Lơ̆m hnam ‘nao xă 60m², ‘nhŏng Y Lô Ksor, bơngai Rađe tơ̆ plei Hiao, xăh Ea H’leo, dêh char Đắk Lắk ưh kĕ ôn tơdrong hơiă  đơ̆ng kơdih. ‘Nhŏng Y Lô tơroi, hnam kon lơ, mĕ kră đĭ hlŏh 80 sơnăm bơih, adrol sơ̆ đĭ đăng bơngai lơ̆m hnam athei oei xa hơdai lơ̆m hnam tơ̆r hrăt hrot, ‘mi hnăt pă gơ̆h ngôi, kial tak mât hơheu, mĕ ‘nhŏng hơnơ̆ng jĭ jăn păn hnong dơ̆ng. Hnam sư arih xa gơnơm đơ̆ng dôm sao ƀum, ưh đei hơđơ̆ng kiơ. ‘Nao âu, đei Công an dêh char tơgŭm 80 triu, ‘nhŏng tŏk iŏk dơ̆ng 40 triu vă man hnam ‘nao.

Đơ̆ng năr đei hnam oei xa kơjăp ‘lơ̆ng, mĕ ‘nhŏng nhen roi pran ƀiơ̆, kon hơ ‘lơ̆p roi chơt hơiă ƀiơ̆, oei ‘nhŏng ‘nŏh hơđơ̆ng jơhngâm choh jang xa ƀiơ̆. Dang ei ‘nhŏng Y Lô oei mât bơ̆ jang lơ̆m Khul vei lăng pơlei, hơnơ̆ng vang năm dăr joang, vei kơjăp tơdrong sơđơ̆ng lơ̆m rim kơmăng: “Unh hnam pơmat tat, đei truh 8 ‘nu bơngai oei xa lơ̆m hnam tơ̆r so, hrăt hrot; ‘mi ‘nŏh hnăt, ‘năr tŏ ‘nŏh hŭl hang. Teh mir pơgar ưh đei lơ, tơ̆ groi kông dơ̆ng kơna ưh gơ̆h pơtăm ‘long kăp gĭt. Đei Đảng, Teh đak păng Anih tơm vei lăng Công an tơgŭm man hnam kơjăp ‘lơ̆ng, hnam nhôn tôch hơiă. Dang ei lăp pôm adrin jang xa, rong kon hŏk đĕch vă adrin kŭm hăm băl jang tŏk.”

Kŭm nhen dôm unh hnam nai tơ̆ pơlei pơla Tây Nguyên, mŏ H’Bui Đing, bơngai Rađe tơ̆ plei Zia, xăh Hòa Sơn, dêh char Đắk Lắk, ưh kĕ ôn tơdrong chơt hơiă mưh đei tŏk oei tơ̆ hnam ‘nao xă vă jê̆ 40m², đei kơjă 80 triu hlak jên. Mŏ tơroi, jĭ unh hnam tơnuh, rong dơ̆ng truh 4 ‘nu kon păng mĕ ƀă kră, unh hnam mŏ prăt sơnăm arih xa pơmat tat, gơnơm đơ̆ng 1–2 sao teh krang, teh ưh kơ ‘lơ̆ng, pơtăm chĕh phe dăh mă tiu ưh kơ gơ̆h. Tơdrong arih xa tôch pơmat tat, ‘nhŏ phe xa ƀa sŏng ưh kơmăh, pơma kiơ kơ pơm hnam ‘nao.

Mŏ H’Bui tơroi: “Pơma atŭm, unh hnam tôch pơmat tat, kơbăt vă pơma thoi yơ hloi bơih, arih xa rim năr gơnơm đơ̆ng chă jang ăn kơ đe ngăl. Hnam hiăh tŏ hŭl hang, ‘mi ‘nŏh hnăt, arih xa pơgia thoi noh đĕch. Mir ‘nŏh tơ̆ krang, kŭm lăp 1–2 sao đĕch, tĕh kơnê̆ dơ̆ng. Đe kăn ƀô̆ tơgŭm man ăn hnam, unh hnam čhôk ‘nă dêh. Bơnê kơ Đảng, Teh đak păng Anih tơm vei lăng Công an, dôm anih jang kơpal tơ̆ tơring. Đei hnam oei sơđơ̆ng, nhôn vă adrin jang xa, rong kon hơ ‘lơ̆p hŏk pơhrăm.”  

Găh dôm dêh char Tây Nguyên, dang ei jĭ jơ̆p Tơring găh Pơbăh kơ Tơring Tŏk bŏk, tơdrong vă jang oei pă 1 puăt sơnăm ‘nâu ‘nŏh vă adrin hơmet pơ ‘lơ̆ng tơdrong pơm hla ar teh, mong akŏm jên, bơngai jang vă man hlŏh 20 rơbâu tŏ hnam ‘nŏh jĭ tơdrong jang tôch trăp trĭn, đơ̆ng sơ̆ tam mă biơh đei. Dôm tơdrong hlôi jang đei hlôi hơnhăk ba ăn dôm tơring tơdrong kăl kăp gĭt vă hơđơ̆ng jơhngâm bơ̆ jang ‘lơ̆ng dôm tơdrong jang tih tơ̆ hơnăp kơnh.

Đại tá Nguyễn Văn Dũng, Phŏ Kơdră vei lăng Công an dêh char Lâm Đồng, tơroi truh dôm tơdrong adrin đơ̆ng khul linh công an mưh bơ̆jang “2 tơdrong jang” – ‘nŏh vei lăng kơjăp ‘lơ̆ng tơdrong sơđơ̆ng tơ̆ tơring hai, akŏm khul grŭp, tơmam vang tơgŭm ăn kon pơlei man hnam hai. Hăm jơhngâm đon bơ̆jang tơnăp, chĕp kơ̆l pơgơ̆r bơ̆jang hrơ̆ch ‘lơ̆ng đơ̆ng đĭ đăng khul linh, rim tơdrong jang hlôi đei jang đang lơ̆m 1 khei ‘năr ưh kơ đunh.

“Tơdrong tơlĕch jang âu Khul kơdră chĕp kơ̆l pơgơ̆r bơ̆ jang tôch pran. Mă hơdăh, 5 ‘nu kơdră, đei Kơdră chĕp kơ̆l păng 4 ‘nu Phŏ kơdră chĕp kơ̆l jĭ dôm bơngai vei lăng, pơgơ̆r jang tơ̆ rim grŭp vă tơgŭm man hnam oei ăn kon pơlei. Atŭm hăm ‘nŏh, athei đei tơdỏng vang jang đơ̆ng đĭ đăng rim anih jang; lơ̆m noh, pơtho ăn Công an dôm xăh, phường vang roi tơƀôh ăn Anih vei lăng kon pơlei dôm xăh krao akŏm rim anih jang chinh trĭ, dôm pơlei pơla păng kơtum kơtŏng ‘nhŏng oh, rông ƀôt kơ kon pơlei vang bơ̆ jang, tơgŭm sut pơđĭ hnam pơgia, hiăh hiok.”

Lơ̆m dôm năr hơmet ăn tơdrong tơmât hơdai dêh char, xăh păng hơmet ăn tơdrong jang đơ̆ng Khul kơdră pơgơ̆r tơring 2 tăl, kŭm jing khei ‘năr hăt bơ̆ jang pơkĕh tơdrong sut pơđĭ hnam hiăh hiok, Tổng Bí thư Tô Lâm hlôi năm ngôi păng bơ̆ jang hăm 1,2 dêh char Tây Nguyên. Tổng Bí thư pơtho tơƀôh tôch hơdăh: Tơiung pơjing Đảng athei tơklep hăm vei lăng ‘lơ̆ng tơdrong sơđơ̆ng teh đak păng jang tŏk mŭk drăm, tơpôl pran kơjăp. 

Hăm tơdrong jang sut pơđĭ hnam hiăh hiok mă dôm dêh char oei hăt bơ̆ jang, Tổng Bí thư pơma akhan, ‘nâu jĭ dôm anih oei xa vă pơm sơđơ̆ng tơdrong arih xa tơpôl hai, jĭ anih jang vă tơƀôh đon lui hai kơna Tây Nguyên athei adrin jang mă ‘lơ̆ng hlŏh dơ̆ng: “Pơm hnam ăn mih ma duch nă oei ‘nŏh đe sư hơiă dêh. Tơdrong arih xa kơ kon pơlei roi tŏk ‘noh jơhngâm pran vă vei lăng sơđơ̆ng teh đak kŭm tŏk kiơ̆. Kon pơlei roi lui kiơ̆ Đảng, teh đak, mĭnh jơhngâm kiơ̆ Đảng ‘nŏh jơhngâm pran đơ̆ng tơguăt đĭ đăng hơdrĕch hơdrung, tơguăt đĭ đăng kon pơlei roi tŏk. Tơdrong ‘nŏh kơna athei bơ̆ jang mă ‘lơ̆ng.”

Khei 7 jĭ khei bơ̆ jang tơgŭm ăn bơngai đei kŏng, khei 8 jĭ khei tơbăt năr Kăch mang iŏk jơnei, khei 9 ‘noh chơt hơiă tơbăt 80 sơnăm Quốc khánh… păng dôm pơlei pơla tơ̆ Tây Nguyên ‘nao đĭ đei hlŏh 2 jĭt rơbâu tŏ hnam ‘nao ăn dôm năr tôch gĭt kăl âu. Lơ̆m dôm bơbŭng hnam tơnŏ ‘lơ̆ng đơ̆ng kơ dih, kon pơlei tơ̆ jơ̆p tơring Tây Nguyên roi đei dơ̆ng đon lui kŭm hăm teh đak yak mât lơ̆m chăl hơmet ming teh đak, mât lơ̆m chăl jang tŏk iung ‘nao kơ teh đak.

-https://vov4.vov.vn/bahnar/trong-jang-teh-dak-tojur-an-pang-todrong-horih-chinh-sach-va-cuoc-song/sut-podi-hnam-hiah-hiok-pojing-don-lui-to-polei-pola-tay-nguyen-492230.vov4

-https://vov4.vov.vn/bahnar/trong-jang-teh-dak-tojur-an-pang-todrong-horih-chinh-sach-va-cuoc-song/sut-hnam-pogia-hnam-hyah-hyok-pojing-don-lui-to-rim-polei-pola-tay-nguyen-bai-2-hovon-don-long-hopoi-plang-dong-todrong-jang-sut-le-hnam-pogia-492327.vov4