Đơ̆ng xăh achon kông lơ̆m đak dơsĭ Nhơn Châu, 'nhŏng Nguyễn Văn Bảy kŭm hăm hloh 100 'nu kon pơlei yak hloh 13 hải lý tŏk tơ̆ kông vă vang thi iŏk ƀăng huơ̆r gre hạng A1. Hăm kon pơlei tơ̆ đak dơsĭ, rim 'măng tŏk tơ̆ kông jĭ mĭnh 'măng athei pơngơ̆t dơ̆ng ăn tơdrong yak vih vơ̆t, jên sŏng sa. Lơ̆m 'măng thi pơlong mă âu, dôm kơsô̆ jên pơhuach 'noh đei teh đak tơgŭm ăn, tơgŭm ăn kon pơlei dă ƀiơ̆ pơmat tat ƀiơ̆. Hăm 'nhŏng Bảy, tơdrong kăp gĭt hloh 'noh jĭ dôm tơdrong hlôh vao găh khôi luơ̆t hao gre kơdâu tơ̆ trong gơ̆h pơm kiơ̆ hloi lơ̆m tơdrong arih xa rim năr: “Jơhngơ̆m đon blŭng a kŭm hli, pơngơ̆t mơ̆n mă lei kŭm adrin thi vă gơ̆h đei ƀăng. Mưh chă hao gre vih vât ‘nŏh băt yak trŏ trong kiơ̆ tơdrong hơgăt đơ̆ng khôi luơ̆t”.

Ƀok Dương Hiệp Hưng, Kơdră vei lăng kon pơlei xăh Nhơn Châu ăn tơbăt, kơjă kăp gĭt đơ̆ng tơdrong jang ưh lăp tơgŭm ăn kon pơlei đei dơ̆ng tơdrong hiôk vă đei ƀăng huơ̆r gre đĕch, mă kăl hlŏh jĭ pơtho đon hlôh vao luơ̆t mưh hao gre kơdâu tơ̆ trong: “Kon pơlei tôch lui kơ dôm tơdrong jang gĭt kăl thoi âu, hơpơi 'meh kon pơlei thi đei ƀăng păng đĭ đăng mih ma duch nă jing bơngai chă pơtho tơƀôh, pơm hơtŏk đon pơm kiơ̆ Luơ̆t hao gre kơdâu tơ̆ trong, pơjing xăh achon kông đak dơsĭ roi đunh roi gơ̆h hơgei, 'lơ̆ng rŏ păng ƀĕnh jơhngâm 'mêm kơ eng."

Tơdăh tơ̆ achon kông Nhơn Châu, trong yak hơtăih yăih jĭ tơdrong găn trong 'nŏh tơ̆ 1,2 tơring kon kông kơ Gia Lai, tơdrong pơmat tat pơtơm đơ̆ng tơdrong đŏk păng hlôh ƀai thi hăm nơ̆r yoăn. Đei lơ kon pơlei ư̆h kơ gơ̆h đŏk, ưh gơ̆h chih nơ̆r Yuăn. Tơdăh pơgơ̆r thi lý thuyết hmă, đe sư hơnat vă gơ̆h roi tơƀôh tôm tơdrong hlôh vao đơ̆ng đei hŏk pơhrăm, mă đơ̆ng oei 'mĕh vă păng gơ̆h huơ̆r gre sơđơ̆ng ră.

Vă hơmet pơ 'lơ̆ng tơdrong ‘nâu, tơ̆ 1,2 tơring, tơdrong thi chih đei pơgơ̆r kiơ̆ trong apinh – tơl tơblang. Bơngai apinh jĭ bơngai kon kông, tơlĕch nơ̆r apinh hăm nơ̆r kon kông tơ̆ tơring hloi, tơgŭm ăn bơngai thi hlôh vao trŏ păng tơl tơblang nơ̆r kiơ̆ tơdrong hlôh vao đơ̆ng kơdĭh. Mŏ Rơ Châm Di, oei tơ̆ pơlei O, xăh Ia O, dêh char Gia Lai, chơt hơiă ăn tơbăt: “Năr ‘nâu đei năm thi iŏk ƀăng hao gre, thi chih đang bơih, kơdih kâu inh ƀôh tôch hơiă. Đơ̆ng rŏng kơnh hao gre sơđơ̆ng ƀiơ̆”.

Tơdrong hơiă đơ̆ng mŏ Di kŭm jing tơdrong hơpơi 'mĕh đơ̆ng lơ kon pơlei tơ̆ tơring kon kông: đei hŏk păng iŏk đei ƀăng huơ̆r gre kiơ̆ tơdrong hlôh vao đơ̆ng kơdih, mă lei kiơ̆ 1 trong pơgơ̆r lăp hăm yăn âu. Trung tá Thái Hoàng Nam, Yŏng Kŏng an xăh sơlam Ia O, dêh char Gia Lai, ăn tơbăt, jĭ tơring đei vă jê̆ 70% kon pơlei 'nŏh bơngai kon kông, tơdrong arih xa oei lơ pơmat tat. Tơdrong đei pơtho pơhrăm, thi pơlong vă ƀơk ăn ƀăng huơ̆r gre ưh đei iŏk jên, tơgŭm ăn kon pơlei đei dơ̆ng tơdrong 'lơ̆ng vă gơ̆h hlôh vao khôi luơ̆t mưh hao gre kơdâu tơ̆ trong: “Kiơ̆ đơ̆ng âu kŭm hơtŏk đei đon hlôh vao găh khôi luơ̆t vei sơđơ̆ng tơ̆ trong nơnăm. Păng mưh đei ƀơk ăn ƀăng huơ̆r gre 'noh kon pơlei gô đei đon kơchăng ƀiơ̆ lơ̆m tơdrong pơm kiơ̆ khôi luơ̆t, vei lăng kơdih kâu, ŭnh hnam păng tơpôl”.

Đơ̆ng tŏk bŏk khei 8/2025 truh dang ei, Kŏng an dêh char Gia Lai hlôi pơgơ̆r 13 'măng thi iŏk ƀăng huơ̆r gre A1 ưh iŏk jên ăn 862 'nu bơngai găh ŭnh hnam dơnuh, vă jê̆ dơnuh tơ̆ dôm xăh mơmat tat dêh hloh. Lơ̆m kơsô̆ âu, 475 'nu bơngai thi đŏu păng đei ƀơk ăn ƀăng hao gre.

Thượng tá Ksor H’bơ Khắp, Phŏ Kơdră vei lăng Kŏng an dêh char Gia Lai ăn tơbăt, tơdrong tơgŭm ăn lơ unh hnam pơmat tat đei tơdrong 'lơ̆ng vă gơ̆h hŏk pơhrăm, hlôh vao khôi luơ̆t păng dôm tơdrong kăl nai mưh hao gre kơdâu tơ̆ trong vă gơ̆h sơđơ̆ng 'lơ̆ng: “Athei pơtho ăn Kŏng an dôm xăh lơ̆m dêh char hơlen năng rim ŭnh hnam pơmat tat, ŭnh hnam tĕh đak athei tơgŭm. Đơ̆ng rŏng 'nŏh chih hơnăn păng bơ̆ jang dôm hơyak jang vă tơgŭm ăn kon pơlei tơ̆ dôm tơring âu năm thi vă gơ̆h đei ƀăng huơ̆r gre, pơm ‘lơ̆ng găh đon hlôh vao luơ̆t mưh hao gre kơdâu tơ̆ trong”.

Hăm dôm tơring oei đei lơ pơmat tat tơ̆ Gia Lai, trong jang “Ƀăng huơ̆r gre 'mêm mơnat" kŭm jing trong hơnhăk dôm tơdrong vei sơđơ̆ng tơ̆ trong nơnăm truh jê̆ ƀiơ̆ hăm kon pơlei, đơ̆ng noh vang tơgop pơjing đon hlôh vao pơm kiơ̆ luơ̆t mưh hao gre kơdâu tơ̆ trong kơtă đơ̆ng tơring hloi.