Khei ‘năr âu ki, tơdrong jang 8 hơnhăk ba lơ tơdrong tơplih ‘lơ̆ng ăn tơdrong arih xa kơ đe drŏ kăn păng đe hơioh tơ̆ tơring pơmat tat, đei ƀôh kiơ̆ đơ̆ng dôm tơdrong tơgŭm găh tơdrong arih xa, roi tơbăt pơm hơtŏk đon hlôh vao, tang găn iŏk unh om hrôih, teh dong lơ̆m unh hnam…Lơ̆m khei ‘năr bơ̆ jang, Khul drŏ kăn Việt Nam jĭ anih tơm tơlĕch jang dôm tơdrong tơm lơ̆m Tơdrong jang 8. Khul tơƀôh hơdăh đon kơchăng, jang tơnăp păng adrin tôch pơnĕh, đơ̆ng pơgơ̆r bơ̆ jang truh tơlĕch jên. Gơnơm thoi noh, lơ drŏ kăn tơnuh, drŏ kăn arih xa hơdrô̆, hơioh drŏ kăn tơ̆ tơring hơtăih yăih iŏk đei jên tơgŭm, đơ̆ng noh jang tŏk lơ̆m tơdrong arih xa.

Mă lei, hơdai hăm dôm tơdrong ‘lơ̆ng iŏk đei, tơdrong jang 8 kŭm đei 1,2 tơdrong pơmat tat ‘năi. Đei hlŏh 200 kơsô̆ hơgăt vă hơlen năng, lơ̆m noh đei hlŏh 70 kơsô̆ ƀơm truh tơ̆ drŏ kăn, drŏ nglo. Kiơ̆ ƀok Phùng Quốc Huy, Phŏ Kơdră Anih pơgơ̆r jang kơ Trung ương Tơdrong jang tơm kơ teh đak, tơdrong ‘nâu tôch rơđăh, mă lei pơm tơlĕch lơ tơdrong kơhret hăm kăn ƀô̆ tơ̆ xăh, tơ̆ apŭng (adrol ki), tơring mă kơsô̆ bơngai jang tơdrong ‘nŏh oei tŏ sĕt. Đe sư ưh đei tôm bơngai păng tơmam vă chih hơmet, akŏm mă tôm. Anih jang kơmăy kơmŏk tơ̆ lơ tơring oei kơnê̆, pơm ăn tơdrong chih akŏm păng hơlen năng oei tôch pơmat tat.

“Lơ̆m khei ‘năr chih tơlĕch tơdrong jang, đei lơ tơdrong jang pha ra băl hơnơ̆ng đei chih chư "pơ ‘nhŏ ăn drŏ kăn". Mă lei, bơ̆n ‘nao lăp dơ̆ng ƀât tơƀôh trong jang đĕch mă tam chih hơdăh đei dôm tơdrong "pơ ‘nhŏ hơdrol thoi yơ". Tơdrong ‘nâu, pơm ăn kơ bơ̆n ưh gơ̆h chih pơjing sư jing 1 tơdrong hơgăt tôch rơđăh lơ̆m dôm tơdrong jang vă gơ̆h hơlen năng sư ‘lơ̆ng, đei yoa truh dang yơ.”

Yoa thoi noh, vă hơtŏk tơdrong hơtŏ băl kơplăh drŏ kăn hăm drŏ nglo tơ̆ hơnăp kơnh, athei đei lơ trong jang mă lăp ‘lơ̆ng ƀiơ̆. Blŭng a athei akŏm jên, tơmam ăn dôm trong jang, tơdrong jang hlôi ƀôh đei yoa, tơplih ăn tơlĕch jang răh rai. Pơtih gia, dôm trong jang vă chă tơdrong jang ăn drŏ kăn kon kông, dôm lăm pơtho tơƀôh trong arih xa, tang găn iŏk unh om hrôih… hlôi tơƀôh hơdăh tơdrong đei yoa păng kăl đei pơih xă.

Mă 2, athei hơlen năng trong tơlĕch jên jang. Tơdăh rim anih jang iĕ tơlĕch jên jang dih dih, tơdrong mong akŏm păng tơlĕch dơ̆ng gô tôch pơmat tat. Ƀok Phùng Quốc Huy akhan, athei vei kơjăp jên jang kơdih ăn Khul drŏ kăn vă tơlĕch dôm tơdrong jang tơm, thoi noh sư gơ̆h hiôk hian ƀiơ̆ lơ̆m tơdrong vei lăng păng tơlĕch jang tơ̆ yăn âu. ‘Ngoăih kơ ‘nŏh, athei hơtŏk tơdrong pơjao hơnăp jang ăn tơring, pơjoa dơ̆ng tơdrong hơgăt păng jên, tơmam vă khul kơdră tơ̆ xăh kơchăng bơ̆ jang mă lăp hăm tơdrong đei tơ̆ yăn âu kơ rim tơring.

“Bơ̆n athei tơjur ƀiơ̆ jên mong, vei lăng tơ̆ Trung ương, tơplih kơ ‘nŏh jĭ pơjao lơ ƀiơ̆ ăn tơring. Tơring jĭ anih hlôh vao hơdăh hlŏh tơdrong arih xa kơ kon pơlei, pơjao ăn đe sư vă tơgŭm ăn dôm tơdrong jang gơ̆h lăp hăm yăn âu păng đei yoa ‘lơ̆ng ƀiơ̆.”

Mĭnh tơdrong nai kŭm tôch gĭt kăl athei tơrek truh ‘nŏh jĭ sek tơlang dôm tơdrong juăt ưh kơ ‘lơ̆ng nhen iŏk unh om hrôih, oei băl hơgăm… ‘Nâu jĭ dôm tơdrong tơm găn trong jang tŏk đơ̆ng đe drŏ kăn păng hơioh bơngai kon kông. Kŭm hăm ‘nŏh, athei jang hơdoi mă ‘lơ̆ng đơ̆ng dôm anih jang vă huei hơdrom băl, iŏk yoa ‘lơ̆ng jên, tơmam.

Tơdrong hơtŏk hơnăp jang, anih dơ̆ng ăn đe drŏ kăn, vei lăng năng tông đe hơioh ưh lăp tơdrong đei yoa tôch tơgăl đĕch, mă oei jing tơmât jên jang tôch ‘lơ̆ng ăn ning mônh kơnh. Lơ̆m chăl ‘nao, hơtŏ băl kơplăh drŏ kăn hăm drŏ nglo đei tơmât yoa roi ‘lơ̆ng ƀiơ̆; vă akhan đei chih roi hơdăh, đei trong hơlen năng rơđăh rơđong, akŏm đei lơ kon jên, tơmam păng tơdrong vang jang đơ̆ng khul kơdră tơring. Gơh đei thoi noh, bơ̆n gơ̆h hơnhăk ba tơdrong tơplih ‘lơ̆ng tơpă, kơjăp đunh ăn tơdrong arih xa kơ đe drŏ kăn păng hơioh tơ̆ tơring kon kông – tơgop bơ̆ jang đei ‘lơ̆ng Tơdrong jang gĭt kăl kơ teh đak găh pơm hơtŏ băl kơplăh drŏ kăn hăm drŏ nglo truh sơnăm 2030.