Năr ŭnh hnam 'nhŏng K'Long Ha Juil, oei tơ̆ thôn 6, xăh Lạc Dương, dêh char Lâm Đồng tŏk oei lơ̆m hnam 'nao, jơ̆p pơlei chơt hơiă yoa. 'Nâu jĭ ŭnh hnam mă hơtuch lơ̆m kơsô̆ 9 ŭnh hnam đei sut lê̆ hnam pơgia, chih tơbăt lơ̆m pơlei ưh pă đei hnam hiăh hiok. Tơdrong arih xa đunh kơ âu hơnơ̆ng ưh kơ tôm măh, 'nhŏng hơnat vă gơ̆h mong đei tôm kon jên man hnam. Gơnơm đơ̆ng tơdrong tơgŭm sut pơđĭ hnam hiăh hiok đơ̆ng Teh đak, ŭnh hnam tơlĕch dơ̆ng dang 250 triu hlak jên, kơtum kơtŏng ‘nhŏng oh vang tơgop thim jên, pơlei pơla ‘nŏh vang pơm tơgŭm, hnam xă, kơjăp 'lơ̆ng mă hơtuch kŭm đei man đang: “Nhŏng oh, mĕ ƀă, bôl boăl lơ̆m pơlei vang tơnôm, tơgŭm tôm kon jên man 1 pôm hnam 'nao, đei hnam hơiă dêh, đei anih arih xa sơđơ̆ng păng vă adrin choh jang xa”.

Tơ̆ thôn 6, xăh Lạc Dương, tơring vă jê̆ 100% kon pơlei kiơ̆ lui khop, tơdrong mât 1 ƀơ̆r đon jing tơdrong 'lơ̆ng lơ̆m tơdrong arih xa tơpôl. Ưh khan lăp tơgŭm băl sut hŭt hnam pơgia, bơngai đei ƀôh ƀiơ̆ oei tơgŭm bơ̆n kon jên; ŭnh hnam ưh kơ đei bơngai jang ‘nŏh đei mih ma duch nă vang năm jang tơgŭm, choh pong mưh jang sa. Kră pơlei Lơ Mu Ha Djô, bơngai đei kon pơlei lui yom tơ̆ thôn 6, jĭ mĭnh lơ̆m dôm bơngai vang pơjing đei tơdrong pơvei mât 1 ƀơ̆r đon âu. Kiơ̆ đơ̆ng dôm 'măng hôp pơlei păng dôm 'măng tơƀơ̆p rim ŭnh hnam, ƀok pơlung kon pơlei adrin jang xa, tơplih ming 'long pơtăm, tơgŭm băl yak hloh mơmat tat, sut hŭt dôm tơdrong juăt ưh kơ 'lơ̆ng păng vei kơjăp tơdrong sơđơ̆ng tơ̆ pơlei pơla. Hăm ƀok Djô, “arih xa ‘lơ̆ng, lui kơjăp” athei pơtơm đơ̆ng dôm tơdrong jang tơ̆ yăn âu: "Kŭm chă roi tơbăt ăn kơ đe vă pơm thoi yơ gơ̆h đei đon ‘mêm băl, tơgŭm băl, chă tơgŭm ăn dôm ŭnh hnam ưh kơ măh sŏng xa, nhă đak, vă kŭm hăm băl đei tơdrong arih xa hiôk sơđơ̆ng hơdai".

Ưh lăp tơ̆ Lạc Dương đĕch, tơ̆ xăh Sơn Điền, lơ kră pơlei, Bí thư Chi ƀô̆ pơlei, kŭm adrin krao hơvơn kon pơlei arih xa “‘lơ̆ng, lui kơ jăp”. Nhen tơ̆ plei Ka Sá, hăm tơdrong chơng ba đơ̆ng kră pơlei, chi ƀô̆ păng khul vei lăng pơlei, mih ma duch nă adrin tơplih ming ‘long pơtăm, kon tơrong, mă loi ‘nŏh atŏk tơiung cheh phe, kơna tơdrong arih xa roi tŏk ‘lơ̆ng. Hơdrô̆ kră pơlei K’Lãng, ƀok chơng hơnhăk mih ma duch nă tơ̆ plei Ka Sá ưh lăp kiơ̆ đơ̆ng roi tơbăt, hop akŏm đĕch, mă oei tơƀôh trong chong glung, jang hơdrol đơ̆ng ŭnh hnam kơdih hloi: “Tơ̆ âu, hăm mih ma duch nă jơ jê̆ 'noh ba năm truh tơ̆ rim hnam, hăm tơdrong atŭm 'noh roi tơbăt, krao hơvơn kiơ̆ đơ̆ng dôm 'măng hop akŏm 'noh tơm... Ba athei jang mă tơnăp hơdrol. Blŭng a 'noh jĭ ŭnh hnam bơ̆n ‘mơ̆i, athei vei kơjăp tơdrong juăt ‘lơ̆ng đơ̆ng sơ̆ kơ hơdrĕch hơdrŭng... hơnơ̆ng chă pơtho tơƀôh ăn kôn mon kon sâu đơ̆ng rŏng, vă ning mônh kơnh huei kơ hiơt hiong lê̆ tơdrong ‘lơ̆ng đơ̆ng sơ̆".

Xăh Sơn Điền đei hlŏh 2.000 'nu bơngai lui Công giáo păng Tin lành. Vă tưk tơiung hơnăp jang đơ̆ng kră pơlei, bơngai đei kon pơlei lui yom păng bơngai pơtho lui khop, khul kơdră pơgơ̆r tơring hơnơ̆ng jang hơdoi vang roi tơbăt, krao hơvơn kon pơlei atŏk tơiung mŭk drăm, pơjing tơring tơrang 'nao.

‘Nao âu, dôm khul lui tơ̆ tơring drơ̆ng nơ̆r hăm trong jang pơm kiơ̆ tơdrong arih xa 'lơ̆ng rơgei lơ̆m tơdrong et pơkong, pơdong ƀŭ bơngai lôch, et soi. Tơring kŭm athei dôm bơngai pơtho lui khop tơgĕch roi tơbăt, krao hơvơn bơngai lui lơ̆m dôm 'măng hơkŭm rim giĕng. Ƀok Vũ Đức Nhuần, Kơdră vei lăng kon pơlei xăh Sơn Điền pơma hơdăh: “Nhôn ƀôh, vă gơ̆h jang đei nhen thoi noh 'noh hơnăp jang đơ̆ng đe ƀok pơtho lui khop, kră pơlei tôch gĭt kăl. Nhôn hơlen lăng khei ‘năr âu ki, hơnăp jang đơ̆ng đe ƀok pơtho lui khop, kră pơlei ‘lơ̆ng tơpă... Tơ̆ hơnăp kơnh, xăh vă hơnơ̆ng hơtŏk hơnăp jang âu đơ̆ng đe ƀok pơtho lui khop păng kră pơlei, pơm thoi yơ vă đe ƀok pơtho lui khop păng kră pơlei jing dôm bơngai jang tơm, dôm bơngai roi tơbăt ƀơ̆t tŏk bŏk tơpôl, tơgŭm ăn kon pơlei bơ̆ jang roi 'lơ̆ng hơnăp jang đơ̆ng kơdih 'noh jĭ mĭnh 'nu kon pơlei hơgei ‘lơ̆ng hơiă kơ xăh Sơn Điền".

Jơ̆p dêh char Lâm Đồng dang ei đei vă jê̆ 900 'nu bơngai đei kon pơlei lui yom tơ̆ tơring kon kông. Jê̆ kon pơlei, hlôh vao tơdrong juăt đơ̆ng sơ̆ păng đei kon pơlei lui yom, đe sư jing gơng tơƀưh đơ̆ng khul kơdră pơgơ̆r hăm kon pơlei, vang tơgop krao hơvơn kon pơlei jang tŏk mŭk drăm, chĕp vei tơdrong juăt 'lơ̆ng, hơmet kơjăp tơdrong pơvei, mât mĭnh ƀơ̆r đon.