VOV4.Bahnar - Tơ̆ hop akŏm rim khei kơ sơ̆ ‘năr 12/5, tơl nơ̆r apinh đơ̆ng bơ ngai chih tơ drong kơ tơ̆ng ang găh kơ sô̆ jên tơ gŭm đơ̆ng Khul kơ dră tĕh đak Việt Nam ăn dôm tơ drong jang tơ gŭm dŏng hăm kon pơ lei Ucraina, Phŏ bơ ngai chă pơ ma tơ lĕch nơ̆r ăn Anih tơm jang tơ bôl Đoàn Khắc Việt ăn tơ băt: Việt Nam tôch tơ rĕk, pơ ngơ̆t hăm tơ pôl lơ̆m apŭng plenh tĕh găh dôm tơ drong oei đei tơ̆ Ukraine, akhan kăl pơ tôch hloi tơ drong tơ blăh, vei sơ đơ̆ng ăn kon pơ lei.

Hăm jơ hngâm đon ‘nŏh, pơm kiơ̆ nơ̆r krao hơ vơn đơ̆ng Liên Hợp Quốc, Việt Nam vang tơ gop 500.000 USD, đei 100.000 ăn anih mong jên tơ jră hrĕnh hăm tơ drong krê CERF, 100.000 USD ăn Anih tơm vei lăng jang pơ gang apŭng plenh tĕh, 100.000 USD ăn Anih mong jên tơ gŭm ăn hơ iŏh UNICEF, păng 200.000 USD kiơ̆ đơ̆ng Jơ nŭm ‘long pơ glang ƀrê Việt Nam gơih ăn Jơ nŭm ‘long pơ glang ƀrê Ukraine, vang tơ gop ăn dôm tơ drong jang dŏng tơ gŭm ăn kon pơ lei ƀơm kơ nê̆ yoa tơ drong tơ blăh tơ̆ Ukraine.

Dơ̆ng: Tơ blơ̆