Ƀok Nguyễn Đức Lực, anih iŏk ming man tơ̆ xah Ia Ko, dêh char Gia Lai tŏk bŏk man 10 tŏ hnam ăn unh hnam hin dơnuh hăm kơjă 60 triu hlj minh pôm hnam. Dôm tŏ hnam tŏk bŏk lơ̆m jăl keh đang mă lei ƀok pơtơm iŏk kla pơtih đĕch. Ƀok Nguyễn Đức Lực tơroi, sut hnam pơgia noh tơdrong jang tih, noh ƀok ưh đei jô̆ hơlen gah tơdrong kơƀah đei: “Tôm kon pơlei atŭm jơhngơ̆m sut hnam pơgia, noh inh atŭm jơhngơ̆m pơm jang. Inh iŏk jên man hơdrol ăn kon pơlei hre kla dar deh jên tơmam ming man. Inh gô asong tơdrong jang vă kon pơlei vang jang lơ̆m ming man, choh chong 'nhĕt dah mă pĕ kaphê tơ̆ mir inh, jô̆ jên hơpah ăn kơ đe yĕt kla jên kiơ̆ sơnăm. Đe sư kla minh ƀar sơnăm noh gô đĭ”

Tơguăt hăm tơring, yak hadoi hăm kon pơlei găn hloh tơnap tap, Viettel Kon Tum lơ sơnăm kơ ou hơnơ̆ng vang jang tơnăp dôm tơdrong jang pơyua ăn tơpôl, mă kăl noh tơdrong jang sut lê̆ hnam pơgia, hnam hyah hyok – minh tơdrong jang tih ƀenh kơ đon bơnôh 'lơ̆ng kăp gĭt kơyuơ Thủ tướng Teh đak bơ̆n pơtơm. Ƀok Diệp Trung Kiên – Phŏ Kơdră Viettel Kon Tum (so) tơroi: “Pơm kiơ̆ nơ̆r krao hơvơn, lơ̆m sơnăm 2025, Viettel Kon Tum hlôi kơchăng pơtơm hăm Anih jang tơgŭm dêh char 5 tih hlj vă jang kiơ̆ tơdrong jang sut lê̆ hnam pơgia, hnam hyah hyok păng hơmet hnam oei ăn dôm unh hnam đei tơdrong hơrih tơnap tap lơ̆m tơring”

Dôm anih jang mŭk drăm vang jang tơnăp sơnong jang hăm tơdrong jang sut lê̆ hnam pơgia, hnam hyah hyok, noh tơdrong pơtrŭt tơnăp hăm sơnong jang chinh trĭ dôm dêh char Tây Nguyên roi kơtang hloh. Mă athei tơblang hơdah lơ ƀai toăn tơnap tap gah bơngai jang păng hla bar pơkăp gah teh asong man hnam 'nao – sut lê̆ hnam pơgia, mă lei Gia Lai păng Đăk Lăk adoi hơlen hơdah păng rim dêh char adoi chih akŏm tơdrong jang sut hloh 8.100 tŏ hnam. Kơsô̆ tih tên tơpă, tơdrong jang adoi tih tên, trŏ hăm khei năr tơmơ̆t hơdai tơring jang hanh chinh, dôm dêh char adoi oei pơkăp khŏm mă jang keh đang tơdrong tơlĕch jang, hơvơn tơdrong pơm jang đơ̆ng Trung ương truh tơ̆ tơring. Ƀok Siu Trung – Phŏ Kơdră Anih jang Măt trâ̆n tôh kuôk Việt Nam dêh char Gia Lai ăn tơbăt: “Jơnŭm pơgơ̆r jang gah pơm kiơ̆ tơdrong jang sut lê̆ hnam pơgia dêh char hlôi pơtruh kơthơ hơvơn dôm anih jang mŭk drăm, bơngai jang lơ̆m păng 'nguaih kơ dêh char, hơvơn vă vang tơgop jên, akŏm hăm jên asong đơ̆ng Trung ương. Kiơ̆ đơ̆ng noh, keh đang tơchơ̆t đei pơjao vă dah keh đang tơdrong pơtơm pơm jang. Minh ƀar tơring hlôi kơchăng iŏk jên hơdrol vă dah pơtơm ming man. Atŭm hăm noh, khul linh adoi đei hơvơn, tơgop năr jang vă vei sơđơ̆ng ăn tơdrong pơm jang gơh keh đang”

Jô̆ đơ̆ng năr 1/7, jơnŭm pơgơ̆r 2 tăl pơtơm pơm jang, dôm dêh char Đăk Lăk, Gia Lai, Lâm Đồng adoi hơlen tôm tơdrong jang sut lê̆ hnam pơgia, sơkơ̆t hơdah hlôi pơtơm ming man jê̆ 20 rơbou tŏ hnam păng hloh 1.900 tŏ hnam oei tơhlăk. Rim xah, phương 'nao hlôi đei pơjao sơnong jang hơdah, khei năr hơdah vă keh đang ming man lơ hnam oei mă hơtuch luch vă tơdrong jang sut lê̆ hnam pơgia gơh keh đang trŏ nhen tơchơ̆t tơlĕch.

Yă Nguyễn Thị Hồng Hạnh – Kơdră Anih jang Mŭk drăm xah Cuôr Đăng, dêh char Đăk Lăk ăn tơbăt, lơ̆m sơnăm 2025, tôm xah đei 31 unh hnam đei tơgŭm man hnam 'nao noh adoi ƀơm tơhlăk tăk tơrĕk truh teh păng hla bar pơkăp ming man. Ah pơtơm jang kiơ̆ pơkăp jơnŭm pơgơ̆r 2 tăl, păng đei pơjao sơnong jang hơdah gah Tơdrong jang sut lê̆ hnam pơgia, xah hlôi jang tơnăp dôm tơdrong jang kơ po: “Tơnap tap tih hloh hăm kon pơlei noh gah teh kơlih mĕ ƀă, 'nhŏng oh asong ăn tam mă đei tơplih hơnăn, tơklah hơgăt teh; minh ƀar groi teh noh jing teh choh jang xa tam mă tơplih. Kơyuơ noh, nhôn hlôi tơgŭm ăn kon pơlei chă pơm hla bar tơplih teh yua mă trŏ tơchơ̆t, đơ̆ng rŏng kơ noh pơtơm tơplih hơnăn dah mă tơplih jing teh pơm hnam oei. Oei hăm dôm hla bar asong ming man, kŏng chư̆k gô pơm hla bar, dôm tơchơ̆t thuê̆ đei tơrĕk truh ming man hnam oei noh ưh đei huach jên kiơ ôh”

Dôm tơdrong hơdrin đơ̆ng jơnŭm pơgơ̆r tơring, kon pơlei păng anih jang mŭk drăm, tơdrong jang sut lê̆ hnam pơgia tơ̆ Tây Nguyên hlôi đei tơlĕch jang drơ̆ng minh. Ƀĭ thư tĭnh uy dôm dêh char kơtă chĕp kơ̆l jơnŭm pơgơ̆r jang, vei sơđơ̆ng akŏm jang tơnăp hloh ăn tơdrong pơklaih tơhlăk tơhlĭn, hơtŏk tenh tơdrong pơm jang. Ƀok Nguyễn Đình Trung, jang lơ̆m trung ương Đảng, Ƀĭ thư Tĭnh uy Đăk Lăk tơroi, hlôi đei khei năr ngeh ưh đei vei sơđơ̆ng trŏ tơchơ̆t tơlĕch sut lê̆ hnam pơgia, kơlih kon pơlei hơdrô̆ đei teh choh jang dah mă teh hăm hơnăn 'nhŏng oh kơtum kơtŏng. Mă lei hăm tơdrong drơ̆ng minh đơ̆ng kơpal jur tơ̆ hơla păng tơdrong pơgơ̆r tơtom, dôm tơdrong tơhlăk tơhlĭn hơnơ̆ng đei pơklaih: “Anih jang Tĭnh uy tơrĕk truh tơdrong ou. Kiơ̆ kơ tơdrong kĕ đei tơ̆ tơring, Tĭnh uy hlôi pơjing Jơnŭm pơgơ̆r man hnam ăn unh hnam hin dơnuh păng dôm unh hnam mă teh đak tơchơ̆t tơgŭm. Tĭnh uy hlôi pơgơ̆r Anih jang vei lăng kon pơlei dêh char, rim anih jang khŏm mă pơm kiơ̆ kơjăp tơdrong jang ou, pơm thoi yơ vă đei jơnei tơnăp, vei sơđơ̆ng trŏ nhen tơchơ̆t, trŏ bơngai”

Rim bơbŭng hnam kơjăp 'lơ̆ng tŏk bŏk oei đei dơ̆ng kơjăp tơ̆ dôm pơlei pơla Tây Nguyên, ưh hơdrô̆ tơgŭm ăn kon pơlei sơđơ̆ng oei xa, mă oei hơtŏk đon lui lơ̆m dôm trong jang trŏ, tơguăt hăm kon pơlei, pơm jang kơyuơ kơ kon pơlei. Đơ̆ng rŏng kơ rim tŏ hnam noh tơdrong jang hơdoi kơjăp đơ̆ng Trung ương păng tơring, jing jơhngơ̆m akŏm đơ̆ng khul Kŏng ang, Khul linh, jơnŭm pơgơ̆r tơring, anih jang mŭk drăm păng kon pơlei atŭm akŏm đei.