Bơngai tang măt Đặng Hoàng Giang, Kơdră chĕp kơ̆l Khul tang măt ăn Việt Nam tơ̆ Liên hợp quốc đei jơ bơ̆ jang hăm yă Najat Maalla M’jid, Bơngai tang măt gĭt kăl ăn Tổng thư ký Liên hợp quốc găh tơdrong tĕh dong, ƀơƀrơ̆h đe hơiŏh vă mơ̆ng nơ̆r tơroi găh dôm tơdrong iŏk đei lơ̆m ‘măng năm hơpong tơ̆ Việt Nam ‘nao âu đơ̆ng Bơngai tang măt gĭt kăl, atŭm hăm ‘nŏh pơma nuh găh trong hơtŏk tơdrong jang hơdoi tơ̆ hơnăp kơnh.

Yă Najat Maalla M’jid tôch lăp đon găh ‘măng năm hơpong, tơchĕng ‘lơ̆ng tơdrong tơgŭm, khôi luơ̆t, đon adrin păng tơdrong jơnei đơ̆ng Việt Nam lơ̆m tơdrong jang atŏk tơiung mŭk drăm, tơpôl, bơ̆ jang dôm tơdrong jang tơm atŏk tơiung pran kơjăp, vei lăng, năng tông đe hơiŏh, mă loi hăm hơiŏh đei tơdrong arih xa mơmat tat. Bơngai tang măt Đặng Hoàng Giang pơma hơ dăh Việt Nam ling lang năng kăl păng năng đe hơiŏh jĭ tơdrong kăl đei tơgŭm hơdrol hlŏh lơ̆m rim tơdrong tơgŭm vă jang atŏk tơiung tĕh đak păng pơma hơdăh vă hơnơ̆ng jang hơdoi mă kơjăp hăm Liên hợp quốc găh tơdrong ‘nâu.