VOV4.Bahnar - Năr 21/1, Dơnŏ anĭh bơ̆ jang kơ Radiô Nơ̆r Pơma Việt Nam oei tơ̆ Tây Nguyên hlôi jang hơdoi hăm hnam trương Cao đẳng Văn hóa Nghệ thuật dêh char Dak Lăk, Kŏng ty pơm trong gơng Hoàng Nam hlôi pôk tơmam drăm ăn pơlei Bhôk, tơring Yang Tao, apŭng Lăk ƀlep lơ̆m jơ ‘năr Têt Nguyên đán Nhâm Dần 2022.

Vă jê̆ 100 tơnô̆ tơmam drăm, mĭnh tơnô̆ đei 10 kĭ phe păng kon jên ăn rim ŭnh hnam dơnŭh tơ̆ pơlei Bhook-pơlei pơm ‘nhŏng ŏh hăm Dơnŏ anĭh bơ̆ jang kơ Radiô Nơ̆r Pơma Việt Nam oei tơ̆ Tây Nguyên. Akŏp kơ jă tơmam drăm au ‘nŏh 20 trĭu hlak jên. Ƀok Y Al Trei, Thôn trơng pơlei Bhôk tơbăt, pơlei Bhôk hlôi pơm ‘nhŏng ŏh hăm Dơnŏ anĭh bơ̆ jang kơ Radiô Nơ̆r Pơma Việt Nam oei tơ̆ Tây Nguyên hlôi hlŏh 10 sơnăm, lơ̆m khei năr au ki, ƀlep lơ̆m jơ ‘năr Lêh, Têt, Hơnĭh au hơnơ̆ng năm ngôi, hơlêm, tơgŭm djru pơm hnam păng pôk ăn kon pơlei. Tơdrong mă au tơgŭm ăn kon pơlei chơt hơ iă păng lui kiơ̆ kơ jăp lơ̆m tơdrong tơgoăt tơgoăl, tơgŭm djru dĭh băl đơ̆ng hơnĭh bơ̆ jang pơm ‘nhŏng ŏh hăm pơlei ‘măn ăn pơlei.

Tơblơ̆ nơ̆r: Amazưt