Trong mơ̆t tơ̆ plei Bhôk, xăh Yang Tao, apŭng Lắk ‘yâu rơgoh, 2 păh trong đei pơ rŏ hăm dôm kơ nong pơ kao. Tơ̆ kơ sơ̆, ŭnh điên tơ̆k hơdăh trong pơlei roi pơm tơdrong hơdăh ăn plei Bhôk. Tơdrong arih sa kơ kon pơlei lơ̆m pơ lei kŭm ƀrư̆ ƀrư̆ tơplih ‘lơ̆ng, kơ sô̆ ŭnh hnam dơnuh hin sơnăm 2022 jur 9 ŭnh hnam pơ têng hăm sơnăm 2021. Kiơ̆ kơ ‘nhŏng Y Al Trei, Phŏ bí thư chi bộ, bơngai pơ gơ̆r pơlei plei Bhôk, đĭ đăng dôm tơdrong tơplih âu tă kơ đei đơ̆ng tơdrong Tơchơ̆t 02 păng Tơchơ̆t 05 đơ̆ng Đảng bộ apŭng Lắk, lăp hăm jơhngơ̆m đon tơchĕng ‘meh vă đơ̆ng kon pơlei:

“Ĭnh krao hơvơn kon pơ lei hôp vă tơroi tơbăt, pơtho bơ̆jang kiơ̆ tơdrong jang, trong jang đơ̆ng tơdrong tơchơ̆t 02 ‘noh yă kiơ, đang kơ ‘noh tơdrong Tơchơ̆t 05 jĭ trong kiơ, yua kơ tơdrong Tơ chơ̆t   02 sư ‘noh thoi âu trong nơnăm đei ŭnh điên tơk hơdăh păng 2 păh trong kon pơlei pơ tăm pơ kao, păng tơdrong Tơchơ̆t 05 pơtho kon pơlei pơtăm ‘long sa plei, rong kơ pô, rơmo. Đơ̆ng rŏng kơ hop akŏm tơroi tơbăt 2,3 ‘măng thoi noh, ‘noh ĭnh năm tơroi tơbăt, krao hơvơn rim hnam păng ĭnh tơroi tơbăt hăm kơ măy kơ mŏk kơtơ̆ng ang kiơ̆ facebook, kiơ̆ Zalo vă kơ kon pơlei băt hơdăh hloh ƀiơ̆.”

Tơdrong tơchơ̆t 02 păng Tơchơ̆t 05 đơ̆ng Anih chĕp kơ̆l Đảng bộ apŭng Lắk jăl jang 2020-2025 tŏk bŏk đei tơlĕch jang hrơ̆ch 1 ‘măng tơ̆ dôm xăh lơ̆m apŭng. Lơ̆m noh, tơdrong Tơchơ̆t 02 găh akŏm hơvơn dôm kon jên, vă pơjing păng hơtŏk tơiung apŭng Lăk jing hơnih tơmang lăng tơm kơ dêh char lơ̆m sơnăm 2030. Tơdrong tơchơ̆t 05 găh bơ̆jang kiơ̆ tơplih trong jang ‘long pơtăm, kon tơrong jăl jang 2021-2025. Bơ̆jang kiơ̆ 2 tơdrong tơchơ̆t âu, plei Bhôk hlôi tơlĕch jang pơm hloh 2.500 m trong ŭnh điên tơ̆k hơdăh, pơtăm 325 tơnơm pơkao hla ar tơ̆ dôm trong glung tih mơ̆t lơ̆m pơlei. Akŏp kơjă 2 tơdrong jang âu vă jê̆ 40 triệu hlak jên yua đơ̆ng kon pơlei chă tơgop kơ dih. Plei Bhôk kŭm đei asong vă jê̆ 1000 tơnơm ‘long sa plei dôm kơ loăi tơgŭm ŭnh hnam dơnuh hin ơng pơtăm. Mŏ H’Nguyệt Hatrơi, oei tơ̆ plei Bhôk, tơbăt, ưh khan lăp asong ‘long pơtăm, kang ƀô̆ pơtrŭt choh jang sa oei năm trŭh tơ̆ pơgar pơtho trong pơtăm păng vei lăng vă đei iŏk yua:

“Ĭnh apĭnh bơnê kơ Đảng, teh đak hlôi tơgŭm ŭnh hnam nhôn hơdrĕch ‘long pơtăm. Ƀok pơ gơ̆r pơlei kŭm tôch kơ bơngơ̆t truh ŭnh hnam nhôn. Ĭnh gô hơdrin vei lăng vă ‘long sa plei bluh jing ‘lơ̆ng vă đơ̆ng rŏng âu đei iŏk yua vă đei jên hơmet ‘lơ̆ng tơdrong arih sa.”

Kiơ̆ kơ ƀok Nguyễn Văn Huyên, Bí thư anih jang đảng xăh Yang Tao, apŭng Lắk, vă dôm trong jang tơgŭm đơ̆ng Đảng yak mơ̆t lơ̆m tơdrong arih sa, gĭt kăl hloh oei jing kang ƀô̆. Mă loi ‘noh jĭ tơring kon pơlei kon kông, tơdăh kang ƀô̆ hlôh tơring, jê̆ kon pơlei, jang tơnăp, pơcheh hơgei gô tơgop tơtĕnh hơnhăk tơdrong tơchơ̆t đơ̆ng Đảng truh hăm kon pơlei:

“Dang ei dôm đảng viên mơ lôh nhen Y Al Trei tă kơ bơngai pơgơ̆r pơlei ngăl. Lơ̆m kơ plăh răp hơlen lăng tơdrong jang sư ling lang hơtŏk hơnăp jang păng kŭm bơ̆jang ‘lơ̆ng tơdrong jang kơ tơring. Âu ki bơ̆jang kiơ̆ tơdrong Tơchơ̆t 05 păng Tơchơ̆t 02, akŏm 2 tơdrong tơchơ̆t âu ăn kơ dôm bơngai pơ gơ̆r pơlei păng chi bộ pơgơ̆r păng hơvơn đĭ đăng rim kon jên jang đang kơ ‘noh pơ jao ăn pơlei pơla krao hơvơn lơ kon pơlei tơgop jên vă pơtăm pơkao đang kơ ‘noh trong ŭnh điên tơ̆k hơtăh, brei mơ sơ̆ ‘noh plei Bhôk pơm đei trong ŭnh điên tơ̆k hơdăh, kon pơlei lăp đon.”

Dôm đảng viên bơngai kon kông jang tơnăp nhen Y Al Trei tŏk bŏk tơgop gĭt kăl tơroi tơbăt, hơnhăk trong jang đơ̆ng Đảng, tơdrong jang tơgŭm đơ̆ng teh đak truh hăm kon pơlei, ƀrư̆ ƀrư̆ tơgŭm kon pơlei tơplih đơ̆ng trong tơchĕng truh bơ̆jang vă pơ jing tơdrong arih sa roi ‘năr roi ‘lơ̆ng hloh.