Lơ̆m pơbŭng hnam să 70m² tŏk bŏk ming man vă keh đang tơ̆ pơlei Bôn Chơ Ma, tơring Ia Trôk, apŭng Ia Pa, dêh char Gia Lai, mŏ Siu Shin Cha, 25 sơnăm chơt hơ iă ‘nă hal. Mŏ tơroi, hnam ou tơƀôh hơdăh tơdrong jang sa đei iŏk yua kơjăp kơ ŭnh hnam, đơ̆ng ŭnh hnam dơnuh truh yak hloh dơnuh tơpă. Kiơ̆ kơ mŏ Siu Shin Cha, tơdrong rơvơn hlôi truh hăm ŭnh hnam đơ̆ng sơnăm 2020, mư̆h tŏk iŏk đei 50 triu hlak jên đơ̆ng Hơnih mong jên Tơgŭm djru tơpôl:"Gơnơm tŏk iŏk đei kon jên ou kơna ŭnh hnam mă đei rơvơn jang sa. Ŭnh hnam răt dơ̆ng 2 tŏ rơmo yŏng păng chông đei 8 tŏ kon bơih păng ‘nao ou tŏk bok chă hơdrin man hnam. Gơnơm kon jên tĕch rơmo kơna ŭnh hnam mă đei kon jên chă jang sa, pơtăm dơ̆ng hơ̆t hla, răt gre kŏng nŏng."

Trong yak hloh dơnuh hin kơ ŭnh hnam ƀok Rơ Chăm Hà, rơneh sơnăm 1962 oei tơ̆ pơlei Hbel, tơring Ia Kdăm jei đei atŏk tơ iung gơnơm kon jên tơgŭm djru. Ŭnh hnam đei 5 ‘nu bơngai lăp đei hnam să 24m² đei ming man hăm kon jên tơgŭm djru păng 2 sao chŭn na ƀa đak. Dôm tơdrong chă răt sa kơ ‘năr ‘noh gơnơm lơ̆m chă jang ăn kơ đe. Hơdrin yak hloh dơnuh hin, sơnăm 2021, ƀok Hà hơdrin chă tŏk iŏk 50 triu hlak jên đơ̆ng Hơnih mong jên Tơgŭm djru tơpôl ‘moi kiơ̆ ăn asong tŏk iŏk lơ̆m tơring. Ƀok iŏk jên ou răt 2 tŏ rơmo păng chă pơtăm ‘ngiĕt hiĕm lơ̆m pơgar cham păng chă mơng teh đe pơtăm ƀum ƀlang. Dang ei, ƀok Hà ưh khan lăp yak hloh dơnuh hin mă oei đei tơdrong hơrih sa sơđơ̆ng ‘lơng hơ iă hloh dơ̆ng:" ‘Măng blŭng ĭnh răt 6 tŏ nhŭng, lơ̆m chă rong jei lôch 1 poăt. Đơ̆ng rŏng ‘noh ĭnh răt rong dơ̆ng hăm akŏp chă rong đei truh 18 tŏ. Mưh tĕch đei jên man hnam, răt dơ̆ng 4 sao 4 teh mir na vă choh jang sa, đei ‘măng bơ̆n chă rei pơtăm ƀa, đei ‘măng chă pơtăm hơ̆t hla. Tơdrong jang sa kơ ŭnh ham đei sơđơ̆ng, đei kon jên lăng ba kon hơ ‘lơ̆p đơ̆ng rŏng ou kơnh dơ̆ng.”

Ƀok Trần Ánh Tôn, Kơdră chĕp pơgơ̆r Hơnih mong jên Tơgum djru Tơpôl apŭng Ia Pa, dêh char Gia Lai tơbăt: Tơ̆ apŭng Ia Pa, đei vă jê̆ 2.200 ŭnh hnam dơnuh, găh lơ ŭnh hnam kon kông. Vă sơđơ̆ng 100% ŭnh hnam dơnuh đei tŏk iok kon jên tơgŭm djru, 168 khul pơkom păng ăn tŏk iŏk jên tơ̆ 9 hơnih jang hlôi tơlĕch jang hơlen păng tơgŭm djru bơngai dơnuh pơm hla bơar tŏk iŏk kon jên. Đơ̆ng sơnăm 2021 truh dang ei hlôi đei 6.610 ŭnh hnam lơ̆m apŭng yak hloh dơnuh hin gơnơm iŏk yua kon jên tŏk iŏk ou trŏ lăp.“Hơnih jang ăn asong tŏk iŏk hlôi lăng ba kơjăp kon jên ăn asong tŏk iok hăm 3 Tơdrong jang tơjur dơnuh, tơgŭm djru ŭnh hnam dơnuh păng vă jê̆ dơnuh. Pơm sơđơ̆ng ăn rim bơngai ou hoei kơ ƀăh kon jên tơmơ̆t jang, mưh chă ‘meh vă păng đei tôm tơdrong pơkăp, hơnih bơ̆ jang gô ăn asong hloi unh hnam kon kông chă tŏk iŏk kon jên tĕnh koăng păng tơtom vă tơmơ̆t choh jang sa, mơdro sa lơ̆m tơring. Jô̆ truh dang ei, kon jên ăn asong tŏk iŏk kiơ̆ 3 tơdrong jang yak hloh dơnuh hin hlôi hloh 166 ti hlak jên hăm 3.900 ŭnh hnam tok iŏk, tơmơ̆t 36,7% akŏp kon jên ăn asong tŏk iŏk.”

Lơ̆m 10 sơnăm dêh char Gia Lai jang kiơ̆ Nơ̆r athei jang kiơ̆ 40-CT/TW sơnăm 2014 kơ Ban Bí thư găh atŏk kơtang tơdrong chĕp pơgơ̆r kơ Đảng hăm tơdrong ăn asong tŏk iŏk jên tơgŭm djru, hlôi đei 156.000 ŭnh hnam dơnuh tơ̆ dêh char đei tŏk iŏk jên, akŏp kon jên 7.600 ti hlak jên. Đơ̆ng noh, 55.600 ŭnh hnam yak hloh dơnuh hin. Kon jên jang tơgum djru tơpôl jei jing kon jên jang kăl hloh vă Gia Lai ming man đei hloh 242.000 hơnih đak sŏ nhă rơgoh păng hloh 3.000 pơbŭng hnam ăn ŭnh hnam dơnuh tơ̆ tơring tơnap tap. Kiơ̆ đơ̆ng Hơnih Đảng dêh char Gia Lai tơbăt, kon jên ăn tŏk iŏk ‘mêm mơnat ‘noh jing ‘long hơnong ‘lơ̆ng hơ iă tơgŭm ăn kon pơlei pơla atŏk tơ iung choh jang sa, hơmet pơ ‘lơ̆ng hơrih sa, tơgop pơm tơjur dơnuh hin kơjăp ‘lơ̆ng. ‘Nou jei jing kon jên jang kăl hloh lơ̆m khei năr ou kơnh, tơgop ăn lơ̆m tơ iung pơjing tơring tơrang ‘nao, atŏk tơ iung mŭk drăm-tơpôl tơring kon kông păng groi kông tơ̆ dêh char Gia Lai.