar tơ̆ rim anih jang tơm, rim tơring, jơnŭm jang đei tơrĕk vă chih akŏm tơblang hơdah păng pơtruh ăn Anih jang tơm hơlen hơdah. Kơchĕng ah năr 19/04/2024 Jơnŭm jang gô pơgơ̆r hop akŏm hơlen dôm Tơchơ̆t âu”

Lơ̆m hop akŏm, đe Kơdră Anih tơm Choh jang xa păng Hơtŏk tơring tơrang ăn tơbăt: đei lơ tơdrong ‘nao, tơdrong đei lơ̆m chă hơmet tơplih Tơchơ̆t 156 đơ̆ng Khul Kơdră teh đak pơkăp hơdah pơm kiơ̆ minh ƀar tơdrong gah Luơ̆t ‘Long bri Teh bri, adoi nhen chih akŏm tơchơ̆t hơdah gah teh pơtăm ƀa. Anih tơm Choh jang xa păng Hơtŏk tơring tơrang tŏk bŏk oei chă chih iŏk nơ̆r tơgop gah tơdrong chih akŏm 2 tơchơ̆t âu kiơ̆ tơchơ̆t tơlĕch...

Sơkơ̆t hơdah Anih tơm jang gah Mŭk drăm păng Cham char hlôi pơm jang tơnăp, tơtom trŏ tơdrong pơgơ̆r đơ̆ng Jơnŭm pơgơ̆r teh đak, Phŏ Thủ tướng Trần Hồng Hà ră hơdah: athei pơtoi pơm hơdah dôm tơdrong oei đei nơ̆r pơma phara băl gah tơchơ̆t tơlĕch jang...; dah tơtenh iŏk nơ̆r tơgop đơ̆ng tơring, anih jang mŭk drăm, anih jang chĭnh trĭ - tơpôl... hăm tơchơ̆t gah hrŭ ‘mong, tơgŭm anih oei xa ‘nao, sơkơ̆t kơjă teh; ming man, kiơ̆ hla bơar ƀônh hiôk hăm Tơchơ̆t gah hrŭ hành chĭnh lơ̆m tơdrong đei ƀôh gah teh. Phŏ Thủ tướng pơkăl: Anih tơm Choh jang xa păng Hơtŏk tơring tơrang athei vei tơnăp pơtruh chih akŏm Tơchơ̆t hơdah gah teh pơtăm ƀa trŏ khei năr pơkăp, athei asong hơdah gah tơdrong hơmet pơ-‘lơ̆ng hla bơar hành chĭnh, tơlĕch chă hơlen tơdrong pơm kiơ̆ tơchơ̆t gah teh bri, teh pơtăm ƀa: “Athei pơm kiơ̆ dôm tơchơ̆t vei sơđơ̆ng tôm tơdrong tơchơ̆t hăm Luơ̆t teh, vei sơđơ̆ng athei trŏ hăm khôi lươ̆t pơkăp, Tơchơ̆t ưh đei pha hăm Luơ̆t. Athei dôm bơngai jang gah tơdrong âu asong sơnong jang vă băt hơdah, pơm jang athei kiơ̆ tơchơ̆t tơlĕch vă tơring pơm kiơ̆ păng adoi jĭ anih vă bơ̆n chă hơlen mă trŏ ƀlep”

Phŏ Thủ tướng pơkăl Anih tơm Tư pháp, Anih tơm jang gah Mŭk drăm păng Cham char jang hadoi dah tenh kuăng hơmet hla bơar kăl vă pơtruh ăn Kuôk hô̆i tơlĕch Tơchơ̆t asong Luơ̆t Teh sơnăm 2024 gơh hrôih iŏk yoa ah năr 1/7/2024. Anih tơm Ming man tenh kuăng chih hla bar pơkăp hơdah pơm kiơ̆ Luơ̆t Hnam oei sơnăm 2023 păng Luơ̆t Tĕch pơdro teh hnam oei sơnăm 2023 vă tơtom iŏk yoa hơtŭm hăm Luơ̆t Teh sơnăm 2024 ah năr 1/7/2024.