“Việt Nam hlôi iŏk đei lơ tơdrong ‘lơ̆ng lơ̆m pơtrŭt tơdrong pơm tơm ăn kon pơlei kon kông”. ‘Noh jĭ nơ̆r pơma hơdăh đơ̆ng Phŏ kơdră Anih vei lăng hơdrĕch kon kông Y Thông,  Kơdră khŭl Việt Nam tơ̆ jăl hôp ‘măng mă 111 kơ Anih vei lăng tơdrong pơkăp apŭng plĕnh teh găh sut hŭt rim trong pơdê hăm bơngai kon kông (CERD)‘nao pơgơ̆r tơ̆ Geneva, Thụy Sỹ. Tơroi tơbăt tơ̆ jăl hôp, Phŏ kơdră Anih vei lăng hơdrĕch kông Y Thông, Kơdră khŭl Việt Nam tơ̆ Anih vei lăng tơdrong pơkăp CERD pơma hơdăh: Đơ̆ng sơnăm 2013 truh dang ei, tơdrong jang khôi luơ̆t Việt Nam hơnơ̆ng đei pơjing păng chih pơkeh hrơ̆ch 1 ‘măng, pơm lăp găh tơdrong pơm tơm kơ kon bơngai lơ̆m noh đei tơdrong vei sơđơ̆ng dôm tơdrong pơm tơm păng đei yua trŏ ƀlep đơ̆ng kon pơlei kon kông.

Lơ̆m 10 sơnăm âu ki, Kuôk hô̆i Việt Nam hlôi tơlĕch ăn 125 luật, lơ̆m noh đei 352 tơdrong pơkăp luơ̆t kơtă ƀơm truh tơdrong pơm tơm păng hơnăp jang đơ̆ng dôm hơdrĕch kon kông. Kiơ̆ lơ̆m 1 păh apŭng plĕh teh, Việt Nam hlôi hơdrin vang akŏm dôm hop akŏm găh tơdrong pơm tơm kơ kon bơngai, tơjră pơdê băl hăm bơngai kon kông, pơkăp pơm kiơ̆ dôm tơdrong Hơgăt apŭng plĕnh teh mă Việt Nam jĭ teh đak vang jang lơ̆m khŭl. Phŏ kơdră Anih vei lăng hơdrĕch kon kông Y Thông pơma hơdăh Việt Nam ling lang pơyom păng vei sơđơ̆ng dôm tơdrong pơm tơm ăn bơngai kon kông păng bơngai teh đak đe tơ̆ Việt Nam, mă loi ‘noh jĭ iŏk đơ̆ng Việt Nam mơ̆t jang lơ̆m tơdrong pơkăp apŭng plĕh teh găh sut hŭt rim trong pơdê hăm bơngai kon kông (CERD) lơ̆m sơnăm 1982.