Jăl trong Yên Ninh kơjung dang hloh 100m, găh dôm kueng kơphô̆ kơ sô̆ 8,9,10 kơ phường Yên Ninh, pơlei tơm Yên Bái đei truh dôm jĭt anih jang păng hnam trưng hŏk. Hơnih ‘nâu mưh mơ̆t blŭng jơ pơgê, hơtuch jơ ‘năr dơ̆ng, kơsơ̆ hơnơ̆ng đei hrăt hrot, pơm glăi jih trong nơnăm păng đĭ hlôi đe ƀôh gre tơ̆m preh băl tơ̆ âu. Kiơ̆ lơ̆m dăr lăng, hơlen lăng yan âu tơ̆ tơring, kŏng an phường Yên Ninh, pơlei tơm Yên Bái hlôi jang tơgŭm hăm kơdră đảng, kơdră chĕp kơ̆l tơring pơjing tơdrong jang “Grŭp chă vei lăng kơdih trong nơnăm sơđơ̆ng tơ̆ ‘măng jang hnam trưng hŏk Jăl 1 păng Jăl 2 Yên Ninh", hăm khŭl lĭnh jang ‘noh đei: lĭnh kon pơlei vei lăng kơdih, vei lăng kueng kơphô̆, vei lăng hnam trưng hŏk păng lơ̆m ‘noh kŏng an ‘noh tơm.

Trung tá Phạm Việt Đức, Phŏ Kơdră Kŏng an phường Yên Ninh, pơlei tơm Yên Bái tơbăt: Grŭp chă vei lăng kơdih đei 8 ‘nu. Rim năr gô pơtơm bơ̆jang tơ̆ hơnih ‘măng jang hnam trưng hŏk hơdrol kơ jơ đe mon mơ̆t hŏk dang 1 jơ păng hơdrol jơ đe mon lĕch đơ̆ng hnam trưng 1 jơ, yua kơ ‘nâu jĭ jơ mĕ ƀă chơ ƀa iŏk brŏk lơ, păng kŭm jing kơplăh đe mon lĕch đơ̆ng hnam trưng- ‘noh jĭ jơ hrăt hrot, hơmơt ưh kơ sơđơ̆ng lơ hloh.

Hnam trưng hŏk jăl 2 Quang Trung pơm tơ̆ trong tơm Quang Trung, pơlei tơm Yên Bái đei hloh 1.400 ‘nu hŏk tro. Mă đơ̆ng ‘măng jang hnam trưng kơtă ƀơ̆t măt trong, mă lei dôm lăm hŏk ‘noh tơ̆ găh kơpal tơngơ̆ 10% kơjung dang 70 mét. Rim năr mưh truh jơ brŏk đơ̆ng hŏk, rơbâu ‘nu hŏk tro ‘noh luh lăh đơ̆ng tơngơ̆ jur păng tơ̆ hơla ‘noh kơ hrĕng ‘nu mĕ ƀă gô sơng iŏk, akŏm hăm gre hơnơ̆ng kơdâu vih vơ̆t tơ̆ trong kơna đa đei ƀôh hrăt hrot.

Vă vei sơđơ̆ng trong nơnăm, ‘ngoăih kơ tơroi tơbăt truh đe mĕ ƀă, hŏk tro păng ăn hŏk tro, thây kô kĭ pơkăp vei sơđơ̆ng ‘lơ̆ng trong nơnăm iŏk đơ̆ng blŭng sơnăm hŏk, rim năr hnam trưng oei klăih song Khŭl kơdră vei lăng hnam trưng jang hơdai hăm bơngai jang gak pơgê kơsơ̆ vei sơđơ̆ng trong nơnăm tơ̆ ‘măng jang hnam trưng.

Kô pơtho Nguyễn Thị Thúy Nga, Phŏ Kơdră vei lăng hnam trưng tơbăt: Hnam trưng hlôi bơ̆jang klaih song trong ăn kơ hŏk tro năm tŏk, năm jur tơ̆ ‘măng jang hnam trưng kiơ̆ 2 trong, 1 ‘noh ăn hŏk tro năm jơ̆ng hoh, 2 ‘noh ‘măn ăn hŏk tro tŭn gre păng athei mĕ ƀă, hŏk tro chơ ba, iŏk brŏk ‘noh dơ̆ng hơtăih kơ ‘măng jang 20 mét. Jang kiơ̆ vei sơđơ̆ng trong nơnăm tơ̆ ‘măng jang, pơgê hrôih ‘noh đei Khŭl kơdră vei lăng hnam trưng, thây kô pơtho, bơngai jang vei lăng păng hŏk tro lăm jang giĕng; tơ̆ ‘năr dơ̆ng ‘noh Khŭl kơdră vei lăng hnam trưng, thây kô pơtho, bơngai jang vei lăng vă ba hŏk tro năm koa trong păih ‘ma, păng mưh brŏk đơ̆ng hŏk ‘noh hŏk tro brŏk đĭ đe thây kô mơ̆i gơh brŏk.

Dôm grŭp chă vei lăng kơdih găh vei sơđơ̆ng trong nơnăm bơ̆jang ‘lơ̆ng hlôi tơgop tơgŭm hơtŏk đon kơchăng đơ̆ng mĕ ƀă, hŏk tro lơ̆m tơdrong pơm kiơ̆ Luơ̆t vei sơđơ̆ng trong nơnăm, tơgŭm đe oh sơđơ̆ng jơhngơ̆m ƀiơ̆ mưh rim ‘măng truh tơ̆ lăm, tơ jur tơdrong hrăt hrot lơ̆m dôm jơ kăl. Oh Bùi Lương Nguyên, hŏk tro Hnam trưng hŏk jăl 2 Yên Ninh, pơlei tơm Yên Bái tơroi: Tơ̆ hnam trưng nhôn kŭm đei pơtho pơhrăm găh vei sơđơ̆ng trong nơnăm nhen hao gre ‘noh athei yơ̆l môk ƀao hiêm, kŭm hăm lơ tơdrong hơgăt nai păng nhôn kŭm pơm kiơ̆ tơpăt. Mưh truh tơ̆ hnam trưng, oh ƀôh đe thây kô, đe mih păng đe ma kŏng an pơtho ‘noh oh kŭm ƀôh ‘măng jang hnam trưng rơhơi hiôk ƀiơ̆, nhôn kŭm sơđơ̆ng jơhngơ̆m ƀiơ̆.

Lơ̆m pơlei tơm Yên Bái dang ei đei 35 tŏ hnam trưng hŏk, hăm hloh 22 rơbâu ‘nu hŏk tro, lơ̆m kơsô̆ ‘noh đei lơ hnam trưng mơ̆t lĕch hrăt hrot, tơngơ̆ dêh... Yua thoi noh, anih vei lăng pơtho pơhrăm pơlei tơm Yên Bái hơnơ̆ng đei hla ar athei dôm anih jang hnam trưng hơtŏk loi dơ̆ng vei sơđơ̆ng lơ̆m tơpôl, sơđơ̆ng trong nơnăm ăn hŏk tro. Ƀok Hà Yên Thái, Phŏ Kơdră vei lăng găh pơtho pơhrăm pơlei tơm Yên Bái, dêh char Yên Bái tơbăt: Anih vei lăng găh Pơtho pơhrăm pơlei tơm hơnơ̆ng jang hơdai kơjăp hăm Anih vei lăng sơđơ̆ng trong nơnăm dêh char vă tơroi tơbăt Luơ̆t trong nơnăm truh hŏk tro; Athei rim hnam trưng lơ̆m jơ kăl đei thây kô pơtho, hŏk tro lơ̆m khŭl hla kơ ƀrê dơ̆ng tơ̆ dôm ‘măng hnam trưng vei sơđơ̆ng klăih song trong, tơtă kơ hŏk tro mơ̆t lĕch lơ̆m ‘măng jang hnam trưng, mă loi ‘noh tơ̆ dôm ‘măng jang hnam trưng đei tơngơ̆ dêh athei hŏk tro tŭn gre jur tŏk, ưh kơ jô̆ gre tang vang hmă dăh mă  gre tang vang điên.

Kiơ̆ chih jô̆, đơ̆ng blŭng sơnăm hŏk 2023 -2024 truh dang ei tam mă đei tơdrong gre tơm preh băl hơyơ kơtang đei ƀôh tơ̆ hơnih ‘măng jang hnam trưng tơ̆ pơlei tơm Yên Bái. Mă lei tơ̆ hơnăp tơdrong gre kơdih hơtŏk tơiung hrĕnh, mă loi ‘noh jĭ gre ô tô, ƀơ̆t mă trong nơnăm tơ̆ lơ hơnih ‘măng jang hnam trưng hŏk tam mă pơm lăp hăm ‘meh vă tơpă yan âu, oei đei tơdrong hŏk tro pơm glăi Luơ̆t sơđơ̆ng trong nơnăm, yua thoi noh ‘ngoăih kơ tơdrong hơdrin đơ̆ng hnam trưng, rim  khŭl lĭnh kơpal, rim mĕ ƀă hŏk tro kŭm kăl kơ hơtŏk ‘lơ̆ng đon hlôh vao pơm kiơ̆ Luơ̆t sơđơ̆ng trong nơnăm; hơnơ̆ng bơngơ̆t truh, pơtho tơtă kơ kon oh pơm kiơ̆ ƀlep dôm tơdrong hơgăt găh vei sơđơ̆ng trong nơnăm, vă găn ƀiơ̆ dôm tơdrong ưh kơ pŭn ai hơmơt đei ƀôh.