VOV4.Bahnar - Tơ blăh vang đĭ pă đei, teh đak đĭ rơ ngei, mă lei dôm bơ ngai lĭnh kơ Khŭl linh kon pơ lei Việt Nam tam mă 1 năr pơ dơh ngôi. Hơ năp jang vei lăng tơ drong pơm rơm achon đak dơ sĭ, đak dơ sĭ gĭt kăl kơ teh đak, vei kơ jăp cham char rơ ngei sơ đơ̆ng ‘măn tơ̆ hơ ngiĕng bơ ngai lĭnh đak dơ sĭ hơ năp jang tih tên tơ̆ hơ năp Đảng, hơ năp teh đak păng kon pơ lei. Tơ drong plang hơ kâu đơ̆ng dôm bơ ngai kon hơ gei lôch hơ chăng yua kơ teh đak đei jơ hnơr hrei ‘nâu ling lang tơ ƀlŏk hăm jơ hngơ̆m đon kŭp yom. Dôm bơ ngai linh yak kiơ̆ dơ̆ng jơ̆ng đe ƀok yă ling lang hơ drin, pơ hrăm, khŏm tơ blăh hŭt hơ kâu vă vei lăng kơ jăp achon đak dơ sĭ, đak dơ sĭ kơ teh đak.

Lơ̆m hơ nih glơch kơ đak dơ sĭ, teng neng re ja va đơ̆ng hnam chua Sinh Tồn hrau hơ dai hăm ƀâu phu nhang do, kŭm hăm đak poh yă klĭk klơ̆k, kial tơ hlu sơ sĭu đơ̆ng dơ sĭ. Đĭ đăng hyŭr jơ hngơ̆m kŭp yom, băt bơ nê tôch gĭt kăl, lĭnh păng kon pơ lei achon Sinh Tồn soh nhang ƀlŏk hơ dơ̆r kơ dôm bơ ngai lĭnh đak dơ sĭ plang hơ kâu tơ̆ đak dơ sĭ jrŭ... Dơ̆ng tơ̆ hơ năp kơ ƀang chih hơ năn 64 ‘nu lĭnh nuih mơng lôch dŏng teh đak lôch hơ nhăng ƀơ̆t vei lăng tơ drong pơm tơm đak dơ sĭ, achon đak dơ sĭ tơ̆ tơ ring đak dơ̆ sĭ Gạc Ma, mŏ Lữ Thị Kim Cúc, kon pơ lei xăh achon Sinh Tồn ƀrơ̆k jơ hngơ̆m.

Ƀơ̆t năm soh nhang ăn kơ đe lĭnh lôch dŏng teh đak lôch hơ chăng tơ̆ Gạc Ma, kơ dih kâu ĭnh ƀrơ̆k jơ hngơ̆m. Chhôk ‘nă kơ đe ‘nhŏng. ‘Meh pơ hngol đe ‘nhŏng tơ gŭm ăn rim ‘nu bơ ngai tơ̆ achon pran jăng grăng hơ kâu păng ‘mi rŏ tŏ hơ lăng vă kơ rim ‘nu bơ ngai sơ đơ̆ng bơ̆ jang, arih sa tơ̆ xăh achon.

Trung tá Đinh Cao Toan, kang ƀô̆ achon Sinh Tồn tơ băt: Lêh ƀlŏk hơ dơ̆r kơ đe lĭnh hŭt kơ kâu lôch hơ chăng vă vei lăng achon Gạc Ma ‘noh jĭ ‘măng vă pơ tho tơ drong joăt joe kach mang, vă lĭnh kon pơ lei lơ̆m achon hlôh hloh găh dôm tơ drong jang păng tơ drong plang hơ kâu đơ̆ng jơ hnơr năm hơ drol, tơ ƀôh jơ hngơ̆m đon băt bơ nê hăm dôm jơ hnơr đe yă ƀok hơ drol sơ̆ hlôi ưh kơ hmach kơ pham lĕch sĕch huŏng vă vei lăng đak dơ sĭ, achon đak dơ sĭ. Đơ̆ng noh rim ‘nu kang ƀô̆, khŭl linh achon tơ lĕch kơ sư̆k pơ jei băl, hơ drin jang đang hơ gei rim hơ năp jang đei pơ jao:

Ƀlok hơ dơ̆r tơ drong plang hơ kâu đơ̆ng 64 ‘nu lĭnh nuih mơng lôch dŏng teh đak lôch hơ chăng tơ̆ Gạc Ma, kiơ̆ đơ̆ng noh vă pơ tho tơ drong joăt joe jơ hngơ̆m ‘mêm kơ teh đak ăn rim kang ƀô̆, khŭl linh yak kiơ̆ dơ̆ng dôm jơ hnơr đe ƀok yă sơ̆ lơ̆m tơ drong jang pơ jing păng vei lăng teh đak, mă loi ‘noh jĭ vei lăng tơ drong pơm tơm đak dơ sĭ, achon đak dơ sĭ.

Kiơ̆ ƀok Chua Thích Tâm Thành, bơ ngai vei lăng hnam chua Sinh Tồn: Dôm năr khei 7, hnam chua Sinh Tồn – hơ nih dan kơ ƀang chih hơ năn 64 ‘nu lĭnh lôch dŏng teh đak lôch hơ chăng lơ̆m tơ drong vei lăng achon Gạc Ma đei lơ kang ƀô̆, khŭl linh, kon pơ lei thị trấn Trường Sa păng kon pơ lei jang ka jum dăr achon năm soh nhang, soi kơ kuh kơ pơ hngol đe kang ƀô̆, lĭnh đak dơ sĭ hơ gei hlôi lôch tang hăm jơ hngơ̆m đon kŭp yom păng băt bơ nê gĭt kăl. Hnam chua kŭm pơ gơ̆r soi krao pơ hngol ăn đe lĭnh nuih mơng lôch dŏng teh đak, tơ mam soi ‘noh jĭ bơ̆n pơ kao, plei ‘long đei lĭnh kon pơ lei lơ̆m achon chă pơ tăm kơ dih. Tơ drong jang âu tơ ƀôh tơ drong joăt joe nhă đak ƀlŏk kơ tu, băt bơ nê đơ̆ng hơ drĕch hơ drŭng Việt Nam, ƀlŏk hơ dơ̆r kơ đe lĭnh nuih mơng hlôi lôch hơ chăng yua kơ tơ drong pơm tơm kơ đak dơ sĭ, achon đak dơ sĭ, yua kơ hơ găt teh kơ teh đak.

Tơ̆ lêh soh nhang, krao pơ hngol, ĭnh ling lang đei krao khan apĭnh yang phât, đe lĭnh lôch dŏng teh đak lôch hơ chăng tơ̆ đak dơ sĭ, achon đak dơ sĭ Trường Sa tơ gŭm ăn kang ƀô̆, ‘nhŏng oh ƀô̆ đô̆i, kon pơ lei tơ ring ‘nâu đei tơ drong arih sa sơ đơ̆ng hiôk, hoei kơ đei jĭ jăn, đei jơ hngơ̆m pran jăng grăng hơ kâu vă vei lăng đak dơ sĭ, achon đak dơ sĭ  Trường Sa đei sơ đơ̆ng hiôk păng pŭn ai.

Tơ drong jang Gạc Ma lơ̆m til pơ gê ‘năr 14/3/1988 hlôi yak mơ̆t lơ̆m jơ hnơr arih hơ drĕch hơ drŭng nhen 1 tơ drong tơ ƀôh ưh kơ đei lai yơ hiong lơ̆m jơ hngơ̆m đon rim ‘nu kon pơ lei groi teh Việt. 64 ‘nu lĭnh đak dơ sĭ ƀĕnh đon hơ drin păng jơ hngơ̆m pran mơ lôh hlôi lôch hơ chăng tơ̆ đak dơ sĭ, mă lei đon hơ drin tôch kơ tang đơ̆ng đe sư hlôi jing um rup man ưh kơ đei hiong găh tơ drong nuih mơng kach mang, tơ tă kơ jơ hnơr đơ̆ng rŏng kơnh găh jơ hngơ̆m đon lôch hơ rih vă vei lăng tơ drong pơm tơm đak dơ sĭ, achon đak dơ sĭ kơ teh đak. Jơ hngơ̆m đon ‘noh hlôi mơ̆t hrơm lơ̆m rim ‘nu lĭnh tŏk bŏk bơ̆ jang hơ năp jang tơ̆ achon Trường Sa năr ‘nâu. Trung sĩ Nguyễn Quốc Thịnh, lĭnh achon Cô Lin chhôk ‘nă:

Jĭ jơ hnơr đơ̆ng rŏng, kơ dih kâu ĭnh ƀôh tôch kơ chhôk ‘nă găh dôm tơ drong tơ blăh jơ nei đơ̆ng chăl yă ƀŏk hơ drol sơ̆, pơ tho tơ ƀôh tơ drong joăt pơ jing đei tơ drong tơ blăh jơ nei đơ̆ng khŭl linh bơ̆n, chơt hơ iă đei pơm kơ đông tơ̆ achon Trường Sa, hơ nih đe kang ƀô̆, lĭnh oei prăt măng prăt năr hơ met pơ ‘lơ̆ng dôm tơ drong mơ nat tat păng vei kơ jăp tơ drong pơm tơm đak dơ sĭ kơ teh đak. Ĭnh hlôi hơ drin hŏk pơ hrăm, hơ tŏk ‘lơ̆ng jơ hngơ̆m đon jang hơ năp ling lang iung tơ blăh; ling lang hơ drin pơ hrăm jơ hngơ̆m pran pơm lăp hăm ‘meh vă hơ năp jang tơ̆ cham char đak dơ sĭ.

Thượng tá Lương Xuân Giáp, Chính uỷ Lữ đoàn 146 (Khŭl Trường Sa), Tơ ring 4 lĭnh đak dơ sĭ pơ ma hơ dăh:

Vei lăng tơ drong pơm tơm kơ teh đak lơ̆m achon Trường Sa ‘lơ̆ng, sơ đơ̆ng ‘noh jĭ hơ năp jang đơ̆ng bơ ngai lĭnh Trường Sa chăl rơ ngei đơ̆ng nhôn. Chơt hơ iă mă lei kŭm đei mơ mat tat, plang jơ hngơ̆m, ưh khan lăp đei ƀơ̆r hiơ hiĕk mă đei hloi tơ drong ơh kơ ‘ngon, đei hloi plang sĕch hơ kar. Yua thoi noh, rim ‘nu kang ƀô̆, khŭl linh Trường Sa nhôn hrei ‘nâu ling lang chih răk, vei lăng kơ jăp tơ drong pơm tơm đak dơ sĭ achon đak dơ sĭ kơ teh đak. Pơ jing achon pran găh tang găn, ‘lơ̆ng găh trong arih, hơ iă găh hơ nih cham char; ‘lơ̆ng hơ iă găh tơ goăt 1 jơ hngơ̆m đon lĭnh kon pơ lei, vei kơ jăp Trường Sa, pơm tơm kơ dih kơ teh đak.

Vă đei 1 teh đak hiôk hian, rơ ngei nhen hrei ‘nâu, băt dôm yơ pham lĕch sĕch huŏng đơ̆ng ƀok yă sơ̆ hlôi lôch tang. Jơ hnơr đơ̆ng rŏng pơ tăl dơ̆ng tơ drong joăt đơ̆ng đe ƀok yă hơ drol sơ̆, ling lang iung tơ blăh hŭt jơ hngơ̆m vei lăng achon dơ sĭ, groi teh gĭt kăl kơ teh đak.

VOV1

Thuem: Tơ blơ̆